Read bassa UTAKADAWE ESHI 28 Bible Online

UTAKADAWE ESHI 28 - bassa bible

UTAKADAWE ESHI 28

¹Ugworozwo zhɛ no gozhigo asha i zasa kaa bụtụ be elele urigeni bu o, ama bụtụ bi tiririri tuba inshi ohwulu gana bizeci.

²Aka na te ehiu gembi ufwugwo na cɛnjɛ, ibɛ po undwa tubwada wa nama na cɛnjɛ ta ata, ama aka na ta bụtụ na eshiciji iyi, na kaa mepi iyi untanganɛ undwa, nazhɛ cɛnjɛ ta ata ti zhɛ to shikono tebiye.

³Buhwuri-bu-umbe na ba nda bukofwo umungwuta, bɛ shɛ gana eshilo usagba na weŋpeni shi iyimɛyɛ ye elele.

⁴Atwa na o jinoko undwa, aba kiri a dumanga ogworozwo, ama atwa na a hwuga-unu undwa, aba o imo ogworozwo.

⁵Atwa awɛ eshiciji shi ụshɛrɛya u tishiriri o, ama atwa na 'wa AGWANGWAMA, eshiciji uŋ hwɛ hwɛɛ.

⁶Bukofwo na zasa unu-tusapa debeji bee hwuri bɛzhɛgba na shɛ shɛ bụtụ bu tɛkana.

⁷Yɛu nɛ ya hwuga-unu undwa incɛ, ama bụtụ na momo togotogwu na atwa tusashɛ ba pana bishi bwa ụpụrụsa.

⁸Bụtụ na ba kaana uduciya ubwa ugombo ni i'wɛŋnɛ ibwɛ tusangana atwa ta zhanjɛ, asha binya bụtụ na zhɛ no hioko inyɛmɛnyɛmɛ yo okofwo ubwa boo sutonono uduciya ata ubwa.

⁹Bụtụ na hwụjɛ shɛ unu undwa, adua ubwa du shanɛ AGWANGWAMA iyi-tupwaŋ.

¹⁰Bụtụ be elele na ba zarɛga bụtụ bi tiririri nu uhwaŋna ụwɛ, bi zhɛ bo tono du na tijama ti ikɛnyi ibwɛ. Ama atwa na zasa unu-tusapa, aba zhɛ a ya ogwu na zhɛmɛ tebiye.

¹¹Bɛzhɛgba na heŋshi maa ubwa incɛ ne eshe ubwa, ama bukofwo na eshiciji iyi tuba zhɛ ba ta ti'inta ta ata tu bwa ugbe.

¹²Aka na ta bụtụ bi tiririri yɛ tugwama, atwa elele a nda unyasa, ama aka na tu ugworozwo yɛ tugwama, atwa zhɛ na mama intangana.

¹³I zha shɛ ya zhɛmana bụtụ na bo urogono iwɛwɛ ibwɛ o, ama ɛ zhɛ o hioko inyɛmɛnyɛmɛ bụtụ na leni-unu iwɛwɛ ibwɛ, na kaa genji iŋ ya tɛnda.

¹⁴Bụtụ na ba sụma AGWANGWAMA inyɛsɛ aka elele gwoje, ama ebe zhɛ a mana bụtụ na ba ta amɛ ubwa tɛshɛshɛpana.

¹⁵Ugworozwo na shɛ agwuma atwa na mama zasa, bɛ shɛ gana bizeci na bo ngwulo kwo kaa gana ucwee na wa nda isɛbwɛ.

¹⁶Agwuma na zasa inyɛmɛnyɛmɛ ya atwa, eshiciji shi iyi elele o, ama bụtụ na bo imo titeni to orugwusu, bi zhɛ ba ya urugbo te ilegeji.

¹⁷Bụtụ be elele na shɛ bụkwụnɛ-ba-atwa, n-ndumwa mụ wụmɛ bụ, bi zhɛ ba sha birinji tutu tu'wo tu bwa, kede bụtụ be elele kaa mbiyeni bu o.

¹⁸Bụtụ na zasa unu-tusapa zhɛ ba banangana tijama, ama bụtụ na ba nda iyi ne tibiribiri, zhɛ bo tono tijama[82] eshigiri.

¹⁹Bụtụ na ba hwaŋ itimɛ na cɛnjɛ tu bwa, zhɛ ba 'yaga iyimɛyɛ duwa, ama bụtụ na momo togwu na atwa tusashɛ zhɛ ba sha bukofwo tebiye.

²⁰Ɛ zhɛ na pana atwa tɛcara uwebiye duwa, ama bụtụ na ba nda izɛlɛgwu maa sha bɛzhɛgba, ɛ zhɛ a pana bụ ulwapɛ tilɛɛ.

²¹Atwa tuzanga nụ ụshɛrɛya zhɛshɛ o, ama atwa oko kaa a nda iyi iwɛ, iwɛ iyimɛyɛ nɛ twa sụ aŋ.

²²Bụtụ na 'yajɛ ukwedeyi, ba nda izɛlɛgwu maa sha bɛzhɛgba, ama bi mepi shi maa tukofwo ti 'yacɛ bu ba geri-be-eshe o.

²³Ɛ zhɛ o hioko inyɛmɛnyɛmɛ bụtụ na ba tazhɛganɛ bụtụ, uhwuri bụtụ na ba dumanga unu-ụlatụ kwakwa.

²⁴Bụtụ na ba nda bishi bwa no bino bwa orugwusu, bɛɛ hiɛŋ, Shɛ iwɛwɛ yaa shɛ o, bu nangwụ na atwa na a nda ofwo ufwu.

²⁵Bɛnjɛ ba acɛjɛla ba bila uwuru, ama i zhɛ ya zhɛmana bụtụ be elele na ba patana AGWANGWAMA rishe.

²⁶Bụtụ na mama tɛtana-rishe lagwụmɛ, ama bụtụ na ba nda iyi ibwɛ na ti'inta, ubwa zhɛ bo bino.

²⁷Iyi zha shɛ ya 'nyanana bụtụ na ba nda okofwo uwebiye kwukwuŋ, ama atwa ufwugwo zhɛ a kalana bụtụ na hieci shi inyɛmɛnyɛmɛ ya aba unu.

²⁸Aka na ogworozwo yɛ tugwama, atwamwa na mama swakaka, ama aka na aa bɛzhɛngwa na tugwama, nazhɛ atwa tiririri zhɛ o mungo.