Read bassa UTAKADAWE ESHI 1 Bible Online

UTAKADAWE ESHI 1 - bassa bible

UTAKADAWE ESHI 1

¹Eshi na go Sụlụmụn yɛu Devid agwuma Isrɛl sheji;

²maa atwa mepi ti'inta keeni tusokokono tu na oo sokokono aŋ iyi, maa bụtụ eshiciji du n-ndumwa mu tusweci.

³Maa o bu sokokono iyi nu uhwaŋna na teni cɛŋ ne tiririri, na tunama nu uhwaŋna tɛkana, keeni ụshɛrɛya u tishiriri tụdụma.

⁴Maa e mbisegeni bụtụ na ahaŋsa ci shi iyi pecee, maa yɛu nɛ ta waŋnɛ mepi iyi, maa ala du iyi tumanganga.

⁵Eshi ga eri a nda maa bụtụ ba ahaŋsa na hwụjɛ aŋ, na kaana iyi tusoso, maa bụtụ ba ahaŋsa na sha bugwoni,

⁶maa eshicigo eshi keeni n-ndumwa mu tusweci, maa mapa du n-ndumwa ma bụtụ bi ti'inta keeni mu na mu tumanganjɛ.

⁷AGWANGWAMA inyɛsɛ tụsụma, ibɛ shɛ tukwuno ti iyi-tumapa. Ama shɛlagwụ shɛ ngbaracɛ ahaŋsa keeni unu-tɛtɛtagana cwɛŋ bana.

⁸Ɛ-yɛu mi ye eyi, na hwuga-unu na bishi bu ma bụ tɛtagana, ta na laka kaa imbisegeni bino bu o.

⁹Ibɛ zhɛ ya sha ufworo na maa peteni nu uhiuhiu bu, keeni ikwɛmbɛ nɛ maa shana ni i'ilu bu, maa na zhɛma igbɛtɛtɛ.

¹⁰Ɛ-yɛu mi ye eyi, yaa shɛ atwa iwɛwɛ ma bu halakaka, to lono.

¹¹Yaa shɛ ɛɛ bi hiɛŋ, Hwure tu swaka ma; maa tu duduji ma mehieŋ ma bụtụ bu ko, kwo kaa hwure tu gwubogo ma bụtụ na zasa n-ndumwa-tụwụma!

¹²Ɛɛ hiɛŋ, Hwure tu tweri aŋ ma buumwa buumwa, gana u'uye, maa tɛ yɛ aŋ ma gana u'ibwa

¹³Maa tu gwusheji ma uduciya wo ogwumishi we elele na ata jala, maa to shidongo shimwono shi tu ni iyi nɛ atu lashajɛ na atwa!

¹⁴Togwu iyi nɛ abɛ 'yajɛ no tu, maa arɛta tu shɛ oko ni iyi elele.

¹⁵Ɛ-yɛu mi, to lono maa 'wa aŋ o, meme becinji na aba hwɛ hwɛɛ.

¹⁶Iwɛnɛ po a njɛ shɛ ti'insu ni iyi iwɛ tɛnda o, ama a nda tuba izɛlɛgwu ne mehieŋ tududwogo.

¹⁷I zasa ule maa tileneni ụnụnụ na aba jala ti'ima igwune tu baa bu ngbarakacɛ o.

¹⁸Ama atwa gana ata gwubegeji iwɛ mehieŋ mi ikɛnyi aba; e ubegeni, aa shɛka araiŋ ikɛnyi aba!

¹⁹Aka elele iyi tɛlashaga atwa na abwagara ya ya ohiuhiu atwa na a nda abwagara du. Iyi nɛ[1] ye teneni bụtụ be elele na ba nda abwagara ta.

²⁰Ti'inta ta kala n'ungwa no shonungwu, taa ugana taawụụ no ofwo udukwo,

²¹taa ugana taawụụ no odubo uba,[2] taa suyana atwa no ofwo na atwa sotulonu no odubo ụshɛpwụ.

²²Oo Ahiɛba atwa na hwuwi shi, aka naa ɛhi zhɛ hia ganga uhwuwishi hiiŋ? Ahiɛba anjɛ shɛsada, aka naa ɛhi zhɛ hia ganga shɛsada shi hiiŋ? Shɛlagwụ kaa sho imo iyi-tumapa.

²³Ahi ga pana abashɛ[3] nu uvwi na ɛɛ mɛ hi vwɛ, N ngɛ zhɛ ma hi bacɛnganɛ tuhaŋsa[4] ti mi. N ngɛ zhɛ ma nda maa hi mepi n-ndumwa mi mi.

²⁴N hi suyanɛ, hiɛ shɛlajɛ shɛ o, Ngaa hiɛ sakanɛ u'ala mu, hi shiri shi acɛbɛ maa hiɛ zhajɛ o.

²⁵Iwɛnɛ ahiɛ lacɛ ahaŋsa na Ngee hi peni, ahiɛ lacɛ du maa Ma hiɛ nangangana.

²⁶N zhɛ du ma hi hinga hwuŋ ilɛtu, na aka na ta abara-ne-ebe ihi vwuteni, Ngɛɛ zhɛ ma hi nda hwuŋ asada na aka na ti iyi ike mo hi holono,

²⁷ta aka na inyɛsɛ ihiɛ shɛ gana mpiala mụ 'wụtụ mu na ma sha bụtụ, ta aka na ebe ihi meni gana ujipo, ta aka na te tiriri keeni ụngwụ-tuhwuga ihiɛ namanɛ du.

²⁸Nazhɛ ɛhi zhɛ hi ma n suyana, ama N zha shɛ mɛ hi jishijɛ; hi zhɛ hi na ma dwalakaka maa Mo hi mbiyono, hi zha shɛ kaa hi ma n ta ugbe o.

²⁹Iwɛnɛ ehi to iyi-tumapa ni i'ime, ahiɛ lacɛ kaa maa hiɛ sụmɛ AGWANGWAMA inyɛsɛ.

³⁰Iwɛnɛ ehi leshiji shi ahaŋsa elele na Ngee hi peni, ahiɛ lacɛ kaa evwuri na Omo hi vwulo.

³¹Iwɛnɛ po iyi nɛ teni cɛŋ ni iyi nɛ ahia nda, ibɛ zhɛ me hi jitongono, iyi nɛ ahia nda ni ikɛnyi hiŋ kaa ibɛ zhɛ ma hi pana amɛ-tụhaŋtụ.

³²Ugwulwo ukwunyi wa atwa na hwuwi shi zhɛ wa kwụna aŋ, shɛlagwụ shi zhɛ shɛ mama kwụna iwɛnɛ tɛɛ hiɛŋ e meme gembi.

³³Ama bụtụ be elele na ba hwuga-unu mu, ubwa zhɛ ba banangana, bi zha shɛ kaa ba nda inyɛsɛ iwɛ iyi nɛ zhɛ ya gwụcɛnga bụ o.