Read bassa UTAKADAWE ESHI 14 Bible Online

UTAKADAWE ESHI 14 - bassa bible

UTAKADAWE ESHI 14

¹Biyikwo na incɛ mo ihwɛ ibwɛ,[42] ama alagwụ tuba o hwuŋzotongo inɛ ibwɛ ni i'ɛlɛ ikɛnyi ibwɛ.

²Bụtụ na ba sụma AGWANGWAMA inyɛsɛ, ubwa du ba nda iyi ibwɛ ye elele te teni cɛŋ, ama bụtụ na ahaŋsa ubwa namɛ biribiri ba ngbaraka AGWANGWAMA cwɛŋ.

³N-ndumwa ma alagwụ mɛ shɛ gana udugwu na maa e swenenji bu na apindwa,[43] ama n-ndumwa ma atwa tiririri, ma lashaga aŋ tuba.

⁴Ofwo na inɛ zasaba, iyimɛyɛ zha shɛ ya nama o, ama tedure nu ukpahiŋ inɛ, ibɛ po iyimɛyɛ ya bala.

⁵Useyida tɛkana jwe shi ụzagwụ o, ama useyida tukata ubwa wa dwa-ụzagwụ.

⁶Bụtụ na mama sata ba dwalakaka ti'inta, bu gwushiji shi kaa okwo tu ko gba o, ama iyi-tumapa zasana bụtụ na eshiciji iyi iwɛ okwo cwɛŋ o.

⁷Ishɛga maa genji alagwụ, iwɛnɛ ti yaa zasa iyi elele nɛ n-ndumwa mu bwa mi zhɛ mo bu mbisogono.

⁸Bụtụ na incɛ ba halagaga iyi elele nɛ baa nda, ama tuhaŋsa ta shɛlagwụ tɛ shɛ iwɛ tuhalakaka kiri.

⁹Shɛlagwụ sha nda bụtụ na mama bacɛnga ni iwɛwɛ ibwɛ asada,[44] ama ya zhɛmana tuba atwa tiririri.

¹⁰Bụtụ be elele mepi aka na ta amɛ ubwa hashɛganụ, aka na kaa amɛ ubwa lemi, i zasa bụtụ be elele na eri bo dwotwogonu unyasa na baa 'yajɛ na amɛ ubwa nu bwa.

¹¹Ɛ zhɛ o hwuŋzo umwono ugworozwo, ama udulo ụ bụtụ bi tiririri tuba zhɛ na kaana ụzhɛ.

¹²I 'yajɛ uhwaŋna na ụ shɛ maa u teneni bụtụ cɛŋ, ama ukwunanga ubwa wa zarɛga bụtụ no tu'wo.[45]

¹³Okwo bụtụ 'yajɛ amɛ-tụhaŋtụ a'wụtụ, bi eri na hinga kaa ilɛtu waa. Ukwunanga unyasa kaa shɛ amɛ-tụhaŋtụ.

¹⁴Ɛ zhɛ a tụpa atwa tusashɛ te teni cɛŋ ni iyi nɛ aa nda hwɛɛ, ɛɛ zhɛ du kaa a tụpa atwa ebiye te teni cɛŋ ni iyi ibiye nɛ aa njɛ.[46]

¹⁵Bụtụ na hwuwi shi ba tɛtana iyi elele rishe, ama bụtụ na incɛ, ba yalaga tugwo iyi nazhɛ nda iŋ.

¹⁶Bụtụ na incɛ ba sụma AGWANGWAMA inyɛsɛ, ibɛ po boo gozhigono iyi iwɛ, ama alagwụ a nda iyi ni izɛlɛgwu iwɛnɛ ti iyi iwɛ tɛnda gwumanɛ shɛ bụ.

¹⁷Bụtụ na 'yajɛ isɛbwɛ, bo mbisono ụlagwụ ubwa caakwụ tedure ni iyi nɛ baa nda, ama bụtụ na incɛ ba ima-isɛbwɛ.[47]

¹⁸Iyi ụlagwụ kiri yo tomo bụtụ na hwuwi shi, ama iyi-tumapa tuba ibɛ shɛ ụjɛrụma ụ bụtụ na incɛ.

¹⁹Atwa awɛ zhɛ no kwuzono atwa ebiye, ogworozwo tuba zhɛ no kwuzo no shidubo sha atwa tiririri.

²⁰Okwo bukofwo ga 'yajɛ atwa, ɛ zhɛ o jinoko bu du hwɛɛ, ama bɛzhɛgba tuba ba 'yaga eyejilo ufwugwo.

²¹Bụtụ be elele na ba ngbaraka binya bwa cwɛŋ ba nda iwɛwɛ, ama bụtụ na ba mapana okofwo iwɛ, bu gwoje.

²²Shɛ ti'ina suu atwa na a imanganga iyi iwɛ inɛ? Ama atwa na meme zucinje keeni atwa tɛcara, aba a imanganga iyi ibiye.

²³Ụbaụta tɛnda nu ugondu 'yajɛ ule, ama bɛjɛjɛ kwakwa maa na dumanga n-ndumwa zhɛ ma bu shapɛrɛganɛ tukofwo.

²⁴Ụjɛrụma, ubwa shɛ tɛzhɛgba ta atwa na incɛ, ama a mapa alagwụ tedure na masha mu bwa.[48]

²⁵Bụtụ na ba la tiseyida tɛ tɛkana, bo bicingo atwa, ama bụtụ na ba la tiseyida tụ ụzagwụ, ba sanga atwa.

²⁶Bụtụ na ba sụma AGWANGWAMA inyɛsɛ, ohwulu ubwa namɛ oko, miaụŋ mu bwa du kaa mi zhɛ ma 'yaga ofwo tuswaka.

²⁷Uraiŋ tiya nambana atwa na a sụma AGWANGWAMA inyɛsɛ, yoo bicingo du bụtụ no modugwulo mo tu'wo.

²⁸Unyama wa atwa, ubwa shɛ ụjɛrụma wa agwuma, ama yaa shɛ unyama wa atwa zasaba, yɛu ya agwuma zha shɛ ya sụba iyi elele o.

²⁹Bụtụ na eshiciji iyi duwa njɛ shɛ isɛbwɛ kakayɛ o, ama bụtụ na ba nda izɛlɛgwu ni isɛbwɛ tɛnda, bo shilo ụlagwụ ubwa nu ukpogwu caakwụ.

³⁰Amɛ-olom na bụtụ 'yajɛ a pana tu'waba tu bwa ulapiya, ama isɛbwɛngwɛ i shɛ gana ụngwụ na wo fwoshicingo o'umpwo.

³¹Bụtụ na ba nda bukofwo tuhwulo, asha ba ngbaraka bụtụ na karɛ aŋ cwɛŋ, ama bụtụ be elele na ba mapana okofwo iwɛ, asha ubwa ba muna Agwatana ụjɛrụma.

³²Iyi nɛ ogworozwo a nda, ye zucinje aŋ, ama atwa tɛkana o gwushigo ofwo tuswaka tedure ne tiririri ta aba.[49]

³³Ti'inta tɛ jɛjɛ na amɛ bụtụ na eshiciji iyi, ama shɛlagwụ shi mepi shi[50] iyi nɛ ɛɛ hiɛŋ ti'inta o.

³⁴Tiririri to gombicingo udenji, ama iwɛwɛ tɛnda ya shapɛrɛganɛ atwa elele tutwa.

³⁵Amɛ agwuma o lomo ni yɛu-ugondu nɛ incɛ, ama ba nda tuba isɛbwɛ ni yɛu nɛ ya nda iyi nɛ ya shapɛ ezuye.