Read bassa UTAKADAWE ESHI 6 Bible Online

UTAKADAWE ESHI 6 - bassa bible

UTAKADAWE ESHI 6

¹Ɛ-yɛu mi, i 'yajɛ suu bụtụ be elele na ebi teni tijama tu bwa iwɛ atashɛ na binya bụtụ yɛ?

²N-ndumwa mu unu bu[17] suu mụ bụ bizhanganɛ iwɛ, mee bu umpi gana uhwohwo?

³Ɛ-yɛu mi, iyi nɛ abɛ shɛ ba nda maa benengeni, gana na ta binya bụtụ ubu twonuo u'ala na. Asha zhaga kakayɛ maa meme zucinje na agba bụtụ ata maa ma bu ganga!

⁴Ta na mama pana malabụ tuwoto, kwo kaa ozhilwo tuta o.

⁵No momo bicingo gana na usunda ehilo momo bicingo ni i'ɛlɛ bijala,[18] keeni gana na ụnụnụ momo bicingo ni i'ɛlɛ bibici-bu-ugwuru.

⁶Zhaga no ofwo shesumo, gabụ ụsụnyasụ ga, maa seshi gana na aa nda maa incɛ.

⁷A zasa buhwuri-bu-umbe, a zasa kaa agwuma, kwo kaa uhiu ugondu o.

⁸Ama a swakaka kaa iyimɛyɛ ya aba taa na aka bu ugbama, aa 'waŋnanga iyimɛyɛ ya aba taa na aka na ti iyimɛyɛ jiye nu ubwaza.

⁹Oo a sụnyasụ, ụkwụmbwụ naa ɛbi zhɛ bo woto apataa? Aka naa ɛbi zhɛ bɛ zhinjɛ malabụ ma ata mụ bụụ?

¹⁰Malabụ tuwoto cwɛŋ, no ozhilwo tuta cwɛŋ, keeni i'ɛlɛ tishana na agba maa to ụhinjanụ cwɛŋ,

¹¹gobwonu du tukofwo ti zhɛ ta bu zhaganɛ gana ashɛrɛ, nazhɛ ukekeshi iyi zhɛ ma bu ta gana maa bijeshi bu ujasa ubu zhaganɛ.

¹²Ogworozwo na shɛ atwa tusashɛ, o rungo aa kaba ụzagwụ.

¹³Baa njɛ eshe pɛ, ba mba uvwuna sụrụrụ, ba sakana u'ala ubwa geri bu ko maa ma bu halakaka.

¹⁴Na amɛ ubwa na namɛ biribiri, aba baa haŋsa iyi iwɛ, baa karɛ du tubogwu aka elele.

¹⁵Gabata du ufwu tɛnda zhɛ wo jitono bu eshigiri, na aka fwalaa ɛ zhɛ a gwụcɛnga bụ eshigiri, uzawa tɛzhɛmanana.

¹⁶Iyi icihiŋ namba nɛ AGWANGWAMA to ni i'ime, iyi icenje namba nɛ shanɛ bụ iyi-tupwaŋ.

¹⁷Tumomo mungicingo, nụ ụzagwụ-tudwa, ni i'ɛlɛ nɛ yo dudwogo mehieŋ ma bụtụ na zasa tụwụma,

¹⁸na ahaŋsa na a imanganga iyi tugworozwo tɛnda, ni ivwunɛ nɛ zegeri ni iyi iwɛ tɛnda,

¹⁹nu useyida tukata tisha, keeni bụtụ na ba kalanɛ miaụŋ-mo-bino tubogwu.

²⁰Ɛ-yɛu mi, na untangana unu na bishi bu ma bu pana, to jinoko kaa imbisegeni nobu o.

²¹Intana iŋ na amɛ bu aka elele, ga i sụlụpanɛ ahaŋsa bu dimi.

²²Ibɛ[19] zhɛ no bu sokokono uhwaŋna na aka na aba zha tahaŋnụ, ibɛ du zhɛ na bu ngbaraka aka na obo woto malabụ, nazhɛ ɛbi zhɛ bu na dumanga ushaura iwɛ ibɛ tɛɛbi zhinjɛ malabụ.

²³Unu-tupana ụ shɛ gana ụsụtụla na wa ta, imbisegeni i shɛ gana uhioko-uhwaŋna, unu-tɛtɛtagana tuba ụ shɛ gana uhwaŋna na wa zarɛga bụtụ nu uraiŋ.

²⁴Ibɛ zhɛ na bu lashaga ne biyikwo ata bo ogbototu, keeni unu-ụlatụ biyikwo ata shɛ birinji.

²⁵Ta nda ukwedeyi ụzhɛ ubwa na ahaŋsa bu o, to lono du kaa maa ololobo eshe ubwa ubu helekeci o.

²⁶E eri a sa buwɛle okwo ni iyi ticwɛŋ nɛ i shɛ gana ukara, ama buwɛle ata ubwa kaa ba shɛka uraiŋ u butubwenyi[20] ata gom.

²⁷Bụtụ suu eri ba ndapana ulwa na agba ubwa i shɛ tugwuno tu bwa ti zha shɛ to hwoŋno?

²⁸Okwo bụtụ suu eri bo rukoto akanga ulwa, i shɛ ɛvwɛvwɛjɛ ubwa zha shɛ o hwoŋno?

²⁹Asha gana ata du yaa shanɛ bụtụ be elele na weci ne biyikwo binya bwa; I zasa bụtụ be elele na timengeni biyikwo binya bụtụ na zhɛ ba banangana ulwapɛ kwukwuŋ.

³⁰Iwɛ bụtụ na zunji iyimɛyɛ ti imunɛ gwụmɛ bụ suu tatụlanụ[21] atwa?

³¹Yaa shɛ aa 'imɛ bụ, bi zhɛ ba tụpa iŋ orubwo ecenje, bi zhɛ kaa be suje iyi elele nɛ baa 'yajɛ ni ihwɛ ibwɛ maa tụpa iŋ.

³²Bụtụ na ba nda tuwɛle incɛ shɛ o, bụtụ be elele na kaa ba nda tụ, ubwa ni ikɛnyi ibwɛ mama nda ufwu.

³³Ubwa mama gwụcɛnga, baa mama nda kaa du ụpụrụsa na zha shɛ wo hwuwowu kwukwuŋ.

³⁴Yaa shɛ tulogotu ti ishicinjɛ isɛbwɛ butubwenyi, bi zha shɛ ba mbiyanɛ ya ekwunyi ti bɛɛ zhɛ ba nda itɛpwɛ o.

³⁵Okwo ee peni bu iyi elele maa ganga, bi zha shɛ ba lashɛga iŋ o. Okwo ee peni bu kaa apwaŋ gembi ufwugwo, amɛ ubwa zha shɛ o gwurusono waa o.