Read bassa AZUNGA SHƐZUNGA 6 Bible Online

AZUNGA SHƐZUNGA 6 - bassa bible

AZUNGA SHƐZUNGA 6

¹E-biyikwo ga ngezeni a na vwɛ nụ ụzhɛ. Cee bwolo ata bụ bu tulubo hwurii? Iti mbishi uhwaŋna na bwolo ata bụ bu tulubo to, iwɛ maa to bu mbiyono bu urungo.

²Bwolo ata mi bu tulubo ipi ne ehilo ubwa, no ofwo ata ambɛ na 'yajɛ ụhiụŋ ubiye shikekeni. Ba pana ba iyi bwɛ mabiga iyimɛyɛ ne ehilo, bee cwe modwodwo ma ata mi ishɛkpɛcɛ.

³Bụtụ ata mi bu tulubo, bɛ shɛ bi nee mi, Ngaa shɛ du bu na bwa, ba pana ba iyi bwɛ mabiga iyimɛyɛ na ashashɛ modwodwo ma ata mi ishɛkpɛcɛ.

⁴E-keke mi ya agba, bu pilanụ tebiye gana Jɛrusalɛm, iwɛ bụ i n kwụlanɛ gana Tiza na shɛ ụshɛpwụ ata ụ'wụtụ, iwɛ bụ ce ahaŋsa mi tebiye, gana ejeshi ata o vwurongo n-ngarɛga ma aba[13]

⁵Ta ma ngbaraka o, pana eshe bu beye, eshe bu mo n holono. Tihiŋzhe tụ bụ ta nda yayaya gana iyweywe nɛ ye zwe Ishɛmɛ Giliad.

⁶Ene bụ cɛnjɛmɛ gana unyama wa agwụdụ na aa ta nyashɛnjɛ beyi beyi. Kpaaŋ aba kaa meci ɛdɛngwurɛbɛ, I zasa kaa ma ru na ru mushingwowo okwo ru ko, ama a ta ulwa hwɛɛ aba.

⁷Agawa bụ a ta hongo hongo gana igbɛlɛ na amɛ owowo ata ebu urigeni.

⁸Okwo agwuma zeni eyikwo dupu-ne-eshe-umpwa, baa 'yajɛ eyikwo magɛgashɛ dupu-nu-talacɛ, keeni showo shɛ na shi te mepi shi etwenyi, shɛ na shi zasa tɛrɛta!

⁹Ama ikwucime mi, na shɛ bụtụ mi, bwooko gbalụ kiri n kwụlanɛ, ubwa du kaa Ngee lubi gana elele. Bwooko gbalụ bino bwa meci, bɛ shɛ yɛu nɛ bino bwa bo lubo duwa. Eyikwo vwɛ kwụbɛ bụ, aa dumanga bụ. Eyikwo agwuma, ne eyikwo ubwa magụgashɛ to bu azunga ashɛtwa.

¹⁰Gaaba na kwuuŋ ba nda igbɛtɛtɛ mbowu mbowu gana iyi nɛ ye sujee? Bu pilanụ, baa ta rawụ rawụ gana uhioko-uhwaŋna uwaŋna kwo kaa una upiana. Igɛhi ibwɛ i shɛ gana n-ngarɛga me ejeshi[14]

¹¹M beni Ngee zwi nu ulomu ata, maa Mɛ kwubɛ i'wɛ'wɛ ya ɛtɛ ya 'wala ni itimɛ ɛtɛ, maa Mɛ kwubɛ du tusaba ta afwafwa, keeni tusumbo ti i'wɛ'wɛ apomegranati.

¹²M peni shi abashɛ na aka na ta tukwulangana ti mi ti n shikicinji na amɛ ụhaŋtụ ujasa[15] u miaụŋ mu tugwama ma atwa mi o.

¹³Ɛ-yɛu-yo-o Shulam, gwure, gwure[16] no ofwo tu, gwure, gwure maa to bu zwono igbɛtɛtɛ. Iwembe po ahia jala maa hi ngbarakaka yɛu-yo-o Shulam tu baa hiɛba tɛhiɛba na ashashɛ orubwo azụnjɛ eyebii?