Read bassa SHƐZUNGA TUZUNGANGANA AGWANGWAMA 79 Bible Online

SHƐZUNGA TUZUNGANGANA AGWANGWAMA 79 - bassa bible

SHƐZUNGA TUZUNGANGANA AGWANGWAMA 79

¹Azunga na ga Asaf Zunganganɛ AGWANGWAMA Oo Agwatana, atwa na a zhɛba tuwa teneni cɛnjɛ tụ bụ; ee heshigeni umwono bu tijilo; ee hwuŋzetenji Jɛrusalɛm.

²Ee peni ogwulu tu'waba ta miaụŋ mụ bụ mu ugondu maa a yɛ, ee peni isundɛ ehilo tu'waba ta atwa bụ tijilo maa i yɛ aŋ.

³E dudweji mehieŋ ma atwa bu gana meni; mehieŋ ma fwunga gana meni moo rungwutwonu Jɛrusalɛm, i zasa kaa bụtụ na vwɛ maa no n'wo ma aba o.

⁴Edenji na utu rungwutwonu ma tu twaga, aa ma tu hinga ilɛtu, aa ma tu nda asada.

⁵Oo AGWANGWAMA, bi zhɛ ba nda suu isɛbwɛ no tu unyizo-nom? Isɛbwɛ bu suu zhɛ ya uranga tuhwoŋtu gana ulwa?

⁶Ga shɛ edenji ata a bɛ zhɛbɛ shɛ ebu dudugeni isɛbwɛ bu, keeni cɛnjɛ cɛnjɛ-ta-tugwama tu na tɛ njɛ shɛ adua ni izeci bu!

⁷Iwɛnɛ po a kwụnɛ ajalalo Jekob a na shɛ atwa bu; aa njɛ cɛnjɛ ta aba osombo.

⁸Ta tu pana ulwapɛ iwɛ iwɛwɛ nɛ ogwunukwoshi tu njɛ o; hioko inyɛmɛnyɛmɛ tu hwuwayɛ, tu zasa ya ashɛlatụ elele o.

⁹Oo Agwatana, iti mbiyeni maa iti bicinji, iti le, maa iti gengeni iwɛwɛ tu, iwɛ ụjɛrụma izeci bu!

¹⁰Iwembe po azhɛbɛ tuwa zhɛ mo tu mbiso maa, ce Agwatana hiŋ namɛ yaa? Lono maa ta kwụba ulwapɛ na ɛbi zhɛ ba pana edenji iwɛ mehieŋ mu miaụŋ mụ bụ mu ugondu mu na ee dudweji.

¹¹Shɛlaga ti'nyongongo ta atwa na zweni nu umwono-tishi; maa jwɛ atwa na ee peni n-ndumwa-tụwụma mo tu'wo tedure nu ukpahiŋ ata bụ ụ'wụtụ!

¹²AGWANGWAMA, gwuricingono edenji itɛpwɛ ya aba kpalụ cenje, iwɛ tutwa tu na aa bu twagajɛ.

¹³Nazhɛ ɛti zhɛ ta bụ 'walụ atuba na tɛ shɛ unyama wa agwụdụ bụ, tutu unyizo-nom, ti zhɛ tu na bụ shɛtana tutu awaŋnɛ na te e ci.