Read bassa UTAKADAWE ESHI 12 Bible Online

UTAKADAWE ESHI 12 - bassa bible

UTAKADAWE ESHI 12

¹Bụtụ be elele na bo lubo evwuri na oo vwulo bu, asha ubwa ba jala iyi-tumapa. Ama bụtụ na bo imo uvwi na ɛɛ vwɛ bu, asha ahaŋsa ci shi bu o.

²AGWANGWAMA a mapana bụtụ bi biye iwɛ, ama ba pana tuba bụtụ na 'yajɛ tuhaŋsa tụ wɛ n-ndumwa-tụwụma.

³Tugworozwo ti shikicinji shi bụtụ o, ama bụtụ bi tiririri tuba zhɛ bo shikono dimi.

⁴Biyikwo bi biye ubwa shɛ ụjɛrụma bwolo bwa, ama biyikwo na ba nda bwolo bwa ezuye, bɛ shɛ gana ụngwụ wa asuswa na wo fwoshicingo o'umpwo bwolo bwa.

⁵Tuhaŋsa ta bụtụ bi tiririri, tɛ shɛ iyi ibiye, ama ahaŋsa na ugworozwo wa pana bụtụ a shɛ tuhalakaka.

⁶N-ndumwa mo ogworozwo mɛ shɛ iwɛ mehieŋ ma atwa tududwogo, ama n-ndumwa ma bụtụ bi tiririri mo bicingo atwa.

⁷Ogworozwo zhɛ a laya, a zha shɛ kaa a nama ya o, ama umwamwa wa atwa tiririri zhɛ wo shikono tutuu.

⁸A dumanga bụtụ te teni cɛŋ na ti'inta tu bwa ti biye, ama a ta tuba atwa ahaŋsa tibiribiri ni i'ime.

⁹I zhɛmɛ maa mama njɛ bụtụ bo ohondo maa 'yaga yɛu bu ugondu, uhwuri maa mama njɛ bụtụ bu ko bụ 'wụtụ na kaa zasa iyi maa ya.

¹⁰Bụtụ bi tiririri ba ima iyimabiga ubwa u'ala, ama iwɛ tumapa yo ogworozwo tuba i shɛ amiaụŋ.

¹¹Bụtụ na ba hwaŋ itimɛ, ubwa ba 'yaga iyimɛyɛ duwa, ama bụtụ na ba nda aka ubwa ufwu nu ugondu na te shi eshe, bụ lagwụmɛ.

¹²Iyi iwɛ kiri ogworozwo a jala tɛnda, ama tini ta atwa tiririri to shikono dimi.[37]

¹³N-ndumwa mu bụtụ na shɛ ugworozwo mo umpo bu ni ikɛnyi ibwɛ, ama atwa tiririri mama bacɛnga na amɛ-tụhaŋtụ.

¹⁴Iyi ibiye yo tomo bụtụ tedure nu n-ndumwa mu unu ubwa, ugondu na kaa bụtụ njɛ ni i'ɛlɛ ibwɛ we gwuricingeni bu titeni tu bwa.

¹⁵Iyi nɛ alagwụ a nda teneni bu cɛŋ ne eshe ubwa, ama bụtụ na incɛ bo shilo acɛbɛ ni iyi nɛ aa pana bu ahaŋsa ibɛ.

¹⁶Alagwụ a nda maa e mepi amɛ-tụhaŋtụ ubwa kakayɛ, ama bụtụ na incɛ 'wa sụ okwo iwɛ tutwa tu na aa twaga bu o.

¹⁷Bụtụ na ba duma iwɛ-tɛkana, ba la tiseyida tɛ tɛcara, ama bụtụ na ba la tiseyida tu tukata, ba halakaka atwa.

¹⁸N-ndumwa ma bụtụ na mbiyanɛ shɛ ekwunyi tu baa duma iwɛ, ma gwụcɛnga bụtụ gana utokwobi. Ama n-ndumwa ma bụtụ na incɛ, ma nɛnga bụtụ.

¹⁹N-ndumwa ma atwa na a duma iwɛ-tɛkana, mo shikono tutu unyizo-nom, ama n-ndumwa me ejwe-ụzagwụ mi ilegeji shi okwo cwɛŋ.

²⁰Atwa na a haŋsa iyi iwɛ a halakaka bụtụ, ama atwa na a imanganga iyi ibiye aba zhɛ a 'yaga unyasa.

²¹Iyi iwɛ zha shɛ no jitono atwa tiririri o, ama amɛ-tụhaŋtụ o jitono ogworozwo aka elele.

²²N-ndumwa me ejwe-ụzagwụ mi shanɛ AGWANGWAMA iyi-tupwaŋ, ama ba nda tuba unyasa na atwa na a nda iyi tɛcara.

²³Bụtụ na incɛ ba swaka iyi ibwɛ tumapa, ama shɛlagwụ[38] tuba sho shilo ụlagwụ wa aba nu ukpogwu caakwụ.

²⁴Bụtụ na ba nda ugondu ta 'yajɛ ikɛnyi, ubwa zhɛ ba ya tugwama, ama buruna zhɛ ba sha bujama na ɛɛ zhɛ na ana ugondu ni iji.

²⁵Tuzuga ta bacɛnga unyasa na amɛ bụtụ, ama n-ndumwa ma amɛ-olom ma hiɛcɛnga bụtụ u'waba.

²⁶Bụtụ bi tiririri bo mbisono binya bwa uhwaŋna ubiye, ama uhwaŋna na ogworozwo to, wa inzhɛnga aŋ.

²⁷Buruna eri shi ba 'yaga iyi nɛ kwụlanɛ bụ o, ama bụtụ na shanɛ ikɛnyi nu ugondu tɛnda, ubwa zhɛ ba sha bɛzhɛgba bụ 'wụtụ.

²⁸Tiririri ta shapa bụtụ nu uraiŋ, ama tugworozwo ta shapa bụtụ no tu'wo.