Read bassa UTAKADAWE ESHI 3 Bible Online

UTAKADAWE ESHI 3 - bassa bible

UTAKADAWE ESHI 3

¹Ɛ-yɛu mi ye eyi, kede isɛbwɛ imbisegeni mi ubu 'wi o, ama na untangana unu na Ama bu pana aka elele.

²Ibɛ kaa zhɛ ma bu kaana urugbo tiya, yɛɛ zhɛ kaa du ma bu 'waŋnanɛ tɛzhɛmana tụ 'wụtụ.

³To lono maa iwɛ-tɛkana keeni tɛcara tu bu benengeni kwukwuŋ, ama na shana tụ ni i'ilu bu, maa no shiyono tu du na amɛ bụ.

⁴Nazhɛ atwa zhɛ ma bu mapana iwɛ, ibɛ du ɛbi zhɛ ba 'yaga urishi ubiye[7] na Agwatana bụ.

⁵Patana Agwatana rishe na ahaŋsa bu hwɛɛ, kede shɛ ti'eshicigo tụ bụ aba datana o.

⁶Ne teyinje AGWANGWAMA bu ni iyi elele nɛ aba nda, nazhɛ bɛɛ zhɛ ma bu 'yagaga nu uhwaŋna na teni cɛŋ.

⁷Ta mama shana bụtụ bi ti'inta ni ikɛnyi bu o. Ama na sụma AGWANGWAMA inyɛsɛ, maa no gozhigono iyi iwɛ tɛnda.

⁸Nazhɛ yɛɛ zhɛ ya nɛnga tu'waba tụ bụ,[8] yɛɛ zhɛ kaa yo sugo ụngwụ bụ tuhwuga.

⁹Na muna AGWANGWAMA ụjɛrụma maa na pana bụ iyi elele nɛ ehilo bu ubu metenji hiiŋ;

¹⁰nazhɛ ɛbi zhɛ bu no shidongo orubwu bu ni iyimɛyɛ harɛ a na ta ukata ibɛ du meni mụ bụ mu tụ'walụ ta afwafwa mi zhɛ mu na bu balana.

¹¹Ɛ-yɛu mi, ta na ngbaraka tuvwulo tu na AGWANGWAMA mo bu vwulo cwɛŋ o, to lukwumo kaa aka na tu baa bu tɛtagana-unu o.

¹²AGWANGWAMA o vwulo bụtụ na boo lubo, gana na te bishi bi yɛu ba nda ni yɛu nɛ amɛ ubwa o lomo ni ibɛ.

¹³Bụtụ na incɛ gwoje, ubwa du shɛ bụtụ na eshiciji iyi.

¹⁴Iwɛnɛ po ti 'yaganɛ bu titeni tu na tu hwuri titeni ta azụrụfa, taa 'yaganɛ bu kaa ule tee hwuri ule na azhɛnarɛya 'yajɛ.

¹⁵Ti'inta tɛ shɛ iyi yo ogwumishi uhwuri okwo utayɛ na ɛɛ hiɛŋ rubi. I zasa iyi elele nɛ ubu kwụlanɛ ebi eri ba manga na tuba o.

¹⁶Ti'inta tu 'waŋnɛ urugbo tiya nu u'ala ubiye, taa 'waŋnɛ tuba uduciya keeni ụjɛrụma tumuna nu u'ala ugwulwo.

¹⁷Ihwɛŋnɛ ti'inta hwɛɛ ya pana bụtụ tuwebiye tiya, abu 'wa tụ kaa bi zhɛ ba 'yaga amɛ-olom.

¹⁸Ti'inta ti shanɛ atwa na ruwanɛ tụ ụ'wụ'wụ uraiŋ, atwa na kaa untanganɛ tụ gbam gwoje.

¹⁹Tedure na ti'inta ibɛ AGWANGWAMA shiri ukoshilo unyizo ga, tedure ni iyi ti'eshicigo kaa bee tileni tụla.

²⁰Na ti'inta tu bwa baa njɛ erefu, ubwa du njɛ maa eshilo na banɛ na tụla.

²¹Ɛ-yɛu mi, na untangana ti'inta keeni ahaŋsa tuto, to lono maa ti bi benengeni o.

²²Tuba ti zhɛ ta kaana uraiŋ bụ ụnjɛswa, tɛɛ zhɛ kaa ta nda i'ilu bu tisemberi.

²³Nazhɛ ɛbi zhɛ bu na nda iyi bu ye elele no ohwulu bu oko, bi zha shɛ du kaa bu na nda utegidi no ofwo elele na obo dulogo.

²⁴Okwo aka ebu weci,[9] inyɛsɛ zha shɛ ma bu sha o, ebu weci, malabụ mi zhɛ na bu latụmana.

²⁵Kede ohwulu no bu horoko iwɛ ufwu tɛnda[10] na wa zhaganɛ ogworozwo eshigiri gana uvwugo ụ'wụtụ o.

²⁶AGWANGWAMA ubwa zhɛ ba nda maa ohwulu bu shikono dimi, ubwa kaa du zhɛ ma bu untangana maa kede teni na tijama ta atwa o.

²⁷Aka na iyi ibu namanɛ, ta nyasa atwa na lanɛ[11] maa njɛ aŋ uwebiye o.

²⁸Tɛ hiɛŋ binya bụ, Zhaga, beyi gwure, maa Ma bu pana iyi nɛ ubu shanɛ ukekeshi, ta abu 'yajɛ kaa ijɛ ɛtɛ o.

²⁹Ta na haŋsagana binya bụ na ubu tɛtanɛ rishe ahaŋsa awɛ na tunama tu bwa na bu o.

³⁰To 'wogo na bụtụ be elele gbi uzawa ecilo, tu baa bu njɛ shɛ kaa iyi iwɛ ye elele o.

³¹Ta nda isɛbwɛngwɛ na atwa na a nda abwagara o, kede kaa du i na bu dwa eshe maa na nda iyi nɛ aa nda o.

³²Atwa ɛ ci'nyɛ shanɛ AGWANGWAMA iyi-tupwaŋ, ama ohwulu ubwa tuba namɛ oko no ofwo atwa tɛcara.

³³AGWANGWAMA a kalana ihwɛ yo ogworozwo unu, ama ba pana tuba ihwɛ ya atwa tiririri uwebiye.

³⁴Ba nda atwa na mama sata asada, baa pana tuba atwa na meme zucinje uwebiye.

³⁵Atwa na incɛ zhɛ na kaana urishi tubana nụ ụjɛrụma ti'yaga, ama ụpụrụsa ụ shɛlagwụ tuba zhɛ na kaana ugombo.