Read bassa AYIZAYA 11 Bible Online

AYIZAYA 11 - bassa bible

AYIZAYA 11

¹Tusaba tu ko ti zhɛ ta sabɛ nu ukwudungwuru Jɛsi[43] a'walụ oko zhɛ ɛ unshɛ ne tini tu bwa.

²Mpiala ma AGWANGWAMA mi zhɛ ma patana nu uhiuhiu ubwa, muba mɛ shɛ: Mpiala mi ti'inta, na mu na mi iyi ti'eshicigo, Mpiala mu ushaura, na mu na mu ukpahiŋ; Mpiala mi iyi-tumapa, na mu na mi inyɛsɛ tụsụma AGWANGWAMA.

³Bi zhɛ ba 'yaga unyasa ni inyɛsɛ tụsụma AGWANGWAMA. Bi zha shɛ na duma ụshɛrɛya ubwa ni iyi nɛ baa kwụbɛ kwo kaa inɛɛ nɛ baa hwụjɛ o.

⁴Ubwa zhɛ ba dumangana okofwo ụshɛrɛya u tishiriri, bɛɛ zhɛ na kwunangana atwa tusaiiŋ unyizo ga ụshɛrɛya wa aba te teni cɛŋ. No bukwuto bu unu ubwa bɛɛ zhɛ na pana atwa unyizo ulwapɛ; ni ihwungwɛ nɛ ya banɛ ni inyɛnu ibwɛ bɛɛ zhɛ ba kwụna ogworozwo.

⁵Tishiriri tuba ti zhɛ ta sha umazhɛya ubwa, tɛcara tuba ti zhɛ ta sha amila embi ubwa.

⁶Ogwusu na agwụdụ zhɛ na nama urubwo uko na amɛ-olom, Ugebi zhɛ no wotogo no oywoywo iyweywe. Oywoywo inɛ ni izeci zhɛ na ya iyimɛyɛ urubwo uko, Miaụŋ mu tuweewee[44] aba zhɛ na ngbaraka aŋ.

⁷Inɛ ne ecwee zhɛ na ya iyimɛyɛ urubwo uko, oywoywo inɛ ne ecwee ata zhɛ no wotogo urubwo uko na amɛ-olom. Izeci zhɛ na ya ambɛ gana inɛ.

⁸Yɛu nɛ to subo zhɛ na nanga tụlagwụ nu u'ibwa uluwu; yɛu nɛ te jwe unu no mosubo zhɛ na kalanga u'ala nụ ụpangwụ ugbezhi, a zha shɛ a nda aŋ kaa iyi elele o.

⁹I zasa iyi mazhanga kwo kaa iyi iwɛ nɛ zhɛ ya nama ni Ishɛmɛ ɛtɛ tijilo Zayon o, AGWANGWAMA tumapa zhɛ bala na cɛnjɛ te elele, gana na te meni mu ubi ni itekwu.

¹⁰Ụjita we ci ba, te bini ata Jesi zhɛ bo shikono, bɛɛ zhɛ ba shana atwa igɛrigɛ. Edenji zhɛ na dwalakaka bụ maa a mụnɛ bụ ụjɛrụma.

¹¹Yaa shɛ ụjita ata ci hwuŋ, AGWANGWAMA zhɛ ɛ bɛcinjɛ atwa ubwa a na to kwu ni Siria keeni Ijipti nu ukpahiŋ ubwa, ta atwa na to kwu na cɛnjɛ tu Patrus, ti Itiopia[45] ti Ilam, tu Babulon, tu Hamat, ta adakwụ itekwu[46]

¹²AGWANGWAMA zhɛ a shapɛrɛgana aŋ igɛrigɛ na azuba maa i shanɛ edenji useyida maa bi zhɛ ba 'wananjɛ atwa ata ubwa Isrɛl na atwa Juda, ba bacanjɛ aŋ ne esugwulumi e neshi unyizo.

¹³Isɛbwɛngwɛ ya atwa Isrɛl zhɛ yo hwuwowu, ɛ zhɛ a bacɛnga atwa i'ime Juda. Atwa Isrɛl zha shɛ na nda ya isɛbwɛngwɛ na atwa Juda o, atwa Juda du kaa zha shɛ ata ya atwa Isrɛl ni i'ime o.

¹⁴Ɛ zhɛ o togwu a sukakana Afilistia geri bu uwaŋna-twonuo, ɛɛ zhɛ o sugo atwa na namɛ geri bu uwaŋna-banụ. Ɛ zhɛ a lasụ atwa Idụm, na Amoab, A'amon zhɛ a hwuga-unu wa aba.

¹⁵AGWANGWAMA zhɛ a hwuŋcɛnga ihiŋhiŋ itekwu Ijipti, bɛɛ zhɛ ba tumwana uvwugo na vwengenji maa u hwụŋcɛnjɛ Urefu Yufretis[47] Bi zhɛ ba waŋpana ohwulwo ticwɛŋ cwɛn e cenje, iwɛ maa bụtụ be elele eri tikɛshɛ.

¹⁶Uhwaŋna tukpotoo zhɛ wa namana atwa Isrɛl na Asiria maa a banɛ, gana na tu wa namanɛ la ogwunukwoshi aba aka na taa banɛ ni Ijipti.