Read bassa SHƐZUNGA TUZUNGANGANA AGWANGWAMA 92 Bible Online

SHƐZUNGA TUZUNGANGANA AGWANGWAMA 92 - bassa bible

SHƐZUNGA TUZUNGANGANA AGWANGWAMA 92

¹Azunga Tuzungangana AGWANGWAMA iwɛ Ụjita-ụhinjanụ I zhɛmɛ duwa maa ta nda ugwoje wa AGWANGWAMA, Oo Agwatana na Hwuri Kpaaŋ, ta zungangana izeci bu azunga ashɛtwa;

²maa ta ananga tulubo tụ bụ ti tikpeke nu uvwungwa we elele; keeni tɛcara tụ bụ nụ ụrụmɛ we elele,

³tedure nu uta ti'nyama na azunga, na aduma, medenji urwondwo nu ugwoje ti'nyama.

⁴Oo AGWANGWAMA, ugondu bụ ụ'wụtụ u m peni unyasa; Ma zunga azunga nu unyasa iwɛ ugondu na abɛ njɛ ni i'ɛlɛ bu.

⁵Oo AGWANGWAMA, ugondu bu gembi duwa! Tuhaŋsa tụ bụ kaa ti iri tebiye!

⁶Alagwụ eri shi a mapa ijɛ o; bụtụ na eshiciji shi iyi kaa eri shi bo eshicigo iŋ o:

⁷okwo ogworozwo a waŋna gana ambɛ, ya zhɛmana kaa anjɛ iyi iwɛ; okwo ti yaa shɛ gana ata, ɛ zhɛ e iricingo aŋ hwɛɛ aba unyizo-nom,

⁸ama gabụ oo AGWANGWAMA, bu patanɛ na azuba unyizo-nom.

⁹Oo AGWANGWAMA, hioko, atwa i'ime bu kpaaŋ zhɛ a nda ufwu; ɛ zhɛ kaa a garataga ogworozwo elele.

¹⁰Gabụ bɛ njɛ maa ma 'yaga ikɛnyi gana binemi; gabụ kaa bi n teri maa Ma sha inɛɛ bu.[77]

¹¹N kwụbwa tu'waŋtatangwụ ta atwa i'ime mi, Ngaa hwụjɛ kaa n'ungwa mo ogworozwo.

¹²Atwa tiririri zhɛ na saba gana ishiwɛ; ɛ zhɛ na waŋna gana osobu uwapa Lebanon.

¹³A shɛ gana i'wɛ'wɛ nɛ aa bɛrɛ nu umwono wa AGWANGWAMA, aa saba nu umwono wa Agwatana tu.

¹⁴I ta 'wala okwo ti yaa injɛ, aka elele i lemi, yaa 'yajɛ kaa ikɛnyi.

¹⁵Inɛ gɛ yo mbisono maa AGWANGWAMA namɛ ririri, maa orugwusu elele zasaba pu bwa na shɛ ijilɛni mi o.