Read bassa SHƐZUNGA TUZUNGANGANA AGWANGWAMA 84 Bible Online

SHƐZUNGA TUZUNGANGANA AGWANGWAMA 84 - bassa bible

SHƐZUNGA TUZUNGANGANA AGWANGWAMA 84

¹No Ofwo Iyɛri ya Azụnjɛ: Azunga na Miaụŋ-me-eyi mu Kora mu Zunganganɛ AGWANGWAMA Oo AGWANGWAMA na Hwuri Kpaaŋ, hioko gana na ofwo na abu namɛ pilanụ tebiye!

²Ma jala maa ma nama apata tebiye! I ma n dwa eshe maa ma nama nu umwono wa AGWANGWAMA. Maa ma zungangana Agwatana uumwa azunga unyasa na tunama ti mi kpaaŋ.

³Oo AGWANGWAMA na Hwuri Kpaaŋ, Agwuma mi, na Agwatana mi, Okwo acaarụ a ta tuhwurugwo, agagale kaa 'yajɛ ihwɛ ya aba; aa intana oywoywo aba to dongonu otukwu-ụrụpɛ bụ.

⁴Atwa na zweni nu umwono bu, a na ma bu zungangana azunga ashɛtwa aka elele gwoje.

⁵Atwa na aba pana ukpahiŋ bụ, a na shikicinji shɛhaŋsa sha aba no turungo ni Ishɛmɛ Zayon[69] gwoje.

⁶Gana na ta a kashɛka ulomu uhwoo Beka, ibɛ po apata shɛ ɛmɛzhinjɛ; eshilo ugbama shidinji apata no okwokwo meni.

⁷Ikɛnyi ya aba ya kaana ugombo tɛ ɛ zhɛ; ɛ zhɛ a kwụba Agwatana shɛgwatana nu Zayon.

⁸AGWANGWAMA na shɛ Agwatana na Hwuri Kpaaŋ, hwuga adua mi, Oo Agwatana Jekob, shilo acɛbɛ!

⁹Oo Agwatana, pana Agwuma tu uwebiye, Agwuma ata bu ebi dudugeni manɛbɛ mu tugwama.

¹⁰Tunama nu umwono bu okwo jitoo ko gba tɛ zhɛmɛ tee hwuri tunama ijitɛ akpakwụ-ta nyapadụ. Tungbaraka to odubo umwono wa Agwatana mi tu n kwụlanɛ, tee hwuri maa ma nama na amɛ shimwono sho ogworozwo.

¹¹AGWANGWAMA ubwa shɛ ijilɛni tu, na Agwuma tu ụjɛrụma, bu ma tu pana uwebiye keeni ụjɛrụma. AGWANGWAMA nyashɛ shɛ atwa na a zha tahaŋnụ ne tiririri iyi ibiye ye elele o.

¹²Oo AGWANGWAMA na Hwuri Kpaaŋ, Atwa na ubu patanɛ-rishe gwoje!