Read bassa BI'ENENJI 12 Bible Online

BI'ENENJI 12 - bassa bible

BI'ENENJI 12

¹Ne teyinje bụtụ na ubu karɛ na aka tisemberi tụ bụ, nazhɛ ijitɛ ɛtɛ ya amɛ-tụhaŋtụ keeni shiywa sha ata shɛ wɛ sho gwumwonu ɛbi zhɛ bi nɛ hiɛŋ hwuŋ, N zasa amɛ-olom nu uraiŋ mu i ci.

²Ibɛ shɛ aka na uhioko-uhwaŋna, nu uwaŋna, nu upiana keeni mkpasu mi zhɛ mo 'wo tishi, odomu eshilo kaa du zha shɛ e gwure ya o.

³Na aka na ta angbaracɛ umwono a zhɛgɛda, aka na atwa na ga 'yajɛ ikɛnyi zhɛ o lwogo lɛgbɛ lɛgbɛ, aka na tu n'nana mi genji ya inɛkɛ iwɛnɛ tu maa twa sụ ya ufwugwo, na aka na ta atwa na o durocongo igbɛtɛtɛ na agbahwụ a kaana tulubono.

⁴Ta aka na to shidubo shi ihwɛŋnɛ ụshɛpwụ shi kepenji, aka na to rundu ri inɛkɛ ro zwo;

⁵na aka na atwa a nda inyɛsɛ ofwo na namɛ kpese, iyi nɛ yo holono atwa ta kaa namɛ ni ihwɛŋnɛ ụshɛpwụ, aka na ti i'wɛ'wɛ yo olmond ya nda tusumbo, na aka na ta a'nywa momo kokwulo, akpala iyi elele zhɛ o hwuwowu. Nazhɛ bụtụ zhɛ bo hwulo ya ni ihwɛ ibwɛ nɛ bɛɛ zhɛ ba nama u mɛwɛɛ, nazhɛ atwa na a ta-ụkwụla zhɛ o shino ni ihwɛŋnɛ ụshɛpwụ.

⁶Ne teyinje iŋ[11] tobwolo uhwohwo wa azụrụfa u ta dwa sụ o, aka na ti ikwede ya azhɛnarɛya ta bwadụ sụ, aka na tu uhwohwo na ɛɛ cijɛ meni nu u'ibwa u ta dwa sụ, na aka na ti ihiulwe meni i ta bwadụ sụ nu u'ibwa ata meni.

⁷Nazhɛ upwupwutu zhɛ wo gwulo na cɛnjɛ ta ata waa banɛ la, ihwungwɛ tuba zhɛ yo gwulo no ofwo Agwatana ata ge shiyeni iŋ la.

⁸Bi'enenji ga hiɛŋ, Iyi tɛgadaga ma tɛgadaga, iyi elele i shɛ tɛgadaga.

⁹Iwɛnɛ bi'enenji ga incɛ, ibɛ po bee mbisegeni atwa iyi nɛ bee mepi. Bi seshi eshi ofwugwo tisho nazhɛ bee menji aŋ, bee shemeni aŋ nu umama 'wanụ.

¹⁰Bi'enenji ga dwelekeci n-ndumwa ma anyingatụ, ama n-ndumwa mu na bee 'nyeci mɛ shɛ n-ndumwa mi tiririri keeni mu na mɛ tɛcara.

¹¹N-ndumwa ma atwa ti'inta mɛ shɛ gana shekwute shɛ na a'iywa-agwụdụ a ngbaraka agwụdụ aba. Eshi na oo sotulonu a shɛ gana okoto na bi'iywa-ba-agwụdụ bu ko gba suje oo to ni iyi ta 'yajɛ ikɛnyi dimi.

¹²Ɛ-yɛu mi ye eyi, na nda pece ni iyi elele nɛ uhwuri inɛ gɛ, atakada ti'nyata zasa uce o, iyi tusoso te hwuleji kaa ya ingɛcɛnga bụtụ.

¹³Tu hwugwa ya iyi elele kpaaŋ. Na sụma Agwatana inyɛsɛ maa na untangana unu ubwa tụpana, iwɛnɛ po ugondu na kiri butugwumwa[12] shɛ ba nda ta.

¹⁴Agwatana zhɛ be suje iyi elele nɛ atwa njɛ no ofwo ụshɛrɛya,[13] ti iyi nɛ aa nda ne tusweci hwɛɛ, okwo yaa zhɛmɛ okwo yaa zhɛshɛ.