Read bassa BI'ENENJI 4 Bible Online

BI'ENENJI 4 - bassa bible

BI'ENENJI 4

¹Ibɛ po Ngaa mbiyanɛ, Ngaa kwụbɛ tuhwulo tu na aa nda atwa tuta tu uwaŋna ga. Atwa ga aa nda tuhwulo a twa-u'wo, a zasa kaa bụtụ maa ingatanga aŋ o. Atwa na a nda aŋ tuhwulo kaa 'yajɛ ukpahiŋ, ibɛ po aa zasa bụtụ maa ingatanga aŋ.

²Ibɛ po Ngee heŋshi maa atwa na uwo a na hwulwo, e gwoje ee hwuri atwa na ta namɛ a na ta hwungwa.

³Ama atwa na debeji uhwuri aŋ hwɛɛ aba shɛ atwa na ee te meci shi kwukwuŋ, a na ta kwụbɛ shɛ iyi iwɛ nɛ ya nda tuta tu uwaŋna ga.

⁴Nazhɛ Ngaa kwụbɛ maa ugondu tire we elele keeni tugwoni te elele tu banɛ no olugwo bụtụ na ba nda isɛbwɛngwɛ na binya bwa. Ama ijɛ kaa shaananɛ iyi tɛgadaga, i shɛ uvwugo tu'urugono nu usumwa.

⁵Alagwụ o zwono i'ɛlɛ ibwɛ na agba bu na mama ya.

⁶I debeji maa 'yaga iyi nu ukwotwo u'ala uko pwom maa 'yaga amɛ-olom, uhwuri maa 'yaga iyi okwotwo i'ɛlɛ iyebi pwom ne tire tɛnda, na shɛ kaa uvwugo tu'urugono nu usumwa.

⁷Ngaa kwụbɛ sasana iyi ike nɛ shɛ iyi tɛgadaga tuta tu uwaŋna ga.

⁸Bụtụ bu ko namɛ bwooko, bu zasa bụtụ be elele o, bu zasa yɛu, bu zasa kaa yɛu-bino o, ama bu namɛ kaa nu ugondu tɛnda aka elele. Uduciya na baa 'yajɛ kaa twa sụ bụ o. Ubwa kaa heŋteni shi maa, Iwɛ aba kwuŋ Ama nda tire tu ga nom, Ngaa lacɛ maa ma pana u'waba mu ụhinjanụụ? Ijɛ du shɛ iyi tɛgadaga, yaa shɛ du uhwaŋna na zhɛshɛ maa bụtụ nama.

⁹Atwa eyebi zhɛmɛ ee hwuri bụtụ bu ko, iwɛnɛ tɛ ɛ zhɛ a nda tire duwa ee hwuri bụtụ mokondo.

¹⁰Yaa shɛ bụtụ bu ko leyi, bụtụ bi yebi zhɛ bɛ ishicinjɛ bụ. Ama i zhɛ ya wumana bụtụ na bo rungo bwooko, yaa shɛ bee leyi, bu zasa bụtụ maa ishicinjɛ bu o.

¹¹Sasana yaa shɛ atwa eyebi weci, bụtụ bụtụ zhɛ na hwatụ oholobwo binya, ama gana na bụtụ mokondo eri bo gwushigo oholobwo maa hwatụụ?

¹²Okwo bụtụ bu ko eri ba lasụ bụtụ mokondo, atwa eyebi tuba zhɛ o ngozono bu tufwuga. Uhwohwo imɛsɛ itɛtu gwụmɛ tudwa.

¹³I debeji maa bụtụ shɛ usemberi na shɛ bukofwo na kaa incɛ, uhwuri maa shɛ iyɛri nɛ shɛ agwuma na leshiji shi kaa ahaŋsa elele na aa pana bụ.

¹⁴Usemberi gana ata eri wa banɛ okwo nu umwono-tishi maa ba ya tugwama, okwo te e meci bu no tukofwo.

¹⁵Ngaa kwụbɛ atwa elele na namɛ tuta tu ga tu uwaŋna, to o rungo aa 'wa yɛu tisemberi i bụtụ bu ko nɛ zhɛ yo mungo tugwama te bishi bwa.

¹⁶Bi eri ba untangana atwa igbɛɛ ifwugwo, uwaŋnɛ unya tuba ishijɛ hwuŋ iwɛ ubwa zha shɛ ya kwulana aŋ, ɛ zhɛ o jinoko bu. Ijɛ hwɛɛ i shɛ iyi tɛgadaga. I shɛ uvwugo tu'urugono nu usumwa.