Read bassa AYIZAYA 14 Bible Online

AYIZAYA 14 - bassa bible

AYIZAYA 14

¹AGWANGWAMA zhɛ o hioko inyɛmɛnyɛmɛ ya atwa ubwa Isrɛl, bɛɛ zhɛ ba tala aŋ maa a shɛ atwa ubwa. Bi zhɛ bo lono maa a nama sasana na cɛnjɛ ta aba, nazhɛ agaiŋ du zhɛ a zhajɛ a nama na aba.

²Edenji ofwugwo zhɛ o mbiyono atwa Isrɛl maa e gwuri na cɛnjɛ ta aba, edenji ata zhɛ a sha du ajama atwa Isrɛl. Atwa Isrɛl zhɛ a ima atwa na 'imɛ aŋ la, ɛɛ zhɛ a untangana atwa na a nda aŋ la umungwuta.

³AGWANGWAMA zhɛ a pana atwa ubwa Isrɛl ihwungwɛ-tu'waŋ nụ ụngwụ wa aba tụhwụga keeni ụbaụta wa aba, tu ugondu ata ụbaụta aa nda aŋ ni iji maa a shɛ a nda uŋ.

⁴Aka na baa njɛ iŋ hwuŋ, hi zhɛ hi na nda agwuma Babulon asada. Hiɛ hiɛŋ:[53] Agwuma ga amiaụŋ leyegeji! Bi zha shɛ kaa ba nda ya atwa elele tuhwulo[54]

⁵AGWANGWAMA kwusatajɛ bukwuto bo ogworozwo, te bidingbengbere be ehiu,

⁶ata ga nda la atwa ga tuhwulo na amɛ-tụhaŋtụ isɛbwɛ ya aba, e ge te shi kaa ụhinjanụ na tɛshɛka te edenji ata aa 'imɛ o.

⁷Hwuwayɛ go unyizo hwɛɛ namɛ ya nụ ụhinjanụ keeni amɛ-olom, ibɛ po bụtụ be elele ba zunga ya azunga nu unyasa.

⁸I'wɛ'wɛ orokwo ni i'wɛ'wɛ osobu nɛ namɛ ni Lebanon ya nda unyasa iwɛ agwuma ata leyi. Iwɛnɛ ti yaa zasa bụtụ be elele na tɛ zhɛ bo logo iŋ ya taa ta agwuma ata zasaba ya!

⁹Nhwaŋ-me-e'uye ma ta agwuma Babulon amuraba. Abaratụ atwa na 'yajɛ la ukpahiŋ nu unyizo ishijɛ oo rungo. Abaratụ shɛgwuma ishajɛ nu n-ndwụtwụ ma aba.

¹⁰Hwɛɛ aba hiɛŋ bụ, Bɛ shɛ ya du bụtụ na mama zasa gana na atɛ shɛ! Bɛ shɛ ya du bụtụ bu ko gana tu!

¹¹A bu muna la ụjɛrụma na azunga, ti i'nyemi shiduma, ama hwuwayɛ go gabụ na bu namɛ ya ne e'uye. Bu weci no ogodo tufwuno ee bu urigeni ya atwatwa gana tugwuno.

¹²Agwuma Babulon, gabụ unagbajɛ, yɛu ya aasavwungwa, bu banɛ taa na azuba abu layɛ! Bu lasatagwụ la edenji na aka na keshici, ama o bu po ya na cɛnjɛ hwuwayɛ.

¹³Bi heŋshi la na amɛ bụ, ɛbi hiɛŋ, N zhɛ mo mungo taa na azuba, N zhɛ mo shikicingo idwɛtwɛ mi na azuba te zeci uhwuri nkpasu ma Agwatana. N zhɛ ma gɛga ni ishɛmɛ ɛtɛ namɛ taa tuzuba, no ofwo na aa ụlwatagwụ.

¹⁴Ɛbi hiɛŋ, N zhɛ mo mungo taa na azuba ma kashɛka odomu, N zhɛ m mama nda gana Bụtụ ata Hwuri Kpaaŋ.

¹⁵Ama hioko te e bu zucinje tutu e'uye, tutu u'ibwa ata iri tutu tutu.

¹⁶Atwa na 'wi zhɛ mo bu zwono igbɛtɛtɛ, ɛ zhɛ a haŋpa tu unu. Ɛ zhɛ o unsono, ɛ hiɛŋ, Shɛ bụtụ gana na maa zhingeci la unyizo ga, na du njɛ maa cɛnjɛ tu zwono tuwiŋ-urogo ni inyɛsɛ?

¹⁷Shɛ bụtụ; gana na maa njɛ la ashɛpwụ a'wụtụ a'wụtụ ufwu, na du njɛ la unyizo osombo? Shɛ bụtụ gana na maa leni shi la maa ajama ubwa mama 'yaga kwo kaa leneni shi aŋ la maa e ji nu nhwaŋ ma aba?

¹⁸Shɛgwuma shi unyizo hwɛɛ shi weteji ne e'uye aba a na zhɛmanjɛ tebiye,

¹⁹Ama gabụ ta bu zasa ya u'uye, ee keri ru'wo rụ bụ maa ru fwoshi. N'wo me ejeshi a na aa kwụnɛ nu ujasa, muba mu urigeni ru'wo rụ bụ, aa 'wɛŋ mụ nu u'ibwa utayɛ-tubala[55] ee rikeci.

²⁰Iwɛnɛ ta abɛ njɛ u'una bụ ufwu, abụ kwụnɛ kaa atwa bụ, a zha shɛ mo bu no gana shɛgwuma shɛ vwɛ o. I zasa kaa bụtụ be elele nu umwamwa ata bụ u ci'nyɛ zhɛ bo bino kwukwuŋ.

²¹Ge e kwuni atwa tɛshɛla! Miaụŋ-me-eyi ma agwuma mi gɛ zhɛ mo 'wo iwɛ iwɛwɛ yo ogwunukwoshi aba. I zasa kaa bụtụ be elele na amɛ aba zhɛ ba ya tugwama nu unyizo kwo kaa zhɛ ba ala maa dwa okwo ụshɛpwụ; u'wụtụ we elele o.

²²AGWANGWAMA na Hwuri Kpaaŋ hiɛŋ, N zhɛ ma sukakana Babulon Mo hwuŋzo uŋ. N zha shɛ ma ganga iyi elele o, ta miaụŋ, i zasa iyi elele zhɛ ya banangana o, Gamba AGWANGWAMA N dumwa.

²³N zhɛ ma nda Babulon maa ụ shɛ udapa, ogwogworugwoni aba zhɛ a nama apata. N zhɛ mo sugo Babulon ni isheshe nɛ zhɛ yo sugo iyi elele shɛshɛshɛ ma 'waŋ. Gamba AGWANGWAMA na Hwuri Kpaaŋ N dumwa.

²⁴AGWANGWAMA na Hwuri Kpaaŋ shilwo-unu, bɛɛ hiɛŋ, N zhɛ ma nda iyi nɛ Ngaa imanganjɛ. Iyi nɛ Ngee heŋshi maa ma nda, N zhɛ ma nda iŋ.

²⁵N zhɛ ma kwụna atwa Siria na cɛnjɛ ti mi ti Isrɛl, mo idongono aŋ nu nshama mi mi. N zhɛ ma dwa uhwohwo tijama ta atwa Siria ne shimbi sha atwa mi, ti i'wɛŋnɛ ɛtɛ aa ga shɛ a 'waŋna.

²⁶Iyi nɛ Ngee heŋshi iwɛ unyizo hwɛ hwɛɛ na, N hoŋpwo kaa u'ala mu maa ma pana edenji ulwapɛ.

²⁷AGWANGWAMA na Hwuri Kpaaŋ hoŋswo maa nda ijɛ; gaaba eri bo ngwuricingo iiŋ? Bu hoŋpwo kaa u'ala ubwa maa pana atwa ulwapɛ, i zasa bụtụ namba eri ba lakana bu o.

²⁸Utumwa na ee enenji nu uywa ata agwuma Ahaz 'wi na.

²⁹Ahiɛba Afilistia, bukwuto ata ma hi hwalụpa la dwonuowoŋ, ama tuba ta bwada ma unyasa o. Yaa shɛ uhwa uko 'wi, bu naa na zhanjɛ uhwuri bu, ubwa zhɛ bo tono ohwolu ubu na ata 'wi. Anjɛ uhwa kaa ɛ bujɛ ba ugbezhi.

³⁰Bukofwo na hwuri okofwo vwɛ hwɛɛ no tukofwo zhɛ bo gwushigo iyimɛyɛ, bụtụ na zasa iyi zhɛ bo woto suu. Ama N zhɛ[56] tuba ma kwụna kaa atwa bụ ni imunɛ tiya, yɛɛ zhɛ ya hwaŋzhɛnga atwa na ga vwɛ.

³¹Oo odubo, kala n'ungwa, Oo gabụ ụshɛpwụ, ugana taawụụ; Oo ahiɛba Afilistia, gɛ inyɛsɛ ihi nicinji hwɛɛ hiŋ! Nshikwo mu banɛ ba tuzuba, bụtụ na kaa ivwunɛ ibwɛ zegeri shi zasaba na bụkpagwụ ba aba o.

³²Gana naa ɛti zhɛ tɛ jishijɛ atumwa ga banɛ ni Filistia zhajɛ a na zhajɛ no ofwo tuu? Ti zhɛ to mbiso aŋ maa AGWANGWAMA ubwa jwe Zayon, apata atwa ubwa a na a nda ụbaụta gwushiji ofwo tuswaka suu.