Read bassa SHƐZUNGA TUZUNGANGANA AGWANGWAMA 83 Bible Online

SHƐZUNGA TUZUNGANGANA AGWANGWAMA 83 - bassa bible

SHƐZUNGA TUZUNGANGANA AGWANGWAMA 83

¹Azunga na ga Asaf Zunganganɛ AGWANGWAMA Oo Agwatana, ta nama shiruu o; to sumongo, oo Agwatana ta nama kaa saiiŋ o!

²Hioko, atwa i'ime bu a nda ofwo kobu kobu; atwa ata na mo bu imo ɛ ishijɛ ne tigezhe.

³Aa haŋsagana atwa bu iwɛ ne tusweci; aa imangana atwa na aba jilanɛ maa e teni aŋ u'ala.

⁴Ɛɛ hiɛŋ, Hwure ti iricinji ma udenji wa aba, iwɛ maa kede e teyinje ya izeci ya atwa Isrɛl kwukwuŋ.

⁵Iiŋ, o momo lononu na tuhaŋsagana ta aba, aa ma bu twatwaganụ unu:

⁶ta atwa Idụm, na atwa Ishmɛl, na Amoab keeni Ahag;

⁷atwa Gibal, na A'amon keeni A'amalɛk, keeni Afilistia medenji atwa na jɛjɛ nu Taya.

⁸Atwa Asiria du togwu na aba; a na shɛ ukpahiŋ wa ajalalo Lot.

⁹Nda aŋ gana na abɛ njɛ la Amidian, keeni gana na abɛ njɛ la Sisera keeni Jebin nu Urefu Kishon.

¹⁰Gabụ bi iricinji aŋ ni Ɛn-do, ibɛ po tu'waba ta aba tu fwoshi na cɛnjɛ ta ata.

¹¹Nda ehwurembe aba iyi nɛ abɛ njɛ la Orɛb ne Zib; iricingo ehiu aba hwɛɛ gana na abɛ njɛ la Ziba keeni Zalmuna,

¹²a na hiɛn, Ti zhɛ ta lashɛga cɛnjɛ ta Agwatana maa ta 'yaga ni ikɛnyi tu.

¹³Oo Agwatana mi, garataga aŋ gana upwupwutu, keeni gana na tu uvwugo wo sugo afwụrɛkɛcɛ.

¹⁴Gana na ulwa wo songo uwapa, gana na ta bụratụ bu ulwa bo hwoŋzhingo nshama.

¹⁵Unzo aŋ nu uvwugo bu ụ'wụtụ ụwɛ, maa no holono aŋ nu ujipo bu.

¹⁶Oo AGWANGWAMA, nda maa ge ezuye 'imɛ shishe sha aba, nda aŋ maa a na nda adua ni izeci bu.

¹⁷Go uriri bu iricinji aŋ unyizo-nom; ga ụpụrụsa ụ'wụtụ njɛ aŋ ufwu kpaaŋ.

¹⁸Ge e mepi maa gabụ kiri bɛ shɛ AGWANGWAMA, na kaa Hwuri Kpaaŋ na cɛnjɛ tu unyizo.