Read bassa UTAKADAWE ESHI 25 Bible Online

UTAKADAWE ESHI 25 - bassa bible

UTAKADAWE ESHI 25

¹Eshi anya a na go Sụlụmụn sheji anaa na atwa Hɛzɛkia agwuma Juda zweji.

²Iyi ti'intana i shɛ ụjɛrụma wa Agwatana, iyi tudwalakaka kaa i shɛ ụjɛrụma u shɛgwuma.

³Gana na ta tụla tụ dụlụmɛ, cɛnjɛ kaa du ti iri, gobwonu du bụtụ eri shi ba dwalakaka shɛhaŋsa shɛ shɛgwuma maa mepi iyi nɛ aa haŋsa.

⁴Yaa shɛ ee becinji tiri na azụrụfa, nazhɛ bụlụma ba aba zhɛ ba nda iyi uhwugwa nɛ 'yajɛ ụjɛrụma na aba tebiye.

⁵Gobwonu du yaa shɛ ee becinji ogworozwo na agba agwuma nazhɛ idwɛtwɛ cɛnjɛ-ta-tugwama ta agwuma ata zhɛ yo shikono ne tiririri.

⁶To no momo gombicingo na agba agwuma o, ta na mama pana kaa ohwolu a tandụ na ashashɛ atwa a'wụtụ o.

⁷I zhɛmɛ maa ga i shɛ ubwa bi hiɛŋ, Munje epe, uhwuri maa mo bu zucingo ne eshe bụtụ ata bụ ụjɛrụma.

⁸Ta nda izɛlɛgwu nu umwono-ụshɛrɛya tizha o, iwɛ aka na[76] binya bu zhɛ ma bu pana hwayɛ ezuye, abu zha shɛ kaa ba mapa ya iyi nɛ maa njɛ.

⁹Yaa shɛ abi 'yajɛ ashamanjɛ na binya bụ, kwunanga aŋ ma ehie yebi. Ta na nda maa vwɛ iyi tusweci binya bụtụ uvwi o.

¹⁰Iwɛ aka na bụtụ be elele na hwụjɛ iŋ, zhɛ ba mapa ya maa bi eri shi ba intana iyi tusweci o, nazhɛ yɛɛ zhɛ ya pana izeci bu ezuye na zasa uce.

¹¹N-ndumwa mi biye mu na bụtụ jɛmɛ na aka muba, mɛ shɛ gana azụrụfa na ee hiŋtetenji na azhɛnarɛya.

¹²Unu na bụtụ na incɛ ba tɛtagana bụtụ na yaa kwụlanɛ maa shɛlaga, uhwuri atakwụ kwo kaa i'wɛŋnɛ tisemberi nɛ aa njɛ na azhɛnarɛya tụrụmbɛɛ.

¹³Butumwa bɛ tɛcara na ba hiɛcɛnga agwuma-ihwɛ ibwɛ u'waba, bɛ shɛ gana meni mu na mu gwuriseni suu na aka bu ugbofworo na oo gwubo iyimɛyɛ.

¹⁴Bụtụ na ba duma ishɛkɛ na kaa peni shi bụtụ upwaŋ, bɛ shɛ gana udomu keeni uvwugo na zasa eshilo.

¹⁵Ni isɛbwɛ-ti'ima aa kwusa isɛbwɛ ya agwuma, n-ndumwa mi tipece kaa mi eri ma lasụ isɛbwɛ i'wɛtwɛ nɛ bụtụ na shɛ uhiu ga 'yajɛ na bụtụ.

¹⁶Yaa shɛ abu kwụbɛ iswɛ, ya iŋ ta bu gwumwa, shibwonu yee bu hwuleji bi zhɛ ba gbaga.

¹⁷Ta na zhagana binya bụ ɛgbɛ ɛgbɛɛ o, shibwonu bi zhɛ bo shingo bu, nazhɛ bɛɛ zhɛ ma bu ta ya ni i'ime.

¹⁸Bụtụ na ba la binya bwa tiseyida tu tukata, bɛ shɛ gana ụtagwụ, kwo kaa utokwobi, kwo kaa i'ilɛ nɛ aa lụbɛ tebiye.

¹⁹Bụtụ na te shi eshe tudatana ti iwɛ tandụ ubu vwuteni, bɛ shɛ gana bụtụ na bo cwomwo iyi ne rine ru na ra gwuma kwo kaa tahaŋnụ tizha nu uvwuna na dwonu.

²⁰Bụtụ na ba zungangana bụtụ na amɛ ubwa hashɛganụ azunga, bɛ shɛ gana bụtụ na ushiji utogwo ubwa nụ ụjita na mpiala ma kwụna bụtụ, kwo kaa gana bụtụ na zhizhenji undala ubwa meni mi ilemi.

²¹Yaa shɛ imunɛ ya kwụna bụtụ bi i'ime bu, pana bu iyimɛyɛ maa ya, yaa shɛ kaa i'uyɛ iri bu, pana bu meni maa swa.

²²Nazhɛ ezuye zhɛ no hwoŋzhongo bu gana maa akanga ulwa obo zwogono bu nu uhiuhiu. AGWANGWAMA kaa zhɛ ma bu pana titeni ti ibɛ.

²³Gana na tu uvwugo na wa banɛ tuzuba wa 'waŋnɛ eshilo, gobwonu du bụtụ bu tusharuwa ba bila uwuru.

²⁴I debeji maa data na apanya umwono, uhwuri maa hi gbodongonu umwono uko tuzwono ahiɛbana ne biyekwo na shɛ bu'weji.

²⁵Unabarɛ ubiye na banɛ taa dụlụ ụ shɛ gana meni mu na mi lemi suu mu na ma kwusa i'uyɛ.

²⁶Bụtụ bi tiririri na ba pana ugworozwo ohwolu maa nda tugworozwo, bɛ shɛ gana umɛzhinjɛ kwo kaa gana u'ibwa meni na 'yajɛ udwodwo kwo kaa ukwara.

²⁷I zhɛshɛ maa bụtụ na ya iswɛ te hwuleji bu o, gobwonu du yaa zhɛshɛ maa bụtụ na dwalakaka ụjɛrụma binya bwa.[77]

²⁸Bụtụ na mama zasa bɛ shɛ gana ụshɛpwụ na uba ubwa hwuŋzwotongwu, na kaa zasa ya ubwukoto na shikeni kwukwuŋ.