Read bassa SHƐZUNGA TUZUNGANGANA AGWANGWAMA 80 Bible Online

SHƐZUNGA TUZUNGANGANA AGWANGWAMA 80 - bassa bible

SHƐZUNGA TUZUNGANGANA AGWANGWAMA 80

¹No Ofwo Iyɛri ya Azụnjɛ: Azunga Tiseyida na ga Asaf zungananɛ AGWANGWAMA Oo a-bi'iywa ba atwa Isrɛl, shɛlaga iwɛ tu; hwuga iwɛ tu, gabụ bi'yagajɛ ba atwa Josɛf a na shɛ gana agwụdụ bụ! Gabụ na bɛ jɛjɛ ni idwɛtwɛ bu, na azuba iyi-uumwa nɛ 'yajɛ apiambɛ,

²abu mama kapɛshɛngana alamụ Ifrem, nɛ Bɛnjamin, keeni Manasɛ. Iti mbiseni ukpahiŋ bụ. Zhajɛ maa iti bicinji!

³Oo Agwatana, utu gwuricinje! Iti mbiseni inyɛmɛnyɛmɛ bu, maa to bino!

⁴Oo AGWANGWAMA na shɛ Agwatana a'wụtụ 'wụtụ, bi zhɛ suu ba nda isɛbwɛ na atwa bụ tutuu, abɛ zha shɛ ba hwuga ya shidua sha aba?

⁵Gabụ bi ti peni ụngwụ-tuhwuga ụ'wụtụ, maa malaba mu tu mu na fwunga nu u'wo ụ'wụtụ na ata twa.

⁶Gabụ bi leni maa ge edenji na utu rungwutwonu a sukakanɛ cɛnjɛ tu tu ni ifelu, maa atwa i'ime tu na ti hinga ilɛtu ya asada.

⁷Oo Agwatana a'wụtụ 'wụtụ, utu gwuricije! Hioko inyɛmɛnyɛmɛ tu, maa to bino!

⁸Gabụ bu bɛcinjɛ atwa bu a na shɛ gana ukparɛ ufwafwa ni Ijipti; ebi unzhi edenji anya, ebi tileni aŋ na cɛnjɛ ta aba.

⁹Gabụ bi hengecengeni aŋ ofwo na maa a na kaana tuwaŋna; ibɛ po ivwunɛ ya aba 'imɛ cɛnjɛ aa kaana ufwugwo tugombo na cɛnjɛ ta ata hwɛɛ.

¹⁰Ukpahiŋ wa aba urigeni tugwama tu na tɛ shɛ gana nshama; shɛ'walụ shɛ bwa shi ubi agbandụ a na shɛ gana i'wɛ'wɛ yo osobu.

¹¹Tububaga ta aba ti zhe tutu Itekwu Meditaranian, tutu Urefu Yuferetis.

¹²Iwembe po ebu hwuŋzhi ikepi nɛ go rungwutwonu aŋ, iwɛ maa atwa elele na a kashɛka aŋ na nda aŋ gana elele na kwụlanɛ aaŋ?

¹³Shɛlụma sho rukoto aŋ, isundɛ ehilo ivwɛ ya ya aŋ.

¹⁴Oo Agwatana na Hwuri Kpaaŋ, gwure pu tu! Utu mbiyanɛ ta abu namɛ na azuba; zhajɛ maa bicinji atwa bụ!

¹⁵Zhajɛ maa bicinji atwa bụ a na shɛ gana ukparɛ ufwafwa ata abɛ shɛrɛ la nu u'ala bu ubiye, ibɛ shɛ ufwafwa ata umere ɛbi wɛnicinjɛ maa u 'yaga ikɛnyi!

¹⁶Atwa i'ime tu sepi aŋ ulwa, ee kekebi aŋ; kala aŋ ashɛrɛnganɛ ni isɛbwɛ bu maa iricinji aŋ.

¹⁷Ama untangana atwa na ebi teri maa jilanɛ aŋ, aba shɛ udenji ata abɛ njɛ maa ubu 'yagana ikɛnyi.

¹⁸Nazhɛ atɛ zha shɛ ta bu ganga ya kwukwuŋ; iti peni uraiŋ, maa ta bu shɛtana.

¹⁹Oo AGWANGWAMA na shɛ Agwatana na Hwuri Kpaaŋ, utu gwuricinje! Hioko inyɛmɛnyɛmɛ tu, maa iti bicinji!