Read bassa UTAKADAWE ESHI 31 Bible Online

UTAKADAWE ESHI 31 - bassa bible

UTAKADAWE ESHI 31

¹N-ndumwa mi tigesere mu na gɛ Lɛmuɛl agwuma[87] jɛmɛ tedure ne tigesere tu na bino bwa mbisegeni bu na:

²Oo ɛ-yɛu mi, oo ɛ-yɛu mi nɛ banɛ ni igwune mi tumata, Oo ɛ-yɛu mi nɛ shɛ ajɛshɛgwa adua mi.

³Ta nda ukpahiŋ bu ufwu no ofwo eyikwo, kwo kaa ihwɛŋnɛ bu no ofwo atwa na kokobwo ta shɛgwuma o.

⁴Oo Ɛ-Lɛmuɛl, i zhɛshɛ ma shɛgwuma shɛ na swa mayaga o, i zhɛshɛ kaa du maa ehwurembe no lubo mayaga mi ikɛnyi tuswa o.

⁵Iwɛ aka na ɛɛ zhɛ a swa mayaga isɛbwɛ iyi nɛ undwa jɛmɛ zhɛ yo 'wo aŋ, ɛɛ zhɛ o ubo ụshɛrɛya wa atwa na mama zasa.

⁶Ga shɛ atwa na zhɛ ihwungwɛ tudwa ebi peni mayaga, keeni atwa na namɛ ne tiriri tụ 'wụtụ.

⁷Ge swe maa isɛbwɛ tukofwo ta aba 'wi aŋ, maa kede e teyinje ya iwɛ tiriri ta aba tụ 'wụtụ o.

⁸Dumangana atwa na eri shi n-ndumwa tụdụma n-ndumwa, iwɛ tiririri ta atwa elele na zasa bụtụ na eri bo mbiyono aŋ.[88]

⁹Dumangana aŋ ụshɛrɛya u tishiriri, na jilanɛ atwa na teni cɛŋ keeni atwa na zasa iyi elele.

¹⁰Gaaba eri bo gwushigo biyikwo bu tuzana na ahaŋsa ubwa zhɛmɛɛ? Bɛ zhɛmɛ tebiye bee hwuri atayɛ ogwumishi.

¹¹Bwolo bwa zha shɛ ba 'yaga ohwulu tuhoroko nu bwa o, iyi elele kaa zha shɛ ya 'nyanana bụ du o.

¹²Iyi ibiye kiri baa ndana bụ, bɛ njɛ shɛ bụ iyi iwɛ tutu tu'wo tu bwa o.

¹³Ba shana ikɛnyi nu ugondu i'ɛlɛ tɛnda ne tihiŋzhe ta agwụdụ keeni tizhe.

¹⁴Bɛ shɛ gana ihɛŋtu tinyakpa nyakpa ya anjɛ tihinya, be suje iyimɛyɛ ibwɛ no olugwo na dụlụmɛ.

¹⁵Ba gbatụ ti'ishijɛ tobwolo iyi te suji shi o, maa ndana atwa ihwɛ ibwɛ iyimɛyɛ. Bo hwoŋso miaụŋ mu bwa mu ugondu mo o ugondu na shɛ maa a njɛ.

¹⁶Ba yalagaga cɛnjɛ nazhɛ baa sa tụ, ne titeni tu bwa ibɛ baa hwaŋ itimɛ ibwɛ ya afwafwa.

¹⁷Bu mama 'imɛ maa nda ugondu ubwa, aragbamụ ubwa kaa 'yajɛ ikɛnyi iwɛ maa nda ugondu ubwa.

¹⁸Bụ kwụbɛ maa tihinya tu bwa ti 'yajɛ ule. Ụsụtụla ubwa kaa 'weji shi nụ ụjita o.

¹⁹Ubwa ba untangana mezeri nu u'ala ubwa, baa hiŋsa ihwehwe ibwɛ nazhɛ baa na tugwuno tu bwa ni ikɛnyi ibwɛ.

²⁰Ba pana okofwo keeni atwa na zasa iyi apwaŋ tebiye tebiye.

²¹Bɛ njɛ shɛ inyɛsɛ iwɛ atwa ihwɛ ibwɛ okwo aka na ofwo lemi cwii o, iwɛnɛ tu baa 'yajɛ tugwuno tu na ti inshi maa urugono aŋ hwɛɛ.

²²Ubwa ba na tugwuno tu na boo ubo no ogodo ubwa, boo urugono tugwuno ti ilinɛn tu na aa nɛ ni ihwehwe uduhwa ishenje.

²³A muna bwolo bwa ụjɛrụma tebiye no odubo ụshɛpwụ, tu baa jɛjɛ nu n-nyarɛ mɛ cɛnjɛ ta ata.

²⁴Ba nda otogwo no tugwuno ti ilinɛn keeni amazhɛya, baa sangana ahinya.

²⁵Bi 'yajɛ ukpahiŋ keeni ụjɛrụma, bɛ njɛ shɛ inyɛsɛ iwɛ geri-be-eshe o.

²⁶Aka elele na baa duma n-ndumwa, bi zhɛ ba mapa maa bɛ shɛ biyikwo na incɛ, imbisegeni iwɛ-tumapa ibɛ ya banɛ nu unu ubwa.

²⁷Ba ngbaraka atwa ihwɛ ibwɛ tebiye. Bɛ yɛ shɛ kaa iyimɛyɛ bụtụ na 'yajɛ asụsụbagwụ o.

²⁸Miaụŋ mu bwa ma nda ugwoje ubwa, bwolo bwa du kaa ba dumanga bụ, bɛɛ hiɛŋ:

²⁹Eyikwo ufwugwo a nda tebiye na tụmbụla ta aba, ama gabụ kaa bi ngezeni aŋ hwɛɛ.

³⁰Iyi ibiye tɛnda ya halakaka bụtụ, ụzhɛ kaa wo hwuwowu, ama biyikwo na ba sụma AGWANGWAMA inyɛsɛ, bɛ shɛ aa dumanga.

³¹Tụpa bụ ma utashɛ na teni cɛŋ nu ugondu we elele na baa njɛ, ga atwa elele na sotulonu no odubo ụshɛpwụ na dumanga bụ, iwɛ ugondu ubwa ubiye.