Read bassa AZUNGA SHƐZUNGA 8 Bible Online

AZUNGA SHƐZUNGA 8 - bassa bible

AZUNGA SHƐZUNGA 8

¹Abụ ga shɛ kiri yebe ikwenyi mi, maa i shɛ yebe mosubo mo bino mi kiri ebu ge subi. Yaa shɛ Ngaa nga twa na bụ nu uhwaŋna, N ngɛ zhɛ ma bụ ruwanɛ maa mo kwutongo unu mu nu unaa bụ, i zasa bụtụ gɛ zhɛ ma ngbaraka yebe cwɛŋ o.

²N ngɛ zhɛ ma bu shapa yebe nu umwono bino mi, apata ɛbi gɛ zhɛ bu mo mbisogono[23] iyi nɛ shɛ tulubo. N ngɛ zhɛ ma bụ pana meni mụ tụ'walụ ta afwafwa mu na ee zweni manɛbɛ mụ ụhiụŋ ụlatụ, te meni mụ tụ'walụ ta afwafwa mu na aa njɛ na apomagranati maa swe.

³Maa Ma patana uhiuhiu mu nu u'ala ubwa ugwulwo, maa ma n ruwanɛ tuba nu u'ala ubwa ubiye.

⁴Ahiɛba eyikwo Jɛrusalɛm, Ma hi tabwa, maa kede hiɛ karɛ iyi elele nɛ zhɛ yo sukwutogo tukwulangana tu na atu mama kwulanganụ o.

⁵Gaaba ye kwuuŋ banɛ nụ ụshɛka be cii? Bu gata wetiteni bụtụ bwa bu tuluboo? Biyikwo Ata Hiɛŋ, Nu ucilo ụ'wụ'wụ ata ɛɛ hiɛŋ, Apul Ngɛɛ bi zhingicinjɛ, apata go nobu le ofubo bu, apata kaa du baa njɛ tulumongwu nazhɛ bee bi meci.

⁶N sweni na amɛ bụ, gana useyida, keeni useyida na swanɛ nu uragbamụ bụ. Tulubo ti 'yajɛ ikɛnyi gana tu'wo, Isɛbwɛngwɛ tuba ya twala iyi gana u'uye. To gorogo gana bụratụ bu ulwa[24] too hwoŋno rowu rowu gana ulwa na 'yajɛ ikɛnyi.

⁷Meni mu ufwugwo mi eri shi mo 'woricingo tulubo; i zasa kaa meni mu na mi eri ma zhagajɛ maa mu suji tu. Ama yaa shɛ kaa bụtụ mekeni maa sa tulubo nu uduciya ubwa hwɛɛ, asha ụpụrụsa zhɛ wa sha iyi nɛ bee ge peni maa sa tụ.

⁸Tɛ 'yajɛ bụngwụfwụ na ta gwumwa, na ta bwadajɛ mosubo. Yaa shɛ bụtụ zhajɛ maa duma ulapiya ubwa, gana na ɛti zhɛ ta nda iwɛ ubwaa?

⁹Yaa shɛ baa ga shɛ uba, ti gɛ zhɛ ta mana bụ ashɛkpa azụrụfa. Ama yaa shɛ baa ga shɛ kaa odubo, ti gɛ zhɛ ta kapa bụ nu ukpa wo osobu.

¹⁰Uba kaa Ngaa shɛ, mosubo mi mi mu ba kaa mɛ shɛ shɛshɛkpa shɛ uba ata. Bụtụ mi bu tulubo mepi maa ubwa n gwumwa, Ngaa 'yajɛ du kaa amɛ-olom nu bwa.

¹¹Go Sụlụmụn 'yajɛ itimɛ ya afwafwa no ofwo ata ɛɛ hiɛŋ Baal-hamon. I 'yajɛ atwa na a ngbaraka iŋ, bu na bu na ba tụpa azụrụfa akpakwụ-a-ta iwɛ tụ'walụ ta aba.

¹²Ama itimɛ ɛtɛ i shɛ inee mi! Urobwo wa atwa na a ngbaraka tụ'walụ ti bɛ ụ shɛ azụrụfa kpakwụ; O-Sụlụmụn, gabụ bi 'yajɛ azụrụfa ata akpakwụ-a-ta.

¹³Oo gabụ na bu namɛ ni itimɛ ɛtɛ, eyejilo mi a jala maa a shɛlaga rụhwụŋ rụ bụ ni itimɛ ɛtɛ. Ga ma hwuga du rụhwụŋ ra ata rụ bụ.

¹⁴A-bụtụ mi bu tulubo, zhajɛ ya pi mi kakayɛ gana unabara, gana biywoywo ba bụlụba na namɛ ni ihiŋhiŋ ishɛmɛ ɛtɛ nvwanga mi ibɛ mi 'yajɛ ụhiụŋ ụlatụ.