Read bassa UTAKADAWE ESHI 22 Bible Online

UTAKADAWE ESHI 22 - bassa bible

UTAKADAWE ESHI 22

¹Izeci ibiye ti'yaga uhwuri uduciya, ụjɛrụma tumuna kaa uhwuri azụrụfa keeni azhɛnarɛya.

²Ta bɛzhɛgba, to bukofwo, o sotulonu urubwo uko, AGWANGWAMA kaa karɛ aŋ hwɛɛ aba.

³Yaa shɛ bụtụ na incɛ kwụbɛ iyi nɛ ya kwụna bụtụ, bi zhɛ ba swaka, ama bụtụ na hwuwi shi tuba zhɛ na sala iŋ uuwa ya nda bụ ufwu.

⁴Titeni te timeme zucinje keeni inyɛsɛ tụsụma AGWANGWAMA i shɛ: tɛzhɛgba, nụ ụjɛrụma tumuna keeni uraiŋ.

⁵Iyi nɛ ogworozwo a nda, ya 'wananɛ aŋ ụngwụ-tu'ala na shɛ gana modugwulo keeni esepi, ama i zha shɛ tuba yo gwumwongonu na bụtụ na momo shiyono eshe o.

⁶Mbisogono yɛu bu iyi nɛ teni cɛŋ tɛnda tu baa ta gwumwa, okwo baa injɛ hwuŋ bi zha shɛ ba kala iŋ o.

⁷Okofwo aba shɛ ajama azhɛgba, atwa na unɛ bụtụ iyi, aba shɛ ajama atwa ata unanjɛ aŋ ijɛ ɛtɛ.

⁸Amɛ-tụhaŋtụ zhɛ o jitono bụtụ na ba bila tugworozwo, yaa shɛ baa nda atwa vwɛ umungwuta, bi zhɛ ba nda ufwu.

⁹I zhɛ ya zhɛmana bụtụ na lemi-amɛ, iwɛnɛ tu boo dwotwogonu iyimɛyɛ ibwɛ no okofwo.

¹⁰Bacɛnga bụtụ ba asada, nazhɛ uwuru, ni ifelu keeni tutwa ti zhɛ to hwuwowu apata.

¹¹Bụtụ na amɛ ubwa namɛ rụmbɛɛ aka elele, na kaa ba duma n-ndumwa ma amɛ-olom, ubwa zhɛ ba sha biyejilo ba agwuma.

¹²AGWANGWAMA o shiyono atwa na mepi iyi eshe, ama ba haŋnɛcɛngana tuba atwa na shɛ shɛ atwa tɛcara rishe.

¹³Buruna jɛjɛ ni ihwɛ ibwɛ, bɛɛ hiɛŋ, Bizeci namba no tupohondo, yaa shɛ Ngee beni hwayɛ, bi zhɛ ma n kwụna.

¹⁴N-ndumwa mo biyikwo ata bo ogbototu mɛ shɛ gana ushapa na iri, ama bụtụ na AGWANGWAMA a nda isɛbwɛ nu bwa, ubwa zhɛ ba laya nu bwa.

¹⁵Ụlagwụ shini na amɛ yɛu, ama bidingbengbere be evwuri, ubwa ba bacɛnga uŋ taa dụlụ nu bwa.

¹⁶Bụtụ na ba nda okofwo umungwuta maa bu na kaana uduciya ubwa ugombo, ta bụtụ na ba pana azhɛgba apwaŋ, ɛ zhɛ a sha hwuŋ okofwo hwɛɛ aba.

¹⁷Shilo ụcɛbɛ maa hwụjɛ iyi nɛ bụtụ bi ti'inta jɛmɛ. No shiyono iyi nɛ Omo bu mbisogono eshe.

¹⁸Yaa shɛ aba intana iŋ na amɛ bụ, aba duma iŋ kpaaŋ nu unu bu, nazhɛ yɛɛ zhɛ ma bụ zhɛmana.

¹⁹Gabụ gom Omo mbisogono hwayɛ ga maa, ga shɛ AGWANGWAMA aba patana-rishe.

²⁰N te bi 'nyeteni shi suu iyi talacɛ nɛ Ngaa jɛmɛ iwɛ iyi-tumapa keeni ahaŋsa ebiye tụpana?

²¹Mo bu mbisono iyi nɛ teni cɛŋ keeni inɛɛ nɛ shɛ iwɛ-tɛkana, iwɛ maa peni atwa na ubu tumwanɛ utumwa ajɛshɛgwa tɛkana.

²²Ta nda bukofwo orugwusu iwɛnɛ tu baa zasa iyi o, ta pana kaa bụtụ n-ndumwa-tụwụma nụ ụshɛrɛya tụdụma iwɛnɛ tu ba shɛ bukofwo.

²³AGWANGWAMA ubwa zhɛ ba dumangana aŋ ụshɛrɛya, ubwa du kaa zhɛ ba lashaga i'wɛŋnɛ ya atwa elele na lesheji aŋ la iyi.

²⁴Ta ya tiyejilo na bụtụ na 'yajɛ isɛbwɛ o, to momo togotogwu kaa du na bụtụ na isɛbwɛ ibwɛ leshi iwɛ ti'ishijɛ o,

²⁵iwɛ aka na ɛbi zhɛ bo sugo masha mu bwa, maa meme shiyeni na tijama.

²⁶To momo shiyono ufwafwa maa shɛ bile-bi-i'ɛlɛ ba atwa na a ya atashɛ o.

²⁷Yaa shɛ abu zasa iyi maa cɛpɛ hwuŋ utashɛ ata, ɛ zhɛ a shapa okwo ogodo bu na obo woto.

²⁸To mushingo useyida tugwungwu ta cɛnjɛ na ogwunukwoshi bu shikicinji la cala o.

²⁹Bu kwụbwa suu bụtụ na shɛ bugwoni nu ugondu ubwa? Ubwa zhɛ bo shikono na agba agwuma maa ndana bụ ugondu. Bi zha shɛ kaa ba ndana atwa na a nda iyi ne tusweci ugondu o.