Read bassa UTAKADAWE ESHI 4 Bible Online

UTAKADAWE ESHI 4 - bassa bible

UTAKADAWE ESHI 4

¹A-miaụŋ mi mi me eyi, na hwuga ma unu imbisegeni ye eshi hiŋ, no shilo ma kaa acɛbɛ tebiye maa hi no eshicigo iyi.

²Iyi nɛ Omo hi sokokono i shɛ iyi ibiye, to jinoko ma kaa imbisegeni mi o.

³Aka na tu Ngaa ta shɛ la yɛu ticwɛŋ Ngaa namɛ ni i'ɛlɛ bishi mi, Ngooko kaa bino mi meci,

⁴bishi mi m mbisegeni, bɛɛ hiɛŋ, Na untangana n-ndumwa mi mi na ahaŋsa bụ dimi; untangana unu na Ama bu pana maa yɛ uraiŋ.

⁵Kede n-ndumwa mi mi mu no hi 'wo isɛbwɛ maa hi genji mu o, inta ma, maa hi no eshicigo iyi nɛ namɛ geri-be-eshe.

⁶To jinoko ma ti'inta, nazhɛ tɛɛ zhɛ ta hi ngbaraka, no lubo tu ma, nazhɛ tɛɛ zhɛ tu na hi 'yaka.

⁷Ti'inta tu hwuri iyi elele, iwɛ ecilo ata, na inta ma. Okwo ahiɛ 'yajɛ inyɛ iyi ye elele, ne eshicigo ma iyi.

⁸No lubo tu ma tebiye, nazhɛ tɛɛ zhɛ tu no hi gombicingo, na ruwanɛ tu ma, nazhɛ tɛɛ zhɛ ta hiɛ 'waŋnanɛ ụjɛrụma tumuna.

⁹Ti'inta ti zhɛ ta hi patana tisemberi to tulubo ti biye no ohiuhiu hiŋ. Tɛ ɛ zhɛ kaa ta hi pana udara na pilanụ.

¹⁰Ɛ-yɛu mi, na shɛlaga n-ndumwa mi mi, na untangana n-ndumwa mu na Ama dumanga na bu maa yɛ uraiŋ te ilegeji.

¹¹M bu mbiswogwonuo uhwaŋna ti'inta, Ngoo bu sokwokwonuo tiririri.

¹²Aka na aba zha tahaŋnụ, i zasa iyi elele zhɛ ma bu nda ukwurishi o, okwo obo gozhigo, bi zha shɛ kaa ba twa udukwutwa o.

¹³Na untangana iyi nɛ Ngoo bu sokwokwonuo dimi, to lono maa ibu benengeni o; no shiyono iŋ eshe tebiye, iwɛnɛ ti yɛɛ zhɛ ya sha uraiŋ bu tiya.

¹⁴To momo togwu ni iyi nɛ ogworozwo a imanganga o, ta na 'wa kaa uhwaŋna wa atwa awɛ o.

¹⁵Ganga uŋ, ta 'wa uŋ o, vwula maa genji uŋ, hwulo geri na ɛbi zhɛ.

¹⁶Ogworozwo eri shi o woto malabụ o, semi aka na ta a njɛ iyi iwɛ, malabụ mi zha shɛ ma gwuma aŋ kwukwuŋ semi aka na ta a njɛ bụtụ bu ko umungwuta.

¹⁷Tugworozwo tɛ shɛ gana iyimɛyɛ ya aba, abwagara tuba a shɛ gana mayaga ma aba.

¹⁸Ama iyi elele nɛ bụtụ bi tiririri ba nda, i namɛ kpataa gana na ti iyi ye suje, ya kaana tunama kpataa gana uhioko-uhwaŋna na wa ta rawụụ ti iyi heri.

¹⁹Ama iyi elele nɛ ogworozwo a nda, i shɛ gana bụtụ na ba nda iyi ne tishi tụ 'wụtụ, a kwụbɛ shɛ uhwaŋna maa e mepi iyi nɛ aa twatwagwụ o.

²⁰Ɛ-yɛu mi, na hwulaga n-ndumwa mi mi tebiye, no shilo kaa acɛbɛ tebiye ni iyi nɛ Ama duma.

²¹To lono maa mụ bụ inanjɛ o, ne teyinje mu, maa intanɛ mụ na amɛ bụ tebiye,

²²ma pana kaa atwa na 'yajɛ mụ uraiŋ, maa nɛnga kaa du tu'waba ta aba hwɛɛ.

²³No shiyono ahaŋsa bu eshe tebiye, apata tuhaŋsa tu uraiŋ tɛ zhinjɛ.

²⁴Ta na duma n-ndumwa mu na mu ontongonu o, ga n-ndumwa mu tugbom mi beni nu unu bu hwɛ hwɛɛ.

²⁵Ge eshe bu na ngbaraka umbe bu ririri, gɛ igbɛtɛtɛ bu nama geri-be-eshe bu ririri.

²⁶No shiyono iyi elele nɛ aba nda eshe tebiye[12] maa iyi elele nɛ aba nda ibu 'yagana eshe.

²⁷Kede ahaŋsa bụ na ta beye bana o, meme becinji ni iyi iwɛ tɛnda hwɛ hwɛɛ.