Read bassa UTAKADAWE ESHI 24 Bible Online

UTAKADAWE ESHI 24 - bassa bible

UTAKADAWE ESHI 24

¹Ta na ta atwa awɛ ni i'ime o, ama kede iwɛ tunama na ashashɛ aba ubu kwụlanɛ du o.

²Iwɛnɛ po iwɛ abwagara kiri aa haŋsa aka elele, a bizhanjɛ uwuru nu n-ndumwa ma aba.

³O shilo ukoshilo umwono ni iyi ti'eshicigo, ama na ti'inta tuba aa ma uŋ.

⁴Ni iyi-tumapa oo shidingo uduciya wo ogwumishi nu umwono, keeni iyi elele nɛ yo lomicingo bụtụ amɛ.

⁵Ti'inta tu hwuri bụtụ na 'yajɛ ukpahiŋ duwa,[73] gobwonu du iyi-tumapa hwuri bụtụ na 'yajɛ ikɛnyi.

⁶Bɛ shɛ ba imanganga iyi tebiye nazhɛ kwuni ujasa, bɛ shɛ kaa ba 'yaga atwa ufwugwo na ma bu pana ahaŋsa nazhɛ ɛbi zhɛ ba lasụ nu ujasa ata.

⁷Ti'inta tu hwulegeni alagwụ ugombo maa eshicigo, okwo atwa ụlwatagwụ no odubo ụshɛpwụ maa a jɛmɛ ụshɛrɛya, ubwa ata zha shɛ bo gwushigo iwɛ maa duma o.

⁸Bụtụ be elele na ba imanganga iyi iwɛ tɛnda aka elele, ɛ zhɛ ɛ hiɛŋ izeci ibwɛ ge Bitileni-bu-uwuru.

⁹Ti'imanganga ta atwa awɛ tɛ shɛ iwɛwɛ, bụtụ ba asada kaa shanɛ atwa iyi-tupwaŋ.

¹⁰Yaa shɛ aba zhɛgɛda na aka bi ifelu, asha ukpahiŋ ubu 'nyananɛ ga gom.

¹¹Nda maa lashajɛ atwa na ee suji no ofwo na ɛ zhɛ a kwụna aŋ, maa gwuricinje atwa ata a sala ofwo na ɛɛ zhɛ a shɛla aŋ.

¹²Yaa shɛ ɛbi hiɛŋ, Ti mepi shi iwɛ ijɛ o, asha bụtụ ata ba manga ahaŋsa bụtụ suu kwụbɛ shɛ iŋ? Okwo bụtụ ata ba ngbaraka uraiŋ bụ suu mepi shi iŋ? Shɛ ubwa suu zhɛ ba tụpa bụtụ bụtụ te teni cɛŋ gana na ta bụtụ bụtụ njɛ?

¹³Ɛ-yɛu mi, na ya iswɛ, iwɛnɛ ti yaa zhɛmɛ, abu hwunganɛ meni ma ata me ngbenji na azanga, mi zhɛ ma bu latụmana.

¹⁴Mapa du maa gobwonu ti'inta tụ bụ zhɛmanɛ, yaa shɛ abɛ incɛ, bi zhɛ ba 'yaga ashɛlatụ iwɛ geri-be-eshe. Ashɛlatụ ata bụ kaa za tungwulo.

¹⁵To no gwubogo bụtụ gana na tu ugworozwo wa sukakana ihwɛ bụtụ bi tiririri o, ta tafwulaga kaa ihwɛ ibwɛ na abwagara o.

¹⁶Okwo bụtụ bi tiririri leyi kpalụ cenje, bi tɛ zhɛ bɛ ishijɛ waa, ama usu ugworozwo wa kalagaga bu uzawa u'ishɛgwa.

¹⁷Ta nda unyasa te tiriri ti jiteni bụtụ bụ bi i'ime o, kede kaa du amɛ bu lemi na aka na tu baa twa udukwutwa o.

¹⁸Iwɛ aka na AGWANGWAMA zhɛ a kwụba iŋ amɛ ubwa zhɛ a hashɛganụ, bɛɛ zhɛ ba pashɛnga ya isɛbwɛ ibwɛ nu uhiuhiu ubwa.

¹⁹Kede ohwulu ubu horukono iwɛ atwa na a nda iyi iwɛ o, ta nda kaa du isɛbwɛngwɛ no ogworozwo.

²⁰Iwɛnɛ po ugworozwo zasa ashɛlatụ iwɛ geri-be-eshe, bu zasa kaa du igbɛtɛtɛ geri-be-eshe ya o.

²¹Ɛ-yɛu mi, na sụma AGWANGWAMA inyɛsɛ keeni agwuma, ta na laka unu wa aba tuhwuga o.[74]

²²Iwɛnɛ po Abara-ne-ebe eri o jitono aŋ eshigiri hwɛɛ aba ebe yebi, ama gaaba kaa mepi iyiri ti'iricingo tu na e eri a 'waŋnanɛ bụtụụ?

²³Iyi nɛ bụtụ bi ti'inta dumananɛ na, bi hiɛŋ, I zhɛshɛ maa bɛjɛmɛ-bụ-ụshɛrɛya na zanga atwa nụ ụshɛrɛya tụdụma o.

²⁴Bụtụ be elele na peni bụtụ na n-ndumwa ga wụmɛ n-ndumwa zhɛ, atwa vwɛ zhɛ a kalana bu unu. Anya edenji kaa zhɛ a nda inyizhi ubwa.

²⁵Ama i zhɛ ya zhɛmana atwa na a tazhɛganɛ ugworozwo. Ɛ zhɛ kaa a pana aŋ uwebiye i'wɛtwɛ.

²⁶Ajɛshɛgwa ebiye a shɛ gana turuwanɛ tu unyasa.

²⁷Hwuwo tugwo ugondu na abu 'yajɛ nu ukpogwu keeni unaa na namɛ ne ehilo bu, nazhɛ kwuni ya umwono bu tuma.

²⁸Ta shana uyebi bu iwɛ gadaga o, ta na halakaka kaa du bụtụ o.

²⁹Tɛ hiɛŋ, N zhɛ ma nda bu du gana na baa n njɛ o, kwo kaa N zhɛ ma tụpana bu iyi nɛ baa n njɛ o!

³⁰N duri itimɛ buruna, keeni itimɛ bụtụ na ahaŋsa 'nyananɛ,

³¹Ngaa kwụbɛ te esepi leshegeji iŋ, yee unci tebiye, uba ibɛ wa atayɛ hwuŋzotongwu ni ibɛ hwɛɛ.

³²Aka na tu Ngaa kwụbɛ iŋ, Ama haŋsa iwɛ ibɛ, ibɛ po yoo n sokokono iwɛ, yɛɛ hiɛŋ,

³³Malabụ tuwoto cwɛŋ, no ozhilwo tuta cwɛŋ, ni i'ɛlɛ tishana na agba maa to ụhinjanụ cwɛŋ,

³⁴gobwonu du tukofwo ti zhɛ ta bu zhaganɛ gana bɛshɛrɛ, ibɛ ukekeshi iyi zhɛ mo bu kwuno tuta gana bijeshi.[75]