Read bassa AYIZAYA 18 Bible Online

AYIZAYA 18 - bassa bible

AYIZAYA 18

¹I 'yajɛ cɛnjɛ tu na tu namɛ hileniye erefu Itiopia, a hwụjɛ rundu ra apiambɛ iyi nɛ ya hila[66] apata.

²Apata eseci-i'ɛlɛ cɛnjɛ ta ata a na aa tumwanɛ teni ụhaŋtụ na aa njɛ ne eninjidegbe, ɛɛ kɛshɛ urefu Nayɛl. Gwulo ma nu nhwaŋ mi hiŋ, ahiɛba atwa ga vwengenji! Gwulo ma nu utumwa ata na cɛnjɛ ta ata ti hiŋ urefu bogwu, nu udenji ata hiŋ 'yajɛ ikɛnyi, no ofwo atwa ata hiŋ njɛsanjɛ, a gata tu'waba ta aba tu namɛ lombwo lombwo, a gata atwa unyizo hwɛɛ a nda inyɛsɛ ya aba.

³Bụtụ be elele na namɛ nu unyizo, ga shɛlaga! Ngbaraka ma maa hiɛ kwụbɛ igɛrigɛ ɛtɛ ɛɛ zhɛ a shapa na azuba taa ne bilibe bu nshama! Shɛlaga ma maa hiɛ hwụjɛ ukakacɛ na ɛɛ zhɛ o hwulo!

⁴Nazhɛ AGWANGWAMA n hiɛŋ, N zhɛ ma nama no ofwo mi na azuba saiiŋ, gana na te cime ta 'wala nụ ụjita, na aka bo oholobwo na aa dwa iyimɛyɛ, gana na tu uwaŋna wo kwuno tuvwo pece ti iyi heri.

⁵Aka na ta afwafwa sumbi, tusumbo ta aba ta 'waŋ, tụ'walụ ta aba tu kwuni ya tuna; ɛ zhɛ a jaja okoko ata u tụ'walụ na agbalụ. Nazhɛ ɛɛ zhɛ a jajaga yaa a'wa'walụ ata ga barashagwụ hwɛɛ.

⁶Ɛ zhɛ o tulonono aŋ shanụnụ keeni isundɛ ye ehilo nu nshama hwɛɛ aba. Ogwulu zhɛ na ya aŋ nu ushwo, isundɛ ye ehilo zhɛ na ya aŋ nu ubwaza.

⁷Aka zhɛ o to tɛ ɛ zhɛ a 'waŋnanɛ AGWANGWAMA na Hwuri Kpaaŋ apwaŋ na zhɛ a banɛ na cɛnjɛ ta ata erefu bogwu, no olugwo udenji ata 'yajɛ ukpahiŋ, ɛ zhɛ a banɛ no olugwo atwa ata njɛsanjɛ a na tu'waba ta aba tu namɛ lombwo lombwo, a gata aa nda inyɛsɛ ya aba nu unyizo hwɛɛ. Ɛ zhɛ a zhajɛ ni Ishɛmɛ Zayon, no ofwo na aa zhɛba AGWANGWAMA na Hwuri Kpaaŋ.