Read bassa AZUNGA SHƐZUNGA 4 Bible Online

AZUNGA SHƐZUNGA 4 - bassa bible

AZUNGA SHƐZUNGA 4

¹E-keke mi ya agba, hioko de gana na abụ pilanụ tebiye! Ụzhɛ ụpɛshɛka bụ wa ta na amɛ owowo ata ebu urigeni. Tihiŋzhe tụ bụ ta nda yayaya gana iyweywe nɛ ye zwe Ishɛmɛ Giliad.

²Ene bu cɛnjɛmɛ gana agwụdụ na aa hwajɛ tihiŋzhe, ana aa nyashɛnjɛ, kpaaŋ aba kaa meci ɛdɛngwurɛbɛ. I zasa ma ru na ru mushingwo okwo ru ko; a ta ulwa hwɛɛ aba.

³Ihwumbwe bu i shɛ gana ihwehwe ishenje, i zhɛmɛ tebiye ta aba njɛ n-ndumwa. Agawa bụ a ta hongo hongo gana igbɛlɛ, no owowo ata ebu urigeni.

⁴I'ilu bu i shɛ gana ashɛkpa Devid, i namɛ kiriri, yee gbelemi[8] yaa shanɛ shɛgba shɛ na shɛ shɛ gana shabula shu ujasa akpakwụ-a-ta.

⁵Osubo bu shɛ gana oywoywo shɛnabara, gana ɛdɛngwurɛbɛ ilibɛ nɛ ya ya iyi na ashashɛ modwodwo mi ishɛkpɛcɛ.

⁶N zhɛ ma nama ni ishɛmɛ ɛtɛ oo hwoŋzhingo iturɛre muru, keeni bikpekwu ata oo hwoŋzhingo iturɛre ụhiụŋ ụlatụ, uuwa i ci aka na ti iyi suji kpataa, mpiala mu uvwungwa mo hwulo lololo.

⁷E-keke mi ya agba, bu pilanụ tebiye, bu zasa unu-tusapa o!

⁸E-biyikwo mi bu ufwo, banɛ nu nshama mu Lebanon tu hwuri; banɛ ni Lebanon maa zhajɛ pi mi. Kezhe ni ihiŋhiŋ ishɛmɛ[9] ɛtɛ ɛɛ hiɛŋ izeci bɛ, Amana; kezhe du ni ihiŋhiŋ ishɛmɛ Sɛni keeni ishɛmɛ Hɛmon, mu na mɛ shɛ ofwo na izeci, ne egebi o woto na apangwụ aba.

⁹E-biyikwo mi bu ufwo, a-bụngwụfwụ mi, na tɛtajɛ ahaŋsa mi, igbɛtɛtɛ ye eshe bu keeni shɛgba sha ata abụ shanɛ ni i'ilu bu, shɛ ma n insa hwɛɛ.

¹⁰E-biyikwo mi bu ufwo, a-bụngwụfwụ mi, tukwulana tu na abu n kwulanganɛ ti n ce tebiye. Bu n kwụlanɛ duwa ebu hwuri meni mụ tụ'walụ ta afwafwa; ụlatụ bụ na Ama hwụga uhwuri ụhiụŋ iturɛre elele.

¹¹E-biyikwo mi bu ufwo, ụlatụ iswɛ namɛ ni ihwumbe bu; bụratụ bụ n shanɛ gana iswɛ keeni mosubo. Tugwuno tụ bụ ti 'yajɛ ụhiụŋ ubiye Lebanon.

¹²E-biyikwo mi bu ufwo, a-bụngwụfwụ mi, bɛ shɛ gana itimɛ i tusweci, itimɛ nɛ oo rungwutwonu nu uba, nɛ 'yajɛ umɛzhinjɛ ticinji;

¹³iyi ya saba apata tebiye. Iyi ya waŋna ni bɛ gana itimɛ nɛ aa hwɛŋ apomegranati, a na a 'wala tụ'walụ ti biye. Modwodwo mu na ɛɛ hiɛŋ, Hena keeni manɛbɛ mu nad mu 'nyanɛ shɛ o,

¹⁴manɛbɛ mu nad keeni iyi nɛ ɛɛ hiɛŋ Safron, tu calamus keeni cinamon hwɛɛ, ti iturɛre iyiri elele 'nyanɛ shɛ apata o. Iturɛre muru, na alos, ya waŋna apata hwɛɛ, ta ambɛ na 'yajɛ ụhiụŋ ụlatụ.

¹⁵Gabụ bɛ shɛ gana ɛmɛzhinjɛ ata o zwogono itimɛ meni, keeni ohwulwo na meni ma fwunga[10] keeni nsoso mu na meni ma muba ma banɛ nu nshama mu Lebanon.

¹⁶A-mpiala mu tuzuba, zhinjɛ. A-mpiala mu tuta, zhaga vwungo ni itimɛ mi; ga mpiala mu suji ụhiụŋ biye maa mu mburusonu mu. Ga bụtụ mi bu tulubo zhajɛ ni itimɛ ɛtɛ ibwɛ. Maa ya tụ'walụ tu na ti ngezeni hwɛɛ na amɛ ibɛ.