Read bassa UTAKADAWE ESHI 9 Bible Online

UTAKADAWE ESHI 9 - bassa bible

UTAKADAWE ESHI 9

¹Ti'inta tu mwowoŋ umwono tuba, too shikwocwongwo[27] atukpa tuba ecenje.

²Taa shɛlwa iyimabiga, too hiŋtwotwongwo icisu ne meni ma afwafwa mu tuba, too shiwo iyimɛyɛ tuba.

³Taa tumwanɛ miaụŋ-mo-o mu tuba mu ugondu maa mi zhe nu nshama mu na mu hwuri mu na mu vwɛ uzoto nụ ụshɛpwụ ata hwɛɛ, taa kala ụhiɛŋshɛ, tɛɛ hiɛŋ,

⁴Ga atwa elele na hwuwi shi zhajɛ epe! Ta atwa elele na ahaŋsa ci shi, ga zhajɛ.

⁵Zhajɛ ma, maa hiɛ yɛ iyimɛyɛ, maa hi swe du meni ma afwafwa mu na Ngoo hiŋtwotwongwo.

⁶Ganga ma uhwuwishi hiŋ,[28] maa hiɛ yɛ uraiŋ, na 'wa ma uhwaŋna iyi ti'eshicigo.

⁷Bụtụ be elele na bo mbisogono alagwụ iyi maa tono cɛŋ, asha bu mama twaga, Bụtụ be elele na kaa tazhɛganɛ ugworozwo, bu mama gwụcanga tụgwụcanga tu na tu zha shɛ ta zhɛmanana ya.

⁸To mbisono bụtụ ba asada ti'inta o, bi zhɛ ma bu ta ni i'ime. Ama aba tazhɛgana bụtụ na incɛ, nazhɛ bɛɛ zhɛ ma bu kaana tulubo.

⁹No sokokono[29] bụtụ na incɛ iyi, nazhɛ bɛɛ zhɛ na kaana ti'inta. Obo mbisogono kaa bụtụ bi tiririri iyi, nazhɛ bɛɛ zhɛ na kaana iyi tusoso.

¹⁰AGWANGWAMA inyɛsɛ tụsụma, ibɛ shɛ umozhigo mi ti'inta, Bụtụ ata bi Tijilo tumapa kaa, ibɛ shɛ iyi tusweci ti'eshicigo.

¹¹Gamba n zhɛ ma kaana ijitɛ i tunama tụ bụ ufwugwo, nazhɛ shiywa shu urugbo bu tiya shi zhɛ sha kaana ugombo.

¹²Yaa shɛ abɛ incɛ, bi zhɛ ba ya ule ti'inta ta ata tụ bụ, ama yaa shɛ abɛ shɛ alagwụ, gobuko bi zhɛ ba nda ụbaụta.

¹³Rundu tɛnda rɛ shɛ ugondu biyikwo na lagwụmɛ,[30] i zasa iyi elele bee mepi o, bi mepi shi kaa okwo ezuye o.

¹⁴Ba gɛga no odubo ihwɛ ibwɛ, ni iyi ya ajɛjɛ nɛ zeci uhwuri inɛ vwɛ hwɛɛ nụ ụshɛpwụ ata.

¹⁵Bu na suyagana atwa na a kashaka, aba shɛ atwa na to uhwaŋna ofwo na ɛɛ zhɛ shiriri.

¹⁶Bɛɛ hiɛŋ atwa elele na hwuwi shi, Teni ma epe hwɛɛ, ta atwa na lagwụmanjɛ!

¹⁷Bɛɛ hiɛŋ, Meni mu na ee zunje, mu lacɛmɛ, iyimɛyɛ nɛ kaa aa yɛ ne tusweci zhɛmɛ yee hwuri inɛ vwɛ.

¹⁸Ama bi mepi shi maa atwa na uwo[31] namba apata o, bi mepi shi du kaa maa agaiŋ ubwa zweni ba nu nhwaŋ-me-e'uye o.