Read bassa BI'ENENJI 3 Bible Online

BI'ENENJI 3 - bassa bible

BI'ENENJI 3

¹Iyi elele 'yajɛ aka, iyi elele nɛ aa nda tuta tu uwaŋna ga, i 'yajɛ aka ibɛ.

²Bɛ njɛ aka tumata, na aka tu'wo aka tibila, na aka tudwa ti iyi nɛ aa ga bɛrɛ la,

³aka tụkwụna, na aka tɛnɛnga, aka tuhwuŋzotongo, na aka tumaanana,

⁴Aka u'wo-tutwa, na aka ilɛtu tihinga, aka ụkwụla-tuta, na aka tɛhiɛba,

⁵aka atayɛ tugarataga, na aka atayɛ tusutono, aka bụtụ turuwanɛ, na aka bụtụ tugozhigono,

⁶Aka iyi tudwalakaka, na aka iyi ti'inanga, aka tuswaka, na aka tu'waŋ,

⁷Aka tudwatwaga, na aka tutogono, aka tunama saiɛŋ, na aka n-ndumwa tụdụmanga,

⁸Aka tulubo, na aka i'ime, aka ujasa, na aka amɛ-olom.

⁹Imbe kwuŋ bɛnjɛ-bu-ugondu ba ya ule ibɛ ne tire tu na baa ndaa?

¹⁰N kwụbɛ ụbaụta na Agwatana zweni miaụŋ ma atwa nu bwa.

¹¹Ubwa njɛ iyi elele ta pɛlanụ na aka ibɛ. Ubwa du shiyeni iyi yo oruru na ahaŋsa butugwumwa, ama bụtụ kaa eri shi ba ta iyi nɛ Agwatana nduwa te kwuni nu umozhigo uuwa i ci ukwunanga ugbe o.

¹²Ibɛ po Ngoo to ugbe maa, i zasa iyi elele nɛ ta zhɛmanɛ ya atwa uhwuri unyasa tɛnda keeni maa a na nda iyi ibiye ye elele nɛ ee eri a nda nu uraiŋ wa aba tiya o.

¹³Upwaŋ wa Agwatana du kaa yaa shaananɛ maa bụtụ be elele yɛ maa swa keeni maa amɛ ubwa lemi tedure ne tire te elele tu na baa nda.

¹⁴M mepi maa iyi elele nɛ Agwatana njɛ, i zhɛ ya nama unyizo-nom, i zasa kaa iyi elele nɛ ee eri a kaana iŋ, i zasa kaa du iyi elele nɛ ee eri a munanana ni ibɛ o. Agwatana ubwa njɛ iŋ gana ata maa atwa na sụma bụ inyɛsɛ.

¹⁵Iyi elele nɛ njɛ, nduwa la, inɛɛ nɛ kaa tɛ zhɛ ya nda nduwa la cala. Agwatana a nda maa gɛ ijɛ ɛtɛ ike ike na ndaanana.

¹⁶Ngaa kwụbɛ sasana tuta tu uwaŋna ga, maa ofwo na ụshɛrɛya na teni cɛŋ tụdụma ga shɛ wa nama, ama tugworozwo ya ta nama apata; ofwo na tiririri tɛ ga shɛ ta nama yebe, ama tuba tugworozwo tu namba ya.

¹⁷Ibɛ po Ngaa jɛmɛ na amɛ na amɛ mi, Ngɛɛ hiɛŋ, Agwatana ubwa zhɛ ba duma ụshɛrɛya wa atwa tiririri tu na wo ogworozwo hwɛɛ. Iwɛnɛ po iyi elele zhɛ ya 'yaga aka ibɛ, ugondu we elele kaa zhɛ wa 'yaga aka ubwa.

¹⁸Ngee heŋshi du na amɛ mi, Ngɛɛ hiɛŋ, Agwatana a manga atwa, maa e mepi maa a shɛ gana usunda ehilo.

¹⁹Iyi nɛ yo jitono butugwumwa, ijɛ ɛtɛ ike ike kaa du yo jitono usunda ehilo. Bụtụ bo 'wo, usunda ehilo wo 'wo. Ihwungwɛ ike ike kaa aa 'yajɛ, i zasa iyi elele nɛ bụtụ debeji bee hwuri usunda ehilo. Iwɛnɛ po iyi elele i shɛ tɛgadaga.

²⁰Ofwo oko oko ɛɛ zhɛ, hwɛɛ aba kaa banɛ nu upwupwutu, nu upwupwutu ata kaa du ɛɛ zhɛ o gwulo.

²¹Gaaba mepi gom maa ohwulu bụtụ o mungo na azuba, ohwulu usunda ehilo tuba o tono na cɛnjɛɛ?

²²Ibɛ po Ngaa kwụbɛ maa iyi nɛ kiri zhɛmanɛ bụtụ i shɛ maa ga nda uhwara ni iyi nɛ baa 'yajɛ tedure nu ugondu na baa njɛ, maa ba 'yaga unyasa, iwɛnɛ po urobwo ubwa ta. Gaaba te eri be gwuricinje bu hwuŋ maa bu na kwụba iyi nɛ ya nda na aba ubwaa?