Read bassa UTAKADAWE ESHI 15 Bible Online

UTAKADAWE ESHI 15 - bassa bible

UTAKADAWE ESHI 15

¹Ajɛshɛgwa tipecee o gwurusono isɛbwɛ, ama tɛtazhɛganɛ tɛ ishicinjɛ isɛbwɛ bụtụ.

²N-ndumwa mu bụtụ na incɛ mo mbisogono bụtụ iyi-tumapa,[51] ama n-ndumwa ma shɛlagwụ mɛ vwɛ ụlagwụ wa aba caakwụ.

³Eshe AGWANGWAMA kwụbɛ ofwo elele hwɛɛ, aa ngbaracɛ kaa iyi elele nɛ ogworozwo a nda keeni atwa ebiye du.

⁴N-ndumwa mi tipecee mɛ shɛ gana ụ'wụ'wụ uraiŋ, ama n-ndumwa mu tuhalakaka mo sukwutogo ahaŋsa bụtụ.

⁵Alagwụ a laka iyi nɛ bishi bwa bo sokokono bu, ama bụtụ na incɛ ubwa bo lono maa e mbisegeni bu iyi nɛ teni cɛŋ.

⁶Atwa tiririri a intana uduciya wa aba, ama bino bu ukwuribi bo ogworozwo bɛ shɛ amɛ-tụhaŋtụ.

⁷N-ndumwa ma atwa na incɛ mo mburusonu iyi-tumapa, ama ahaŋsa shɛlagwụ shɛ shɛ gana ata o.

⁸Ụrụpɛ wo ogworozwo shanɛ AGWANGWAMA iyi-tupwaŋ, ama ba nda tuba unyasa na adua atwa tiririri.

⁹Uhwaŋna wo ogworozwo shanɛ AGWANGWAMA iyi-tupwaŋ, ama bo lubo tuba atwa na a jala iyi tiririri.

¹⁰Ɛ zhɛ o vwulo bụtụ be elele na keri uhwaŋna ubiye tebiye, ama bụtụ be elele na jeri shi maa e mbisegeni bu iyi nɛ baa njɛ, ubwa zhɛ bo 'wo.

¹¹Gana na tu nhwaŋ-me-e'uye mu swakanɛ shɛ AGWANGWAMA, asha shɛ amɛ butugwumwa eri a swakana bu ya o.

¹²Bụtụ na ba halakaka atwa, jeri shi maa ɛ vwɛ bu uvwi o, ubwa kaa zha shɛ ba zhagana bụtụ na incɛ uhwuri bu maa pana bu ahaŋsa o.

¹³Ụpɛshɛka bụtụ wo mbisono atwa amɛ-olom na baa 'yajɛ, ama amɛ-tụhaŋtụ na bụtụ 'yajɛ o sukwutogo ahaŋsa ubwa.

¹⁴Ahaŋsa bụtụ na eshiciji iyi a jalakaka iyi-tumapa, ama ụlagwụ kiri wa banɛ nu unu u shɛlagwụ.

¹⁵Iyi-heri ibɛ iyi ya wumana atwa na a nda anya aba umungwuta, ama bụtụ na ba uranga iyimɛyɛ unyasa tiya amɛ ubwa o lomo tutuu.

¹⁶I zhɛmɛ maa 'yaga iyi cwɛŋ maa na sụma AGWANGWAMA inyɛsɛ, uhwuri maa 'yaga uducinya duwa na amɛ-tụhaŋtụ.

¹⁷Shipa sha abuba tiya na amɛ-olom, shɛ zhɛmɛ uhwuri usunda buna na 'yajɛ manɛbɛ tiya na atwa i'ime.

¹⁸Bụtụ na ba nda isɛbwɛ duwa ba karɛ tubogwu, ama bụtụ na ba ima-isɛbwɛ ba karɛ amɛ-olom.

¹⁹Esepi aba a kapa uhwaŋna u buruna, ama ụlamụ ụ bụtụ bi tiririri wa sha ukpekiti u tukpotoo.

²⁰Yɛu nɛ incɛ yo lomicingo amɛ bishi bwa, ama alagwụ a ngbaraka bino bwa cwɛŋ.

²¹Atwa na ahaŋsa ci shi a nda unyasa ni iyi ụlagwụ wa aba, ama bụtụ na eshiciji iyi ba nda iyi nɛ teni cɛŋ aka elele.

²²Iyi nɛ aa imanganjɛ yo ngwulo tɛnda iwɛnɛ ee peni shi atwa ahaŋsa, ama yaa shɛ atwa na a pana atwa haŋsa gembi ufwugwo, i zhɛ ya 'yagana aŋ eshe.

²³Ajɛshɛgwa tụpana te teni cɛŋ a shɛ iyi unyasa, n-ndumwa tụdụma kaa na aka na teni cɛŋ, mɛ shɛ iyi ibiye tebiye.

²⁴Uhwaŋna ụ bụtụ bi tiririri, wo mungicingo bu maa tono nu uraiŋ, maa banangana tutono nu nhwaŋ-me-e'uye.

²⁵AGWANGWAMA o hwuŋzo umwono bụtụ na mama sata, ama ubwa tuba ba ngbarakana bululo cɛnjɛ tu bwa tutu uce tuba.

²⁶Tuhaŋsa to ogworozwo tɛ shanɛ AGWANGWAMA iyi-tupwaŋ, ama n-ndumwa ma atwa tụrụmbɛɛ mo lomicingo bu amɛ.[52]

²⁷Bụtụ be elele na bo dundo titeni to orugwusu, be sugeni ukpogwu ubwa amɛ-tụhaŋtụ, ama bụtụ na bo imo ukwuribi ugworo tulashɛga, ubwa zhɛ ba ya uraiŋ.

²⁸Bụtụ bi tiririri ba haŋsa tugwo ajɛshɛgwa na teni cɛŋ tụpana, ama unu ugworozwo wɛ bɛcinjɛ iyi iwɛ.

²⁹AGWANGWAMA dụlụmɛ no ogworozwo, ama bo shilo tuba acɛbɛ na adua atwa tiririri.

³⁰Igbɛtɛtɛ ya amɛ-olom yo shidingo unyasa na amɛ bụtụ; unabarɛ ubiye kaa wa kaana o'umpwo bụtụ ukpahiŋ.

³¹Bụtụ na bo shilo acɛbɛ ni iyi nɛ oo mbisogono bu te teni cɛŋ, ubwa zhɛ ba nama na ashashɛ atwa na incɛ.

³²Bụtụ be elele na ba ngbaraka iyi nɛ oo sokokono bu cwɛŋ, bu mama nda iwɛwɛ. Ama bụtụ be elele na ba lashɛga evwuri na oo vwulo bu, ubwa zhɛ bo eshicigo iyi.

³³Bụtụ na ba sụma AGWANGWAMA inyɛsɛ, ubwa zhɛ bo soso ti'inta, bụtụ na kaa meme zucinje nazhɛ bɛɛ zhɛ ba 'yaga ụjɛrụma.