Read bassa BI'ENENJI 10 Bible Online

BI'ENENJI 10 - bassa bible

BI'ENENJI 10

¹Gana na ti ishi ru'wo ya nda manɛbɛ mụ ụhiụŋ mi biye mu na mu zweni nu ubene ufwu, gobwonu du ụlagwụ u ticikwure wa lasatagwụ ti'inta keeni ụjɛrụma.

²Amɛ bụtụ bi ti'inta a sala geri bi iyi nɛ teni cɛŋ tɛnda, ama amɛ alagwụ tuba a sala geri bi iyi iwɛ tɛnda.

³Iyi ụlagwụ nɛ alagwụ a nda ibɛ zhɛ yɛ vwɛ bu uvwi na atwa elele na baa twa na aba nu uhwaŋna, ibɛ po ɛɛ zhɛ a mapa ya maa alagwụ baa shɛ.

⁴Yaa shɛ amɛ agwuma bụ hashɛganụ na bụ, ta ganga ugondu bu o, bi eri ma bu gangana ti yaa shɛ ebi meme zucinje suu.

⁵Iyi iwɛ ike namba Ngaa kwụbɛ tuta tu uwaŋna ga, ta bụtụ na ga shɛ uhiu bɛ ishicinjɛ ti'ina;

⁶shɛlagwụ shɛba aa pana ohwolu na zeci nu ụhwada, ama azhɛgba tuba jɛjɛ no ohwolu na gwumwa.

⁷N kwụbɛ ta ajama a suka idɛkwɛ, miaụŋ-ma-tugwama tuba ma zha tahaŋnụ ni ivwunɛ gana ajama.

⁸Bụtụ be elele na hini ushapa, ubwa zhɛ ba layanana nu bwa, bụtụ na kaa 'yɛbɛ ụdatụ, ubwa uhwa zhɛ wa lụmanana.

⁹Bụtụ be elele na ba nda ugondu atayɛ tɛshaba, ubwa utayɛ zhɛ wa ta, bụtụ na kaa ba nda ugondu i'wɛ'wɛ tubagaga, apata du bɛɛ zhɛ ba ala-ụngwụ ubwa.

¹⁰Yaa shɛ ogwubo bu 'wi ụlatụ, ebi pe shi aŋ unu, asha bi zhɛ bɛ bɛcinjɛ ukpahiŋ bụ duwa nazhɛ maa eri iyi tijaja na aba. Ama ti'inta ta nda maa ge iyi 'yagana bụtụ eshe.

¹¹Yaa shɛ bụtụ 'yajɛ uwasa na wa kapa unu ahwa maa kede a lụmɛ bu o, yaa shɛ bee genji uhwa ata unu tukapa, uhwa ata zhe waa lụmɛ bụ, nazhɛ bee kepi ya uhwa ata unu, asha imbe shɛ ule uwasa ata ubwaa?

¹²N-ndumwa mu na ma banɛ nu unu bụtụ bi ti'inta mɛ shɛ n-ndumwa mu na ma pana bụ amɛ-olom, ama alagwụ mama nda ufwu nu n-ndumwa mu unu ubwa.

¹³Tukwuno tu n-ndumwa mu unu ubwa ta sha ụlagwụ, ama tukwunanga tu n-ndumwa mu bwa hwayɛ ta sha ya ụmpɛ mu tugworozwo.

¹⁴Alagwụ lukwumi shi n-ndumwa o. I zasa kaa bụtụ na mepi iyi nɛ ye teni bu o. Gaaba kaa namɛ na amɛ eri mo ti mbiso iyi nɛ zhɛ ya nda na aba tuu?

¹⁵Ugondu na alagwụ njɛ lukwucinji bu duwa, ibɛ po bee mepi shi ya okwo uhwaŋna ihwɛ ibwɛ.

¹⁶Cɛnjɛ te elele agwuma tuba ta shɛ yɛu,[8] tu na kaa miaụŋ mu tugwama mu tuba ma swa ikwusɛ'uyɛ nu uvwungwa, cɛnjɛ ta ata ti zhɛ ta nda hwuŋ adangboo!

¹⁷Ama cɛnjɛ te elele tu na agwuma tuba shɛ yɛu ya atwa na mama 'yajɛ, miaụŋ mu tugwama mu tuba kaa ma ya iyimɛyɛ na aka na teni cɛŋ, aa mama 'imɛ, ee swe shi mayaga maa mu na ngba aŋ, cɛnjɛ ta ata tu gwoje.

¹⁸Tedure na bụtụ ba asụsụbagwụ ibɛ po ukogo umwono ubwa we teni eshilo, tedure kaa na bụrụna ibɛ po umwono ata zhɛ wo hwuŋzwo na amɛ.

¹⁹Ikwusɛ'uyɛ ya pana bụtụ unyasa, mayaga tuswa kaa ma pana bụtụ amɛ-olom, ama ukwuribi kaa ubwa wa nda iyi elele kpaaŋ.

²⁰Ta twaga agwuma okwo na ahaŋsa bụ o, ta twaga kaa bɛzhɛgba okwo na amɛ umwono bu buweci o. Iwɛnɛ po shanụnụ shi zhɛ sho sugo n-ndumwa ma ata mụ bụ, iyi-uumwa ya apiambɛ kaa zhɛ ye mbishe aŋ iyi nɛ abɛ jɛmɛ.