Read bassa UTAKADAWE ESHI 8 Bible Online

UTAKADAWE ESHI 8 - bassa bible

UTAKADAWE ESHI 8

¹Ti'inta suu tu suyanɛ shɛ ụhiɛŋshɛ? Iyi ti'eshicigo suu keri shi ba ụhiɛŋshɛ taawụụ?

²Ti shikeni ba ni ihiŋhiŋ nshama, geri bu uhwaŋna, keeni eseshi.

³Ti'inta ta suyana ụhiɛŋshɛ no odubo na teni nụ ụshɛpwụ, keeni ipɛlu yo odubo ata; tɛɛ hiɛŋ,

⁴Oo ahiɛba atwa ga, ahiɛba Ama suyana, miaụŋ ma atwa Ama kala ụhiɛŋshɛ.

⁵Oo ahiɛba atwa na hwuwi shi, soso ma ti'inta, oo ahiɛba shɛlagwụ, no shilo ma acɛbɛ tebiye.

⁶Shɛlaga ma, iwɛ tandụ nɛ Ngɛɛ zhɛ ma duma, N zhɛ ma duma iyi nɛ teni cɛŋ nu unu mu.

⁷N zhɛ ma duma iwɛ-tɛkana nu unu mu, n-ndumwa mu tugworozwo kaa mɛ shanɛ unu mu iyi-tupwaŋ.

⁸N-ndumwa mu unu mu hwɛɛ mu namɛ ririri, mu pingwotongwu su, mu ontongonu su kaa o.

⁹Mi teneni atwa na o eshicigo iyi cɛŋ, atwa na mepi iyi kaa sepi shi mu unu o.

¹⁰Ga shɛ tusokokono ti mi ehi teri uhwuri azụrụfa, tala ma iyi-tumapa uhwuri azhɛnarɛya na namɛ rụmbɛɛ.

¹¹Ti'inta tu hwuri utayɛ wo ogwumishi, i zasa iyi elele nɛ aba nda ukwedeyi ibɛ inɛɛ nɛ ebi eri ba manga na tuba o.

¹²Gamba ga ti'inta, N eshiciji iyi, Ngoo to iyi-tumapa keeni ahaŋsa ti'yaga ugbe.

¹³AGWANGWAMA inyɛsɛ tụsụma, yo lono maa no imo iyi iwɛ, N to tubusa, na tumama sata, ni iyi iwɛ tɛnda keeni tuhalakaka ni i'ime.

¹⁴Gamba ma pana bụtụ ahaŋsa, keeni ti'inta ti biye, N eshiciji iyi, Ngaa 'yajɛ kaa ikɛnyi.

¹⁵Gamba m po shɛgwuma sha ya tugwama, ibɛ po ehiu o shilogo andwa na teni cɛŋ,

¹⁶Gamba mo mbiyono miaụŋ mu tugwama upo aa untangana ofwo, ta atwa a'wụtụ unyizo ga hwɛɛ,[23] oo shilogo andwa.

¹⁷Mo lubo atwa na mo n lubo, atwa na ma n jalakaka no tugom, aba kaa ma n ta ugbe.

¹⁸Tɛzhɛgba keeni ụjɛrụma namɛ no ofwo mi, tu uduciya keeni tɛzhɛmana tu na to ilogogo.

¹⁹Tụ'walụ ti mi tu hwuri azhɛnarɛya tụrụmbɛɛ, iyi nɛ Ama pana bụtụ kaa du zhɛmɛ yee hwuri azụrụfa na namɛ shɛshɛshɛ.

²⁰N to uhwaŋna tiririri, keeni ilɛmu nɛ namɛ ririri.

²¹Ma dula atwa na mo n lubo uduciya, Omo shidongo shimwono sha aba nu uwebiye-tupana.

²²AGWANGWAMA ubwa n karɛ taa nu umozhigo mu ugondu ubwa, ibɛ shɛ ugondu ubwa uhiiŋ na baa njɛ cala cala.

²³A n karɛ taa nu usara na koshikwo, taa nu umozhigo nazhɛ unyizo ga namɛ.

²⁴A n karɛ tobwolo ntokwu mu ta zasaba la o, taa na aka na ɛmɛzhinjɛ elele ta zasaba maa a fwụnjɛ.

²⁵N namwawaŋ nazhɛ oo mo nshama, N namwawaŋ du nazhɛ tikpekwu tu namɛ,

²⁶N namwawaŋ du nazhɛ Agwatana njɛ unyizo, tu ntuma keeni cɛnjɛ tu unyizo.[24]

²⁷N namba ti bee shikicinji tụla, Ngaa namba aka na tu baa shɛrɛ bi'nyata bu uce meni mu ntokwu.

²⁸Taa aka na bee ubeni odomu na tụla, taa aka na bee shikicinji ofwo na meni mu na mi iri mɛ zhinjɛ,

²⁹taa aka na bee shileni itekwu ogwungwu maa kede meni mi keshici ofwo na bee peni mu unu o. N namba na aka na bee shiri ukoshilo unyizo.

³⁰Aka ata Ngaa namɛ nu bwa gana yɛu ibwɛ i ticwɛŋ nɛ bɛɛ wɛnicinjɛ,[25] ba nda[26] kaa unyasa ne mi iyi-heri, Ama bwada du unyasa no ofwo ubwa aka elele.

³¹Ma ndana unyizo ubwa hwɛɛ unyasa, Ngaa 'yajɛ amɛ-olom iwɛ miaụŋ ma atwa.

³²A-miaụŋ mi mi me eyi, shɛlaga ma ya iwɛ mi, atwa na a 'wa ihwɛŋnɛ mi gwoje.

³³Shɛlaga ma tusokokono ti mi, to jinoko tu ma o, maa hiɛ incɛ.

³⁴Bụtụ na ba shɛlaga iwɛ mi gwoje, ubwa shɛ bụtụ na ba gɛga no odubo mi iyi-heri, na kaa ba nda ashɛlatụ no odubo ihwɛ mi.

³⁵Bụtụ be elele na n to ugbe, asha bụtụ ata to du uraiŋ ugbe, nazhɛ AGWANGWAMA zhɛ o hioko inyɛmɛnyɛmɛ ibwɛ.

³⁶Ama bụtụ be elele na n te shi ugbe, asha bu mama gwụcɛnjɛ. Atwa elele na kaa n to ni i'ime, asha tu'wo tuba oo lubo.