Read bassa BI'ENENJI 6 Bible Online

BI'ENENJI 6 - bassa bible

BI'ENENJI 6

¹N kwụbananɛ iyi iwɛ inyɛ tuta tu uwaŋna ga, inɛɛ nɛ kaa i iri atwa.

²Bụtụ na Agwatana peni tɛzhɛgba, tu uduciya keeni ụjɛrụma, yaa zha shɛ kaa ya 'yaga iyi elele nɛ 'nyananɛ bụ nu uraiŋ ubwa, ama Agwatana kaa zha shɛ o lonono bu ya maa hwuga ụlatụ iyi nɛ baa 'yajɛ o. Ama bugaiŋ ya ba ya iŋ maa hwuga ụlatụ ibɛ. Inɛ gɛ i shɛ iyi tɛgadaga, ya gwumana kaa bụtụ tebiye.

³Yaa shɛ bụtụ meci miaụŋ dipi-yebi, baa yɛ uraiŋ gboogbo, gana elele ti bee ilegeji, yaa shɛ baa yɛ shɛ iyi nɛ baa 'yajɛ, ee ni shi bu kaa tuno tụ ụjɛrụma, N hiɛŋ, Okwo yɛu tubasaga debeji yee hwuri bu.

⁴Baa shɛ ya kaa iyi tɛgadaga, bee teni kaa ne tishi, ibɛ tishi tu urigeni izeci ibwɛ.

⁵Okwo tu baa kwụbɛ shɛ uwaŋna, bee te mepi shi du kaa iyi elele. Ubwa kaa 'yajɛ ụhinjanụ waa uhwuri bụtụ ebe.

⁶Okwo baa namɛ shiywa akpakwụ-a-ta kpalụ yebi, bụ hwụjɛ shɛ kaa ụlatụ uraiŋ tiya o. Shɛ urubwo uko waa hŋ ɛɛ zhɛ?

⁷Tire te elele bụtụ ba nda, tɛ shɛ iwɛ unu ubwa kiri, ama kaa iyimɛyɛ ta twa sụ bụ waa o.

⁸Ule imbe kwuŋ bụtụ bi ti'inta 'yajɛ bee hwuri alagwụụ? Ule imbe kwuŋ bukofwo zhɛ ba ya ti bee mepi gana na maa mama nda bee hwuri iyi vwɛ nɛ ya hwungwaa?

⁹Iyi nɛ eshe a kwụba zhɛmɛ yee hwuri urungo tubana iwɛ iyi inyɛ nɛ ma bu dwa eshe. Inɛ gɛ i shɛ du tɛgadaga keeni uvwugo tu'urugono nu usumwa.

¹⁰Iyi elele nɛ namɛ, 'yagawa izeci cala. Iyi elele kaa bụtụ shɛ, o mwopwo iŋ cebe, i zasa kaa bụtụ na eri ba kapana bụtụ be elele na hwuri bu ni ikɛnyi uhwaŋna o.

¹¹Gana na tu n-ndumwa mu hwuleji, gobwonu du maa zasa ule. Ule imbe tuba maa ta 'yaganɛ bụtụụ?

¹²Gaaba eri ba mapa iyi nɛ zhɛmanɛ bụtụ nu uraiŋ ga u tikpendere, na shɛ kaa uraiŋ tɛgadaga, na wa kashɛka gana uhwuŋnuu? Gaaba te eri be mbishe bu iyi nɛ zhɛ ya nda tuta tu uwaŋna ga, tu boo hwulwoo hwuuŋ?