Read bassa BI'ENENJI 9 Bible Online

BI'ENENJI 9 - bassa bible

BI'ENENJI 9

¹Ibɛ po Ngee heŋshi iwɛ ijɛ tebiye na amɛ mi, Ngaa kwụbɛ gana na ta bụtụ bi tiririri, na bụtụ bi ti'inta keeni ugondu wa ba namɛ ni i'ɛlɛ ya Agwatana. Ama i zasa kaa bụtụ na mepi okwo tulubo keeni i'ime 'yacɛ bụ ba o. I zasa kaa bụtụ be elele na mepi iyi nɛ namanɛ bụ nu umbe ubwa o.[6]

²Iyi ike ike ibɛ shileni atwa tiririri no ogworozwo, ta atwa biye, ta atwa awɛ,[7] ta atwa na namɛ rụmbɛɛ, ta atwa na zasa rụmbɛɛ, ta atwa na a ta ụrụpɛ ta atwa na te shi ụrụpɛ. Bụtụ bi biye debeji shi bee hwuri bụtụ bi iwɛwɛ o, bụtụ na to-tuwa debeji shi bee hwuri bụtụ na ba nda inyɛsɛ tuwa-tuta o.

³Iyi nɛ shɛ iyi iwɛ nɛ namɛ ni iyi elele nɛ ya nda tuta tu uwaŋna ga na, ibɛ shɛ maa iyi ike ike ibɛ i zhɛ no jitono atwa hwɛɛ. Gana elele na ta atwa yɛ uraiŋ, iyi iwɛ shini na shihaŋsa sha aba keeni ụmpɛ, eshigiri tu'wo ta shapa aŋ ya.

⁴Ama bụtụ be elele na ta namɛ na atwa na ta hwungwa nu unyizo, bi 'yajɛ ashɛlatụ. Uwɛwɛ nɛ ta hwungwa debeji bee hwuri bizeci na uwo.

⁵Atwa na ta hwungwa mepi maa ɛ zhɛ o 'wo, ama atwa na uwo mepi shi ya kaa du iyi elele o. A zasa ya kaa ule we elele o, iwɛ aba uwo atwa isɛbwɛ hwɛɛ.

⁶Tulubo ta aba, ti i'ime ya aba, ti isɛbwɛngwɛ ya aba 'wi du na aba hwɛɛ. A zha shɛ a nda ya iyi elele nɛ atwa vwɛ a nda tuta tu uwaŋna ga o.

⁷Mizha ya iyimɛyɛ bu na amɛ-olom, swa meni mụ bụ mụ tụ 'walụ ta afwafwa maa 'yaga amɛ-olom, iwɛnɛ tu ugondu bu teneni Agwatana cɛŋ.

⁸No urugono i'wɛŋnɛ nɛ cɛnjɛmɛ aka elele, na sụkwụtwa uhiuhiu bu manɛbɛ ɛgbɛɛ.

⁹Na nama nu unyasa no biyikwo ata ebu lubi na tunama tụ bụ nu uraiŋ ga ụ shɛ iyi tɛgadaga, u ga Agwatana ubu peni tuta tu uwaŋna ga. Na nda unyasa ni ijitɛ gɛ i tɛgadaga, iwɛnɛ po iyi nɛ kiri i shɛ urobwo bu ne tire tu na aba nda tuta tu uwaŋna ga ta.

¹⁰Iyi elele nɛ aba nda, na nda iŋ gana elele na tu ukpahiŋ bụ namɛ hwɛɛ, iwɛnɛ tu ugondu tɛnda, ni iwɛ tuhaŋsa, ni iyi-tumapa, keeni ti'inta zasaba ya nu nhwaŋ-me-e'uye, na shɛ ofwo na ɛbi zhɛ.

¹¹N kwụbananɛ inyɛwɛŋ tuta tu uwaŋna ga, maa shɛ ga atwa na 'yebi usumwa izɛlɛgwɛ kiri a ya tumanga tu usumwa o, shɛ ejeshi ujasa a na 'yajɛ ukpahiŋ kiri a lasụ nu ujasa o, shɛ atwa na incɛ kiri a 'yaga iyi maa a na ya uraiŋ o, shɛ atwa na 'yajɛ ahaŋsa kiri a sha azhɛgba o, shɛ atwa na teni cɛŋ kiri o mungo no ohwolu a'wụtụ o, ama uwaŋna ụwɛ keeni ikpɛsu yo jitono bụtụ be elele.

¹²Shɛ inɛ ɛtɛ kiri o, i zasa bụtụ na mepi aka ubwa o. Gana ụnụnụ na aa 'imɛ nu ugwuru eshigiri, kwo kaa gana ta bijana na aa 'imɛ ni igwune ya amiaụŋ, gana ata du aka awɛ a ima miaụŋ ma atwa eshigiri gana ugwuru zawa tumapa ta aba.

¹³I 'yajɛ inyɛwɛŋ nɛ Ngaa kwụbananɛ nɛ shɛ tusakana ta ti'inta tuta tu uwaŋna ga, i n shanɛ kaa iyi nɛ n tatụlanụ duwa.

¹⁴Ụshɛpwụ uko u ticwɛŋ namba la atwa twa sụ ufwugwo nu bwa o. Agwuma oko ukpahiŋ zhajɛ bee hweri uŋ boo rungwutwonu, baa jala maa e bweji uba ubwa maa e teni uŋ.

¹⁵Bukofwo bu ko na incɛ tebiye namba nu ụshɛpwụ ata, ubwa bicinji atwa ụshɛpwụ ata, ama i zasa kwukwuŋ bụtụ na teyinje ya iwɛ ubwa.

¹⁶Ibɛ po Ngɛɛ hiɛŋ, Ti'inta tɛ zhɛmɛ tee hwuri ukpahiŋ, okwo ti yaa zasa yibwa bụtụ na teyinje iwɛ bukofwo ata kwo kaa peni abashɛ iwɛ ubwa.

¹⁷I zhɛmɛ maa bụtụ shɛlaga n-ndumwa mu tusaiiŋ mu na bụtụ bi ti'inta jɛmɛ, uhwuri maa bụtụ shɛlaga n'ungwa mu na agwuma a kala na ashashɛ shɛlagwụ.

¹⁸Ti'inta tɛ zhɛmɛ tee hwuri i'wɛŋnɛ ujasa, ama bụtụ bi iwɛwɛ bu ko gba kaa eri ba nda iyi ibiye ifwugwo ufwu kpaaŋ.