Read bassa AYIZAYA 17 Bible Online

AYIZAYA 17 - bassa bible

AYIZAYA 17

¹Utumwa na shɛ iwɛ Damaskos na: Hioko, Damaskos zha shɛ wa sha ya ụshɛpwụ ụ'wụtụ kwukwuŋ; ama u zhɛ wa sha ubizo wa aswala.

²Atwa sụmɛ ee genji ashɛpwụ Aroe[62] Ɛ zhɛ a sha ofwo na agwụdụ ni inɛ zhɛ na yaga, i zasa kaa bụtụ zhɛ bo unzo aŋ o.

³Ikepi ya atwa Isrɛl[63] zhɛ ya ishɛga, Damaskos kaa zha shɛ mama 'yaga ya o. Nazhɛ ụjɛrụma wa atwa ata Siria zhɛ wo hwuwowu gana na tu una wa atwa Isrɛl hwuwowu. Gamba AGWANGWAMA na Hwuri Kpaaŋ N dumwa.

⁴AGWANGWAMA hiɛŋ, Ụjita we ci ba, tɛ ɛ zhɛ e zucinje ụjɛrụma wa atwa Isrɛl, ibɛ po tinyomongo ta tu'waba ta aba ti zhɛ ta 'nya.

⁵Cɛnjɛ ti Isrɛl ti zhɛ ta sha gana itimɛ nɛ ee gwubi ehiu ibɛ ee jwe, gana bụtụ na njɛ tumwata nu Ulomu Refaim, wee tileni ya bohondo.

⁶Atwa tumwata aba kiri zhɛ a vwa. Isrɛl zhɛ ya sha gana ụ'wụ'wụ buta na ee cwi tụ'walụ tu bwa hwɛɛ, semi ti yebi kwo kaa tụ tatụ kiri tu ta vwɛ taa ne bilibe, keeni ti neshi kwo kaa tu ta na a'walụ ata namɛ tuta. Gamba AGWANGWAMA na shɛ Agwatana Isrɛl N dumwa.

⁷Ụjita ata ci hwuŋ, atwa zhɛ a pana abashɛ iwɛ bụtụ ata karɛ aŋ, ɛ zhɛ a ngbaraka Bụtụ ata bi Tijilo bi Isrɛl ne eshe aba.

⁸A zha shɛ a 'wa ya iwɛ otukwu-ụrụpɛ ata oo mo ni i'ɛlɛ ya aba o, kwo ka rishe tupatana ụ'wụ'wụ ata ee shikicinji ni i'ɛlɛ ya aba na shɛ uzhɛba ata ɛɛ hiɛŋ, Ashɛra[64] o, to otukwu ata iturɛre tuhwoŋzhingo.

⁹Ụjita ata ci hwuŋ, atwa zhɛ a sụma a bana na ashɛpwụ a'wụtụ a na 'yajɛ ikepi tebiye tebiye gana ashɛpwụ ata Ɛhiv, a na[65] A'amon beni la te e gezhigeni atwa Isrɛl.

¹⁰Ahiɛba atwa Isrɛl, isɛbwɛ ya Agwatana na ihi bicinji la ihi 'wi, bu gata ihiɛ jɛlanɛ la gana utayɛ-tubala. Ehi suji sasana ntuma mi hiŋ ahiɛ njɛ tijilo, iwɛ ɛtɛ maa hi na zhɛba azhɛba.

¹¹Ama okwo iyi nɛ ahiɛ bɛrɛ unshɛ, yee kwuni ba tusumbo jita ata ahiɛ bɛrɛ iŋ, i zha shɛ ya 'wala maa hi jwe o. Ụbaụta kiri zhɛ wa nama keeni ụngwụ na zasa tuhwuwowu.

¹²Edenji ofwugwo a na 'yajɛ ukpahiŋ, a ugajɛ ba ee ci gana adanga Itekwu nɛ yo ngwulo, gana adanga na a twatwagwụ na anya.

¹³Edenji ata e munje ba ge tumunje gana adanga na e gezhije, ama Agwatana tezhigeni aŋ, ibɛ po ee bitiriji ugwulwo, e unzhi aŋ, ee gezhiji taa ni ishɛmɛ gana ubwodolo, gana aswala na ujipo suji.

¹⁴E zweni atwa inyɛsɛ nụ ụjita, maa uuwa iyi heri a zasaba ya o. Gana yɛɛ zhɛ ya shana bụtụ be elele na ba lashaga cɛnjɛ tu tu ta.