Read bassa UTAKADAWE ESHI 26 Bible Online

UTAKADAWE ESHI 26 - bassa bible

UTAKADAWE ESHI 26

¹Gana na tulomu keeni eshilo zhɛshɛ nu uvwaza na atwa o gwubo iyimɛyɛ, gobwonu du alagwụ lanɛ shɛ nu ụjɛrụma tumuna.

²Gana na tu ụcaarụ keeni ugagale wa nda apiambɛ aba ta a hila, gobwonu du unu-tukalana na teni shi cɛŋ eri shi wa ima bụtụ na njɛ shɛ iyi nɛ maa unu-tukalana 'imɛ bụ.

³Gana na unaba ụ shɛ iwɛ budakwa, keeni gana na arɛta unu a shɛ iwɛ izhinyɛci, gobwonu du bukwuto shɛ iwɛ alagwụ tudubo na apindwa.

⁴Ta pana alagwụ ajɛshɛgwa na teni cɛŋ nụ ụlagwụ ubwa o, iwɛ aka na ɛbi zhɛ ba sha gana bwa du.

⁵Yaa shɛ ebi peni shi alagwụ ajɛshɛgwa te teni cɛŋ nụ ụlagwụ ubwa, bi zhɛ ba haŋsa maa ubwa incɛ ne eshe ubwa.

⁶Bụtụ na ba tumwana alagwụ utumwa, bɛ shɛ gana bụtụ na ivwunɛ ibwɛ jajagwụ, na kaa meme sugeni amɛ-tụhaŋtụ a'wụtụ.

⁷Eshi na alagwụ o sho a shɛ gana ugwurukwu na ivwunɛ ibwɛ ci shi cɛnjɛ.

⁸Bụtụ na ba muna alagwụ ụjɛrụma, bɛ shɛ gana bụtụ na bo umpo utayɛ ni ikwele.

⁹Eshi na alagwụ o sho a shɛ gana buswe-bu-mayaga na buka sepi nu u'ala.

¹⁰Ugondu ụụgwụ tu'ana alagwụ na a kashɛka kwo kaa bụtụ na mayaga mi iri,[78] i shɛ gana bikeri bi i'ilɛ na hwuri u'ala na bụtụ.

¹¹Alagwụ na a uranga ụlagwụ ubwa tuhwungbo, bụ sụbɛ uwɛwɛ nɛ gwuleneni maa swa tugba tu na bee ge gbeji.

¹²Okwo alagwụ debeji bee hwuri bụtụ na heŋshi maa ti'inta tu bwa ti ikɛnyi ibwɛ kiri ti gembi bu.

¹³Buruna bɛ hiɛŋ, Bizeci namba nu uhwaŋna! Bizeci bu mazhanga bo ngwulo ba ni ihwɛŋnɛ ụshɛpwụ.

¹⁴Gana na ta a kapɛshɛnga ukpa aa kapanana, gobwonu du buruna momo bitorogo no ogodo ubwa.

¹⁵Buruna keri u'ala ni ikwede, bi eri shi bɛ vwɛ uŋ ya maa shiyono uŋ nu unu ubwa o.

¹⁶Buruna heŋshi maa bɛ incɛ bee hwuri atwa ecenje a na a pana bụtụ ajɛshɛgwa na teni cɛŋ.

¹⁷Bụtụ na bo tono uwuru na shɛ shɛ una ubwa, bɛ shɛ gana bụtụ na 'imɛ uwɛwɛ nɛ ya kashɛka kwakwa shɛcɛbɛ.

¹⁸Bụtụ na ba halakaka uyebi ubwa, na heŋshi maa tụlagwụ kwakwa baa nda, nu bwa,

¹⁹bɛ shɛ gana bụsụmɛ-bụ-ụmpɛ na ba 'waŋ ulwa u tuvwuto kwo kaa a'inla mangayɛ.

²⁰Yaa shɛ i'wɛ'wɛ zasaba nu ulwa, ulwa ata zhɛ wo 'wogo, gobwonu du yaa shɛ tisharuwa tu zasaba, uwuru zhɛ wa gwumwa.

²¹Gana na ti ilile keeni ụ'wụ'wụ wa ta unu nu ulwa, gobwonu du bu'weji bo tulono uwuru.

²²N-ndumwa ma bụtụ bu tuzwamɛ mɛ shɛ gana owuŋzu iyimɛyɛ nɛ yo tonongo bụtụ taa na tu'waba.

²³Bụtụ na ba duma n-ndumwa mu unu-ụlatụ, na ma banɛ na amɛ ugworozwo, mɛ shɛ gana ikwɛshɛ nɛ ee shidinji[79] ne tiri tu na aa hwajɛ na azụrụfa.

²⁴Bụtụ na bo imo bụtụ, bu mama intana nu n-ndumwa mu unu ubwa, tuhalakaka kaa ti shini nu unu ubwa.

²⁵Okwo baa duma n-ndumwa mi biye, ta tɛtana bụ rishe o, iwɛnɛ ti iyi-tupwaŋ icenje shini na amɛ ubwa.

²⁶Bi eri ba intana i'ime keeni tuhalakaka na amɛ ubwa, ama iyi tugworozwo tu bwa tu na baa nda zhɛ yɛ bɛcinjɛ iŋ nu ukpogwu caakwụ.

²⁷Bụtụ na bo hinongo binya bwa ushapa, ubwa kaa zhɛ ba layanana nu bwa. Bụtụ na kaa bo tulonono anya ubwa usharamu maa e sherimeni, ubwa zhɛ ba sharumana ba layanana.

²⁸Bujwe-bụ-ụzagwụ ba gwụcanga atwa na boo imo nụ ụzagwụ ubwa tudwatwaga, ugondu ụ bụtụ bu unu-ụlatụ kaa ụ shɛ ofwo tuhwuŋzotongo.