Read bassa BI'ENENJI 5 Bible Online

BI'ENENJI 5 - bassa bible

BI'ENENJI 5

¹Na nda pece nu umwono wa Agwatana tutono. Tugwumwongonu keeni tɛshɛlaga, tɛ zhɛmɛ tee hwuri ụrụpɛ tuta na shɛlagwụ. Ibɛ po ee mepi shi maa a nda ba iyi iwɛ.

²Kede unu bu uhwuri izɛlɛgwɛ o; kede kaa du amɛ bụ hwuri a nda kakayɛ ni iwɛ tụdụma na Agwatana o. Agwatana namɛ na azuba, abu namɛ tuba nu unyizo. Ibɛ po ga n-ndumwa mụ bụ mu na gwumwa ufwugwo.

³Gana na ta bụtụ bo wotogono awalabụ ti iyi ifwugwo namanɛ bụ, gana ata du ụlagwụ bụtụ zhɛ wa banɛ tu n-ndumwa mu hwuleji bu ufwugwo.

⁴Yaa shɛ ebi shileni Agwatana unu, ta nda ti'insu ti ibɛ tɛnda o. Iwɛnɛ po Agwatana zasa amɛ-olom na shɛlagwụ o. Nda iyi nɛ ebi shiri-unu ibɛ.

⁵I zhɛmɛ maa genji unu-tishilo, uhwuri maa shiri-unu maa ngwuri uŋ tụtụpa.

⁶To lono maa njɛ iwɛwɛ nu n-ndumwa mu na aba duma o. Iwɛ maa kede i shɛ tumama lashaga hwuŋ ɛbi zhɛ bu mama lashaga na butumwa bu umwono wa Agwatana o,[3] maa hiɛŋ bụ, Ti'ina la Ngaa 'inɛ n-ndumwa mu unu ata tishilo. Iwɛ maa kede Agwatana njɛ isɛbwɛ ne mi, maa nda ugondu na Ngaa njɛ ni i'ɛlɛ mi ufwu o.

⁷Aka na awalabụ a kaana ufwugwo tuwotogono, gobwonu du udumanga wo ohondo wa kaana ufwugwo; ijɛ hwɛɛ i shɛ iyi tɛgadaga. Ama na sụma Agwatana inyɛsɛ.

⁸Yaa shɛ abụ kwụbɛ ta atwa na untanganɛ shihwolu ne ekpeleshi cɛnjɛ a nda okofwo tuhwulo, aa dumanganɛ shɛ aŋ kaa ụshɛrɛya u tishiriri, kede iyi gɛnɛ ɛtɛ ibu dama o. Iwɛnɛ po bụtụ na untanganɛ ohwolu na zeci uhwuri aŋ ba ngbaraka aŋ ba. I ta 'yajɛ ba waa kaa atwa na hwuri aŋ hwɛɛ aba a na untanganɛ aŋ.

⁹Iyimɛyɛ nɛ cɛnjɛ tɛ bɛcinjɛ ibɛ atwa kpaaŋ a ya, okwo shɛgwuma, tijwɛ ti ibɛ du aa datanɛ.

¹⁰Bụtụ be elele na bo lubo ukwuribi, ukwuribi twa sụ bụ kwukwuŋ, bụtụ na kaa bo lubo tɛzhɛgba, iyi twa sụ bụ ti'yaga kwukwuŋ. Ijɛ hwɛɛ i shɛ iyi tɛgadaga.

¹¹Gana na ti iyi nɛ abɛ 'yajɛ ya kaana ugombo, gana ata du atwa na zhɛ na ya iŋ zhɛ na kaana ufwugwo. Asha imbe tuba shɛ urobwo wa agwuma ibɛɛ? Urobwo ubwa ụ shɛ tụkwụba ta ata baa kwụbɛ iŋ ne eshe ubwa kiri.

¹²Malabụ mu latumanɛ bɛnjɛ-bu-ugondu, okwo baa yɛ iyimɛyɛ cwɛŋ kwo kaa duwa, ama uduciya na bɛzhɛgba 'yajɛ leneni shi bu maa bu no woto malabụ o.

¹³Iyi ike i tugwumana iwɛ Ngaa kwụbɛ tuta tu ga tu uwaŋna na, atwa a swaka uduciya wa aba iwɛ ukekeshi geri-be-eshe,

¹⁴Nazhɛ uduciya ata wo tono ya ụdamụ na tihinya tu ko tụ wɛ, bi zha shɛ ba 'yaga hwuŋ ya iyi nɛ maa gangana miaụŋ mu bwa o.

¹⁵Mohondo la bụtụ banɛ na amɛ bino bwa, gana na tu baa banɛ la, gana ata du bɛɛ zhɛ bo hwulonono. I zasa iyi elele bɛɛ zhɛ ba 'waŋna ni i'ɛlɛ ibwɛ ne tire tu na baa njɛ la o.

¹⁶Ijɛ shaananɛ tugwumana tụ wɛ. Gana na bụtụ teni la nu unyizo ga, gana ata du bɛɛ zhɛ ba bananana, imbe tuba i shɛ ya ule tire tu na baa nda la hwayɛ maa ima uvwugoo?

¹⁷Tunama tu bwa tɛ shɛ iyi tiya ne tishi, na amɛ-tụhaŋtụ, na ahaŋsa ofwugwo keeni ụngwụ-tụhwụga.[4]

¹⁸Iyi ike Ngoo to ugbe na: maa i zhɛmɛ, yee teni kaa cɛŋ maa bụtụ yɛ iyi, keeni maa swa iyi elele nɛ baa njɛ tire ti ibɛ maa hwuga ụlatụ nu uraiŋ ga u tikpendere Agwatana peni bu tuta tu uwaŋna ga. Iyi nɛ kiri i shɛ urobwo butugwumwa ta.

¹⁹Bụtụ be elele na Agwatana peni tɛzhɛgba keeni uduciya, bee leneni bu kaa maa ya iŋ, maa hwuga ụlatụ, asha bu gwoje tu baa hwụjɛ ụlatụ iyi nɛ baa njɛ tire ti ibɛ. Inɛ ɛtɛ i shɛ upwaŋ na banɛ no olugwo Agwatana ta.

²⁰Taa ta Agwatana leneni bu baa 'yajɛ unyasa, i zha shɛ ya ta bụ ya iwɛnɛ tu uraiŋ ubwa twa sụ ụnjɛswa o.