Read bassa AYIZAYA 13 Bible Online

AYIZAYA 13 - bassa bible

AYIZAYA 13

¹Utumwa na Agwatana tumwanɛ Ayizaya yɛu-ye-eyi Amoz iwɛ atwa Babulon na: utumwa ata hiɛŋ.

²Shapa ma igɛrigɛ ujasa na azuba ni ihiŋhiŋ ishɛmɛ nɛ cɛnjɛ ti ibɛ tu 'wi! Uganana ma ejeshi ata; ndana aŋ ma useyida nu u'ala tɛshapa na azuba maa e mepi maa o twonuo shidubo shɛ ụshɛpwụ atwa ụjɛrụma.

³Gamba ni ikɛnyi mi m pwonuo atwa mi tijilo unu, Ngaa suywanua ejeshi mi a na 'yajɛ ikɛnyi maa a njɛ isɛbwɛ iwe mi, aba shɛ atwa na a bwada unyasa tu Ngaa lasụ.

⁴Hwulaga ma rundu ru na ru namɛ nu nshama, rundu ru unyama ụ'wụtụ 'wụtụ, rundu re edenji, na atwa cɛnjɛ cɛnjɛ a na ụlwatagwụ. AGWANGWAMA na Hwuri Kpaaŋ a imanganga ejeshi ubwa iwɛ ujasa.

⁵Ɛ zhɛ a banɛ na a'una na dụlụmanjɛ, taa nu ukwunanga unyizo. AGWANGWAMA e ci ba na tumama ima ti isɛbwɛ ibwɛ maa nda u'una ata ufwu hwɛɛ.

⁶Kwuno ma tijirongwu nụ ụngwụ-tuhwuga! Ụjita wa AGWANGWAMA gwumwonu, ubwa shɛ ụjita ata AGWANGWAMA na Hwuri Kpaaŋ[49] zhɛ a 'waŋnɛ ti'iricingo tu u'una ata hwɛ hwɛɛ.

⁷Ibɛ po atwa zhɛ o utogo unu aba ni i'ɛlɛ ya aba, ahaŋsa bụtụ be elele zhɛ a garatagwụ.

⁸Inyɛsɛ zhɛ ya ima aŋ, nazhɛ ụngwụ na aa hwuga zhɛ wa lasụ aŋ, gana biyikwo na ụngwụ tumata to. Ɛ zhɛ momo zwononu igbɛtɛtɛ ni inyɛsɛ, shishe sha aba shi zhɛ shi no gorogo gana ulwa.

⁹Ụjita ata wa AGWANGWAMA we ci ba, ụ shɛ ụjita wa amiaụŋ keeni isɛbwɛ i movwo. Bi zhɛ ba nda unyizo osombo, bɛɛ zhɛ ba nda bụtụ-bi-iwɛwɛ be elele ufwu.

¹⁰Ikpɛsu ye elele, ta ayiwale, zha shɛ a ta o, uwaŋna zhɛ wo 'wo tishi tu waa banɛ. Upiana zha shɛ wa ta o.

¹¹AGWANGWAMA hiɛŋ, N zhɛ ma pana unyizo ulwapɛ iwɛ iwɛwɛ ibwɛ, to ogworozwo iwɛ iwɛwɛ ya aba. N zhɛ me zucinje bụtụ be elele na ba busa, ma pana bụtụ na ba nda umama tatụlanụ keeni atwa shɛmiaụŋ ulwapɛ,

¹²N zhɛ ma nda maa atwa 'nyananjɛ uhwuri azhɛnarɛya tụrụmbɛɛ, Ngɛɛ zhɛ ma nda maa bụtụgwụmwa 'nyananjɛ uhwuri azhɛnarɛya Ofi.

¹³Iwɛbɛ po Ngɛɛ zhɛ ma nda maa azuba zhingotu, ibɛ po ukoshilo unyizo zhɛ wa nda bulama, taa tuta nụ ụjita ata Ngɛɛ zhɛ mɛ bɛcinjɛ isɛbwɛ mi, Gamba N shɛ AGWANGWAMA na Hwuri Kpaaŋ.

¹⁴Agaiŋ na namɛ nu Babulon zhɛ o gozhogo a zha nu u'una wa aba, ɛ zhɛ a garatagwụ gana shidwamwa shɛ na sho gozhigono ajala, gana agwụdụ na zasa bi'iywa, a zha no ofwo atwa cɛnjɛ ta aba.

¹⁵Bụtụ be elele na ee jicinje, ɛ zhɛ a sapa bụ iyi; bụtụ be elele na kaa aa 'imɛ, ɛ zhɛ a kwụna bụ nu utokwobi.

¹⁶Ne eshe aba ɛɛ zhɛ a jajaga miaụŋ ma aba, ɛ zhɛ a lashaga shimwono sha aba, ɛɛ zhɛ o woto ne eyikwo aba ni iji.

¹⁷AGWANGWAMA hiɛŋ, N zhɛ mɛ ishicinjɛ atwa Mɛdɛs[50] a na 'wa sụ iwɛ azụrụfa, iwɛ azhɛnarɛya kaa tatụlanụ sụ aŋ o[51]

¹⁸Ni itɛ keeni a'inla aba ɛɛ zhɛ a kwụna atwa na ta waŋnɛ. A zha shɛ a kwụba inyɛmɛnyɛmɛ miaụŋ mi shenje keeni miaụŋ mu tuweewee o.

¹⁹Cɛnjɛ tu Babulon tuba ti ngezeni nụ ụzhɛ hwɛɛ; atwa na 'yajɛ tụ a duma ishɛkɛ tuba. Ama Gamba na N shɛ AGWANGWAMA N zhɛ mo iricingo Babulon gana na Ngee iricinji la Sụdụm keeni Gụmụra!

²⁰I zasa bụtụ be elele na zhɛ ba nama ya apata kwukwuŋ. I zasa kaa Bu'arab be elele na banɛ urungo, zhɛ ba ta udulo ubwa tugwuno apata ya o. I zasa kaa bi'iywa-ba-agwụdụ be elele zhɛ bo sugo agwụdụ ubwa tiyaga apata ya o.

²¹U zhɛ wa sha osombo na isundɛ ye ehilo yo woto, to ofwo na ogwogworugwoni a ta tuhwurugwo ta aba. Nzhiminɛ mi zhɛ ma nama apata, ogburudu[52] zhɛ na swa ugwu apata.

²²Shɛshɛkpa keeni shimwono sha ata shi ihwɛ ya agwuma shɛ pilanụ shi zhɛ shɛ na lashajɛ n'ungwa mo ogwusu, na aka. Aka Babulon ci ya! Ijitɛ ibwɛ zha shɛ yo ilogogo ya o.