Read bassa SHƐZUNGA TUZUNGANGANA AGWANGWAMA 94 Bible Online

SHƐZUNGA TUZUNGANGANA AGWANGWAMA 94 - bassa bible

SHƐZUNGA TUZUNGANGANA AGWANGWAMA 94

¹Oo AGWANGWAMA, gabụ bɛ shɛ Agwatana na shɛ bɛcɛpɛ bi itɛpwɛ, kɛpishinjɛ isɛbwɛ bu!

²Gabụ bɛ shɛ bɛjɛmɛ-bụ-ụshɛrɛya ba atwa kpaaŋ; ishijɛ maa peni atwa unyangana itɛpwɛ nɛ teni cɛŋ na aba.

³AGWANGWAMA, i ci ụkwụmbwụ gana naa ogworozwo zhɛ a busaa? I ci ụkwụmbwụ gana naa ɛɛ zhɛ a ganga unyasaa?

⁴I ci ụkwụmbwụ gana naa atwa ci'nyɛ zhɛ a nda unyangana keeni tubusa ti iyi ya aba i ci'nyɛɛ?

⁵Oo AGWANGWAMA, a kwụkwụtangana atwa bụ; aa nda atwa na shɛ a naa bụ umungwuta.

⁶A kwụna olulo keeni alashɛ, aa kwụna kaa du miaụŋ-me-e'weteji;

⁷ɛɛ hiɛŋ, AGWANGWAMA kaa ụtụ kwụbɛ shɛ; Agwatana atwa Isrɛl kaa peni shi abashɛ.

⁸Atwa mi, iwembe po ahiɛ shɛ shɛlagwụ ehi eshiciji shi iyii? Aka na kwuŋ ɛhi zhɛ hia intaa?

⁹Agwatana na njɛ acɛbɛ, bi eri shi suu ba hwuga iwɛ? Ubwa na njɛ eshe, bi eri shi suu ba kwụba uhwaŋna?

¹⁰Ubwa na ba ngbaraka edenji, bi zha shɛ suu ba pana aŋ ulwapɛ? Ubwa na bo mbisogono atwa elele iyi, bu zasa suu iyi-tumapa ye elele?

¹¹AGWANGWAMA mepi tuhaŋsa ta bụtụ, bee mepi kaa gana na ta tuhaŋsa ta aba tu na ti te shi eshe tɛ shɛ.

¹²Oo AGWANGWAMA, bụtụ na obo sokokono iwɛ gwoje, ubwa shɛ bụtụ ata na obo mbisogono undwa bụ!

¹³Gabụ bi peni bu ụhinjanụ na aka ba amɛ-tụhaŋtụ, uuwa i ci aka na ee hini ushapa maa u 'imɛ ogworozwo.

¹⁴AGWANGWAMA zha shɛ o jinoko kaa atwa ubwa kwukwuŋ; bi zha shɛ kaa ba 'waŋ atwa na shɛ a na ubwa o.

¹⁵Ụshɛrɛya u tishiriri tụdụma zhɛ we gwure sasana, nazhɛ atwa ata tiririri kpaaŋ zhɛ a 'wa uŋ.

¹⁶Gaaba zhɛ bɛ ishijɛ maa ma n sukakanana ogworozwoo? Gaaba zhɛ bo shikono geri mi maa kapana anjɛ iyi iwɛ uhwaŋnaa?

¹⁷Yaa shɛ AGWANGWAMA ge me mbiyeni shi, aga sha ohwulu mi hwulwo kakayɛ maa a nama ne e'uye.[78]

¹⁸Aka na Ngɛɛ hiɛŋ, Uvwɛvwɛjɛ mu wa sharumana, Oo AGWANGWAMA, gabụ bu n so no tulubo tụ bụ ti tikpeke maa Mo shikono.

¹⁹Aka na to ohwulu tuhoroko ufwugwo ma n zuga, ti'ingatanga tụ bụ tuba ta nda maa ohwulu mi kezhe.

²⁰Gabụ bi cimi shi iwɛ ajɛmɛ-ụshɛrɛya orugwusu, anaa na o shilo undwa na teni shi cɛŋ,

²¹a na a twatwagwụ-unu maa a sukakanɛ atwa tiririri, aa pana atwa na i'ɛlɛ ya aba zasa ni iwɛ n-ndumwa-tụwụma no tu'wo.

²²Ama AGWANGWAMA ubwa shɛ bikepi mi; Agwatana mi ubwa kaa shɛ ijilɛni mi.

²³Ubwa zhɛ ba pana aŋ ulwapɛ iwɛ tugworozwo ta aba, bi zhɛ kaa be iricingo aŋ iwɛ iwɛwɛ ya aba nɛ aa nda; AGWANGWAMA Agwatana tu zhɛ be iricingo aŋ.