Read bassa AYIZAYA 16 Bible Online

AYIZAYA 16 - bassa bible

AYIZAYA 16

¹Atwa Moab banɛ ni Sɛla, ee dure uhwaŋna ụshɛka, aa 'waŋnɛ miaụŋ-ma-agwụdụ, aa zhajɛ ni Ishɛmɛ Zayon maa a njɛ bụtụ na yɛ tugwama nu Jɛrusalɛm upwaŋ.

²Eyikwo Moab namɛ no ofwo na urefu Anon iri shi, oo rungo gbom aa zha beye ee gwuleneni, gana shanụnụ shɛ na ee unzhi no tuhwurugwo ta aba.

³Ɛɛ hiɛŋ atwa Juda, Iti mbishi ma iyi nɛ atɛ shɛ ta nda, itɛ jɛlanɛ ma gana uhwuŋnu ụ'wụtụ na aka bo oholobwo uwaŋna. Lono ma maa ta ta ụhinjanụ nu uhwuŋnu hiŋ. Tɛ shɛ atwa cɛnjɛ ti nya a na bananganɛ ụbaụta na namba. Utu sweci ma no ofwo na bụtụ be elele eri shi ma tu ta ugbe.

⁴Lono ma maa ta nama na cɛnjɛ ti hiŋ. Iti lesheji ma ni i'ɛlɛ ya atwa na a jala maa a tụ kwụnɛ. Tuhwulo tɛnda atwa, ta atwa ufwu tɛnda zhɛ yo hwuwowu, nazhɛ atwa ata na o hwuŋzotongo cɛnjɛ ta ata zhɛ o hwulo.

⁵Nazhɛ bụtụ bu umwamwa Devid[59] bu ko zhɛ ba ya tugwama, bi zhɛ ba untangana atwa na tɛcara keeni no tulubo. Bi zhɛ ba 'yaga izɛlɛgwu ne tiririri tɛnda, bi zhɛ ba dwalakaka maa duma ụshɛrɛya ne tishiriri.

⁶Atwa Juda hiɛŋ, Tụ hwụjɛ tubusa ta atwa Moab. Eti mepi maa a shɛ atwa tumama sata keeni ehelekeci, ama tubusa ta aba keeni ihelekeci ya aba kaa i shɛ tɛgadaga.

⁷Atwa Moab a twa-u'wo, oo jirongono na cɛnjɛ iwɛ ụbaụta na aa nda. Ɛ zhɛ a twa-u'wo hwɛɛ aba, ti yaa shɛ ee teyinje iyimɛyɛ ibiye nɛ aa ya la ni Ki-hɛrɛs[60] Ɛ zhɛ o unzo aŋ ni i'ɛlɛ yo ohondo.

⁸A njɛ ntuma ma ata mu gwumwongonu ni Hɛshbon ufwu, aa njɛ du ntuma ma afwafwa mu Sibma ufwu, ntuma ma ata meni mụ tụ'walụ ta afwafwa ma muba ma shana ma ima shɛgwuma she edenji. Afwafwa muba kaa barashagawa la tutu Jazɛ, tutu uwaŋna-banụ ụshɛka, ti geri bu uwaŋna-twonuo uuwa i ci itekwu.

⁹Ma twana afwafwa Sibma u'wo gana na Ngaa twanɛ Jazɛ. Malaba mi mi ma fwunga iwɛ Hɛshbon keeni iwɛ Ɛlialɛ, iwɛnɛ ti yaa zasa iyi elele aa 'yajɛ ya maa e jwe iwɛ maa amɛ atwa ata lemi o.

¹⁰I zasa bụtụ be elele amɛ ubwa lemi iwɛ ntuma ma ata mu zasa ya ugwungwu elele o. I zasa kaa bụtụ bo niso ya tụ'walụ ta afwafwa maa nda meni ma aba o; n'ungwa ma aba mu unyasa mu hwuwowu ya[61]

¹¹Mo 'nyongo na amɛ-tụhaŋtụ iwɛ Maob gana ugwoje na aa 'nyama, Ngaa 'yajɛ tugwumana iwɛ Ki-hɛrɛs.

¹²Atwa Moab momo lukwucingo na tizha nu ụhangwụ keeni nsumo ma tuwa ta aba maa a njɛ adua, ama a zha kaa apata gadaga.

¹³Utumwa na AGWANGWAMA tumwananɛ atwa Moab cebe ta.

¹⁴Hwuwayɛ go AGWANGWAMA hiɛŋ, I vwɛ shiywa shɛ tatụ cam tu uduciya ata atwa Moab ụ'wụtụ 'wụtụ zhɛ wo hwuwowu. Atwa ofwugwo a na namɛ nu bwa; tumwata ta aba kiri ti zhɛ ta banangana. Ɛ zhɛ kaa o lwogo lɛgbɛ lɛgbɛ.