Read bassa AYIZAYA 1 Bible Online

AYIZAYA 1 - bassa bible

AYIZAYA 1

¹Ozobu na ga Ayizaya yɛu-ye-eyi Amoz kwụbɛ[1] iwɛ iyi nɛ zhɛ yo jitongono atwa Juda nu Jɛrusalɛm, na aka na ata Uzia, no Jotam, na Ahaz keeni Hɛzɛkia yɛ tugwama tu Juda.

²AGWANGWAMA hiɛŋ, Oo gabụ cɛnjɛ tu unyizo, hwuga, oo gabụ azuba shɛlaga! Miaụŋ mu na Ngɛɛ wɛŋnicinjɛ mi n teni tigezhe.

³Buna mepi agwangwama ubwa, izhinyɛci mepi ofwo na agwangwama ubwa a pana bu iyimɛyɛ, ama atwa mi Isrɛl mepi shi, e eshiciji shi kaa iyi elele o.

⁴Ahiɛba udenji ga hi nyiwoŋnowuŋ ni iwɛwɛ, ahiɛba atwa ga iyi iwɛ tecinji ụdamụ, iwɛwɛ hiŋ me hi mbombilo! Ehi jineci AGWANGWAMA, ahiɛ ngbaracɛ Bụtụ ata bi Tijilo bi Isrɛl cwɛŋ, ahiɛ panɛ bụ shɛba shi hiŋ.

⁵Iwembe kwuŋ po ehi to tuhwulo ne tigezhee? Hia jala suu maa e hi peni ulwapɛ? Ahiɛba atwa Isrɛl, hi olwo-ụngwụ nu uhiuhiu hiŋ hwɛɛ, ugiriri kaa u hi keri hwɛ hwɛɛ hiŋ.

⁶I zasa ofwo elele tu'waba ti hiŋ ti 'yajɛ ulapiya o, te kwune nu uhiuhiu uuwaa i ci ohwulu uvwuna hiŋ. Iyi gwudarajɛ tu'waba ti hiŋ hwɛɛ, ahiɛ 'yajɛ andala na tu'waba ti hiŋ hwɛɛ, iyi rukwuteji du tu'waba ti hiŋ hwɛɛ. A nyashɛnjɛ shɛ kaa andala ata hiŋ o, e umpi shi aŋ kaa o. I zasa kaa unibi me elele ee hi liseni na aba o.

⁷U'una hiŋ shɛ osombo, ee hwoŋzhenji ashɛpwụ hiŋ a'wụtụ a'wụtụ kwunduu. Ne eshe hiŋ kaa agaiŋ zhajɛ ee hi leshiji cɛnjɛ ti hiŋ, aa njɛ tụ osombo.

⁸Asha Jɛrusalɛm kiri vwɛ ya, gana idile nɛ oo to ne ehilo afwafwa gana uhwuŋnu na aa njɛ ne ehilo na aa hwɛŋ tugbongo, gana ụshɛpwụ na ee hweri oo rungwutwonu.

⁹Yaa shɛ AGWANGWAMA na Hwuri Kpaaŋ ga njɛ shɛ maa atwa oko na amɛ aba benengeni, asha ɛ gɛ zhɛ a nda atwa Jɛrusalɛm ufwu hwɛ hwɛɛ, gana na aa njɛ la Sụdụm keeni Gụmụra.[2]

¹⁰Ahiɛba ehiu Sụdụm, hwulaga ma n-ndumwa mu na AGWANGWAMA a njɛ ne hiŋ, ahiɛba atwa Gụmụra, pana ma abashɛ ni iyi nɛ Agwatana tu me hi mbisogono.

¹¹Bi hiɛŋ, Hi heŋshi ree maa Ma jala arụpɛ ga ofwugwo ahi Ma m pana? Adagba na ahi ma m pana arụpɛ tuhwoŋzhingo, ta manɛbɛ mi iyimabiga hiŋ nɛ zhɛmanjɛ, mu n hwuleji ya du. N lukwumi ne mehieŋ mi inɛ ye eyi, na mu na mu miaụŋ-ma-agwụdụ keeni mu na me epi.

¹²Gaaba kwuŋ ihi hiɛŋ n 'waŋnanɛ ma ijɛ na aka na ehie ci maa hi mɛmɛ bɛcinjɛ pi mi, maa hi no rukoto umwamwa muu?

¹³Ta na ma 'waŋnanɛ ma ya ijɛ ɛtɛ ụrụpɛ i tɛgadaga o. Iturɛre hiŋ i n shanɛ ya iyi-tupwaŋ. Iwɛwɛ hiŋ tecinji tụ'ụlwatagwụ ti hiŋ ụdamụ, ti isene upiana ufwo, ti inɛ Ụjita-ụhinjanụ, ta tụ'ụlwatagwụ ti hiŋ ta bụtụ ata ahia zhɛba, N eri shi ma mbiyanɛ tu ya o.

¹⁴Mo imo isene ɛtɛ hiŋ upiana ufwo keeni ijitɛ ɛtɛ i tijilo nɛ ahia nda, i shɛ i'wɛŋnɛ nɛ Ngee lukwumi tu'waŋna.

¹⁵Aka na ehi suji i'ɛlɛ hiŋ na azuba, N zha shɛ Ma hiɛ mbiyanɛ o, okwo gana elele ahiɛ njɛ shidua, N zha shɛ ma hwuga o, iwɛnɛ ti i'ɛlɛ hiŋ i shɛ ge mehieŋ.

¹⁶Mama njɛ ma shɛshɛshɛ, maa hi becinji iyi iwɛ nɛ ahia nda. Ganga ma iyi iwɛ tɛnda.

¹⁷Soso ma iyi nɛ teni cɛŋ tɛnda. Ga shɛ ụshɛrɛya u tishiriri ahia duma, no mbiyono ma atwa na aa nda umungwuta[3] pana ma miaụŋ me e'weteji iyi elele nɛ i shɛ inɛ aba, hi no mbiyono olulo.

¹⁸AGWANGWAMA hiɛŋ, Zhajɛ ma ti heŋshi ma zhiaaŋ. Okwo iwɛwɛ hiŋ shenjemi howuu, i zhɛ ya cɛnjɛma paawụụ gana bizhe[4] Okwo yee shenjemi gana biza, i zhɛ ya cɛnjɛma paawụụ gana egbeyi ụgwụdụ[5]

¹⁹Yaa shɛ yaa hiɛ kwụlanɛ maa hiɛ hwụjɛ-unu mu, asha ahiɛba hi zhɛ hia ya iyi ibiye nɛ cɛnjɛ tu ga tɛ bɛcinjɛ.

²⁰Ama yaa shɛ kaa ahiɛ lacɛ, ahia ta waa tigezhe, asha utokwobi ubwa zhɛ wa nda iwɛ hiŋ, Gamba AGWANGWAMA N dumwa.

²¹Kwụba ma gana na tụ ụshɛpwụ ala tɛcara ụ shɛ ya gana buwɛle! Na aka oko atwa tiririri aba shini la nu bwa, aa duma ụshɛrɛya u tishiriri, ama hwuwayɛ go akwụnɛ-atwa, aba zweni ya nu bwa.

²²Gabụ Jɛrusalɛm, bɛ shɛ la gana azụrụfa, ama hwuwayɛ go bɛ shɛ ya gana ụshɛmbɛrɛ na 'wi, bɛ shɛ la gana meni mụ tụ'walụ ta afwafwa, ama hwuwayɛ bɛ shɛ ya gana meni mụ tụ'walụ ta afwafwa mu na ee hiŋtetenji ne meni mo ohondo.

²³Shɛgwuma shɛ bụ shɛ shɛ atwa tigezhe keeni eyejilo ozundo. A namɛ na apwaŋ keeni ukwuribi ugworo tɛlashaga. E lesheji shi miaụŋ me e'weteji nu umwono ụshɛrɛya o, kwo kaa olulo e leni shi maa a na shɛlagana aŋ ta a 'waŋnɛ n-ndumwa o.

²⁴Iwɛbɛ po shɛlaga ma iyi nɛ AGWANGWAMA na Hwuri Kpaaŋ, na shɛ Agwatana Isrɛl na 'yajɛ ukpahiŋ ba duma: Bi hiɛŋ, N zhɛ ma tụpana atwa i'ime mi maa Ma banangana aŋ.

²⁵N 'yajɛ iyi nɛ Ngɛɛ zhɛ ma bu nda, N zhɛ ma bu nyashɛnga gana na aa nyashɛnga ụshɛmbɛrɛ nu ulwa, N zhɛ ma nyashɛnga tiri tụ bụ hwɛɛ.

²⁶N zhɛ me bu gwuricingeni ajɛmɛ-ụshɛrɛya keeni ajɛmɛ-ushaura gana na ta bu 'yajɛ la cala, nazhɛ ɛɛ zhɛ ɛ hiɛŋ, Jɛrusalɛm shɛ Ụshɛpwụ tiririri keeni Ụshɛpwụ tɛcara.

²⁷Iwɛnɛ ta AGWANGWAMA shɛ Bɛjɛmɛ-bụ-ụshɛrɛya bi tiririri, iwɛbɛ po bɛɛ zhɛ be gwube Zayon, ta bụtụ be elele na namba apata na jɛshɛrɛjɛ-ahaŋsa.

²⁸Ama bi zhɛ bo iricingo atwa tigezhe keeni atwa na a nda bu iwɛwɛ; bɛɛ zhɛ ba nda atwa elele na jineci bu ufwu.

²⁹Ezuye zhɛ ma hi sha iwɛnɛ ahia zhɛba i'wɛ'wɛ ye ekpekpeshi, ụpụrụsa kaa zhɛ ma hiɛ sha iwɛ ntuma ma ata ehi teri na adatụ hiŋ.

³⁰Hi zhɛ hia lụmba gana ambɛ ukpekpeshi ata keeni gana iyi nɛ aa bɛrɛ ni itimɛ ɛtɛ ee zwegeni shi meni.

³¹Gana na ta bubabazhɛ bu ulwa bo hwoŋzhingo alaamɛ, gana ata du iyi iwɛ nɛ atwa na 'yajɛ ukpahiŋ a nda zhɛ ya nda aŋ ufwu. I zasa kaa bụtụ be elele na zhɛ ba ala maa ngwuricingo ufwu aba tɛnda o.