Read bassa UTAKADAWE ESHI 7 Bible Online

UTAKADAWE ESHI 7 - bassa bible

UTAKADAWE ESHI 7

¹Ɛ-yɛu mi ye eyi, untangana n-ndumwa mi mi, na intana unu na Ama bu pana na amɛ bụ.

²Na untangana unu mu tụpana maa yɛ uraiŋ, na ima iyi nɛ Omo bu mbisogono u'ala gana bụzagwụ be rishe rụ bụ.

³No umpo iŋ ni ivwɛ bu, ge mi 'nyeci na amɛ bụ.

⁴Ga ti'inta tụ bụ shanɛ gana bụngwụfwụ bụ, ge iyi-tumapa ibu shanɛ gana biyejilo bu be eligidi.

⁵Ibɛ zhɛ ma bu lashaga ni i'ɛlɛ biyikwo ata bo ogbototu, bu gata shɛ birinji, bu gata bu unu-ụlatụ.

⁶N duricinji igbɛtɛtɛ mi na agbahwụ keeni owowo umwono mu,

⁷Ngaa kwụbɛ usemberi uko na eshiciji shi iyi, na ashashɛ esemberi na hwuwi shi.

⁸Tu baa kashɛka nu uhwaŋna na gwumwongonu ne eseshi uhwaŋna na zhɛ nu umwono biyikwo ata,

⁹Na aka na ti iyi kwuni turumono. Nụ ụrụmɛ, nụ ụjita, na aka na tishi tu namɛ.

¹⁰Ngaa kwụbɛ te biyikwo bu ko twa nu bwa, biyikwo ata njɛ tisemberi tɛ buwɛle, baa 'yajɛ du ahaŋsa tuhalakaka na amɛ ubwa.

¹¹Biyikwo ata shɛ budumanjɛ keeni ugworozwo, ivwunɛ ibwɛ 'imɛ shɛ cɛnjɛ ni ihwɛ ibwɛ o.

¹²Aka oko ba nama nu uhwaŋna, aka oko kaa ba nama no ofwo udukwo keeni eseshi elele maa 'yaka bụtụ bu ko tilɛɛ.

¹³Nazhɛ biyikwo ata 'imɛ bụtụ ata, baa ruwanɛ bu, bee kwutenji unu ubwa nu una ubwa, baa ngbarakacɛ ụpɛshɛka ubwa zenjizenji, bɛɛ hiɛŋ bụ,

¹⁴N towo arụpɛ mi, Ngaa nduwa iyi nɛ Ngee nge shileji onu ibɛ hwayɛ ga.

¹⁵Iwɛbɛ po Ngaa banɛ hwuwayɛ go maa Ma twa na bụ, maa Ma bu dwalakaka no tugom. M bu to kaa ugbe!

¹⁶N urugwonuo ogodo mi tugwuno ti Ijipti tu na ti 'yajɛ i'nyɛtɛ swoswoswo.

¹⁷N zhizhongwo ogodo mi nturare mu na ɛɛ hiɛŋ, muru, na alos keeni cinamon.

¹⁸Hwure tu momo lubonu ya tutu uvwungwa, maa tɛ njɛ unyasa no tulubo.

¹⁹Bwolo mi zasaba ni ihwɛ o, bi zhe tahaŋnụ tu na tụ dụlụmɛ.

²⁰Bi shepi arɛta ukwuribi baa sanɛ, bi zhɛ be jiye hwuŋ taa na aka na tu upiana sepi uvwi cɛnjɛ.

²¹Nu n-ndumwa mi biye mu na biyikwo ata dumanjɛ, mɛ njɛ maa bụtụ ata leni maa biyikwo ata shishingeni bu nu unu ubwa ụlatụ.

²²Gunu ata bụtụ ata 'wa bu ga sungbo sungbo, gana buna na zhɛ no ofwo bụtụ na zhɛ ba shɛla bụ, kwo kaa gana alagwụ[22] na oo to ogbo ni i'ɛlɛ maa e shepi bu no ofwo na ɛɛ zhɛ o vwulo bu.

²³Gana ụnụnụ na shanɛ ikɛnyi maa zha no ofwo na ee ge biteni bu ugwuru, bi mepi shi kaa maa iwɛ uhiuhiu ubwa ee ge bici uŋ o. Uuwa i ci aka na oo to bu i'ilɛ tubana na asụbwụ.

²⁴Hwuwayɛ go, oo A-miaụŋ mi mi me eyi, shɛlaga maa iwɛ mi, maa kaa hi shiri acɛbɛ nu n-ndumwa mu unu mu.

²⁵To lono ma maa ahaŋsa hiŋ 'wa ahaŋsa ubwa o, ta ina ma kaa maa hi 'wa masha mu bwa okwo cwɛŋ o.

²⁶Atwa na baa gwụcangwa nazhɛ bee jineci aŋ gembi ufwugwo, iwɛ-tɛkana, bu kwụnua kaa unyama wa atwa ofugwo.

²⁷Umwono ubwa shɛ uhwaŋna na zhe ne e'uye, u zwi wee zhe no shigongo shi umwono tu'wo.