Read bassa UTAKADAWE ESHI 19 Bible Online

UTAKADAWE ESHI 19 - bassa bible

UTAKADAWE ESHI 19

¹Bukofwo na zasa unu-tusapa ni iyi elele nɛ baa nda, zhɛmɛ bee hwuri alagwụ na a halakaka atwa nu n-ndumwa mu unu ubwa.

²I zhɛshɛ maa bụtụ nama uzawa iyi-tumapa o, bụtụ na kaa ivwunɛ ibwɛ hwuri izɛlɛgwu, bi le shi tu baa inzhɛnganɛ uhwaŋna o.

³Aka na tụ ụlagwụ wa atwa oko njɛ aŋ ufwu, nazhɛ o kwuno ya AGWANGWAMA unu-tusapa.

⁴Tɛzhɛgba te sugeni bụtụ eyejilo ofwo ufwugwo ama tukofwo tuba ta vwungɛcɛnga bụtụ okwo eyejilo ticwɛŋ na baa ga 'yagawa.

⁵Useyida tukata zha shɛ wa banangana ulwapɛ o, bikebi bụ ụzagwụ kaa zha shɛ ba banangana ugbe tɛta o.

⁶Bụtụ bụtụ ba jala maa ga bụtụ na ba mapana atwa iwɛ no lubo bu, bụtụ bụtụ kaa du ba jala maa ba sha biyejilo ba bụtụ na ba pana atwa apwaŋ.

⁷Yaa shɛ atwa na bukofwo ga 'yajɛ ụmatụ na aba jineci bu hwɛɛ, asha bi eri shi ba manga ya ụkwụmbwụ na eyejilo ubwa eri a dụlụma nu bwa o! Okwo bee urigeni aŋ ni ilupwɛ, a zha shɛ e gwure o.[58]

⁸Bụtụ na incɛ momo lubo, iyi kaa zhɛ na kaana bụtụ na be eshicigo iyi tɛzhɛmana duwa.

⁹Useyida tukata zha shɛ wa banangana ulwapɛ o, bikebi bụ ụzagwụ kaa zhɛ ba nda ufwu mbowuu.

¹⁰I teni shi cɛŋ maa iyi balana alagwụ o, gobwonu du yee teni shi cɛŋ maa bujama untangana ehiu cɛnjɛ.

¹¹Bụtụ na 'yajɛ ahaŋsa, njɛ shɛ izɛlɛgwu ni isɛbwɛ tɛnda o, gobwonu du yaa shanɛ bụ iyi ụjɛrụma tu baa 'wa sụ iwɛ iyi iwɛ nɛ atwa a nda bụ.

¹²Isɛbwɛ ya agwuma i shɛ gana bizeci na bo ngwulo, iwɛ ubwa tumapa kaa i shɛ gana cime tu na tu 'weri na ambɛ.

¹³Yɛu nɛ lagwụmɛ i shɛ ụlayɛ bishi bwa, uwuru biyikwo na shɛ bu'weji kaa ụ shɛ gana eshilo na uranjɛ tulayajɛ kɛtɛ kɛtɛ kɛtɛ.

¹⁴Shimwono keeni uduciya ụ shɛ ogwu na bụtụ ba ya no olugwo atwa na meci bu. Ama tuba AGWANGWAMA ubwa ba pana bụtụ biyikwo na incɛ.

¹⁵Uruna wa kala bụtụ malabụ mụ 'wụtụ, bụtụ na kaa jeri shi maa nda ugondu, ubwa zhɛ na ya-imunɛ.

¹⁶Bụtụ na ba untangana unu na Agwangwama a pana bụ, bo bicingo uraiŋ ubwa, ama bụtụ na ba ngbaraka uŋ cwɛŋ,[59] ubwa zhɛ bo 'wo.

¹⁷Bụtụ na ba nda bukofwo uwebiye, asha AGWANGWAMA baa unanga iyi, AGWANGWAMA kaa zhɛ a tụpa bụ iyi nɛ baa njɛ.

¹⁸No vwulo yɛu bu na aka na tu baa ta gwumwa, ti bɛɛ tɛ zhɛ ba hwuga iwɛ, yaa shɛ ebu vwuri shi bu, asha bo shishingono bu nu ufwu tɛnda.[60]

¹⁹Bụtụ na 'yajɛ isɛbwɛ duwa, ubwa du ɛɛ zhɛ a pana ulwapɛ ibɛ, yaa shɛ kaa ebi lesheji bu nu ulwapɛ ata kpalụ ko, asha bi zhɛ ba lashaganana bụ sasana.[61]

²⁰Na shɛlaga ahaŋsa na aa bu pana, no lono iyi nɛ oo bu sokokono iwɛ maa incɛ iwɛ geri-be-eshe.

²¹Okwo bụtụ ba imanganga iyi ifwugwo na ahaŋsa ubwa, ama AGWANGWAMA ubwa zhɛ a tala inɛɛ nɛ i shɛ ya 'yaga eshe.

²²Iyi nɛ aa jala no olugwo bụtụ, i shɛ bụtụ bɛ tɛcara tisha,[62] bukofwo kaa debeji bee hwuri bujwe-bụ-ụzagwụ.

²³AGWANGWAMA inyɛsɛ tụsụma, ya nda maa bụtụ yɛ urugbo duwa, bụtụ ata kaa zhɛ ba bana na amɛ-tụhaŋtụ, bɛɛ zhɛ ba ta ụhinjanụ suu, iyi iwɛ kaa zha shɛ ya zhaganɛ bụ o.

²⁴Bụtụ na uruna ubwa hwuleji, aka na bee keri u'ala ni ikwede, bi zha shɛ ba ala maa bwɛ uŋ ya maa shiyono nu unu ubwa o.

²⁵Swananga bụtụ tugbom iyi, nazhɛ bụtụ na hwuwi shi zhɛ bo soso iyi maa inta, nɛ bwɛ bụtụ na eshiciji shi iyi uvwi, nazhɛ bɛɛ zhɛ ba mapa iyi.

²⁶Yɛu nɛ njɛ abwagara ne bishi bwa, nɛ kaa becinji bino bwa, bɛ shɛ yɛu nɛ ya karɛ ezuye keeni tutwa ni ihwɛ.

²⁷Ɛ-yɛu mi,[63] yaa shɛ abu lacɛ iyi nɛ Omo bu sokokono, asha iyi-tumapa zhɛ ma bu inanga.

²⁸Useyida tugbom wa nda ụshɛrɛya u tishiriri asada, iyi iwɛwɛ kiri ugworozwo wa jala maa bu na duma nu unu ubwa.

²⁹N-ndumwa-tụwụma mu shilowo iwɛ atwa tugbom, ihwelupi kaa shilowo iwɛ shɛpindwa shɛ shɛlagwụ.