Read bassa AYIZAYA 2 Bible Online

AYIZAYA 2 - bassa bible

AYIZAYA 2

¹N-ndumwa mu na mu kapɛshɛngwanụ[6] Ayizaya yɛu-ye-eyi Amoz iwɛ atwa Juda keeni Jɛrusalɛm na:

²Aka zhɛ o to hwuŋ, ti ishɛmɛ nɛ oo mo umwono wa AGWANGWAMA zhɛ yo zoto yo hwulo nshama me elele. Ɛ zhɛ a kaana iŋ uzoto uhwuri ishɛmɛ elele kpaaŋ. Nazhɛ edenji ofwugwo zhɛ na fwụrụganɛ iŋ.

³Ibɛ du po atwa ofwugwo zhɛ a zhajɛ, ɛ hiɛŋ, Mizha tu munji ma ishɛmɛ ya AGWANGWAMA[7] nu umwono Agwatana Isrɛl, iwɛ maa mo tu mbisogono ihwɛŋnɛ ibwɛ; maa ta zha tahaŋnụ ni ilɛmu ibwɛ. Iwɛnɛ po ni Zayon, apata undwa ubwa zhɛ wa banɛ; N-ndumwa ma AGWANGWAMA mi zhɛ ma banɛ nu Jɛrusalɛm.

⁴Ubwa zhɛ ba dumangana edenji ụshɛrɛya na namɛ na ashashɛ aba. bɛɛ zhɛ ba kwunangana atwa ofwugwo iwɛ nɛ namanɛ aŋ. Ɛ zhɛ a jɛshɛrɛga otokwobi aba maa a shɛ n-ngowo ɛɛ zhɛ a jɛshɛrɛga nsanu ma aba maa mɛ shɛ afwuya, Edenji zha shɛ a jasa ya ujasa o, a zha shɛ du kaa o soso ya ujasa tujasa o.

⁵Ahiɛba atwa ihwɛ Jekob, mizha ti zhe ma tahaŋnụ nu uhioko-uhwaŋna wa AGWANGWAMA.

⁶Oo AGWANGWAMA tu, bi jineci atwa bụ, aba shɛ atwa ihwɛ Jekob! Iwɛnɛ ee meme gengeni tishino tu na tu banɛ geri bu uwaŋna-banụ tɛnda, aa shɛ du kaa ashɛjɛ[8] gana Afilistia, aa 'wa iyi uvwovwu ya agaiŋ.

⁷Azụrụfa keeni azhɛnarɛya barɛ na cɛnjɛ ta aba, uduciya wa aba u hwuleji tɛrɛta. Idɛkwɛ barɛ na cɛnjɛ ta aba, ihɛŋtu ya aba ujasa hwuleji tɛrɛta.

⁸Tuwa tu barɛ na cɛnjɛ ta aba, keeni iyi nɛ oo mo ni i'ɛlɛ ya aba maa a na zhɛba.

⁹Ɛ zhɛ e zucinje bụtụ be elele, ɛɛ zhɛ a nda aŋ kaa ezuye. AGWANGWAMA, ta gangana aŋ o.[9]

¹⁰Ɛ zhɛ a swakaka na apangwụ aparatayɛ nu nshama, kwo kaa ɛ zhɛ o hino a'ibwa na cɛnjɛ maa e benengeni tuholono ta AGWANGWAMA, maa a swakaka maa kede a kwụbɛ ukpahiŋ keeni ụjɛrụma ubwa o!

¹¹Ụjita ata ci hwuŋ, ɛ zhɛ e zucinje bụtụ be elele na mama sata, ɛɛ zhɛ kaa a nda bụtụ be elele na ba busa ufwu. Aka ata AGWANGWAMA kiri ɛɛ zhɛ o gombicingo.

¹²Ụjita ata ci hwuŋ, AGWANGWAMA na Hwuri Kpaaŋ zhɛ e zucinje bụtụ be elele na 'yajɛ ukpahiŋ, keeni bụtụ be elele na ba busa, na kaa meme mungicinji te zeci.

¹³Ubwa zhɛ bo logo osobu ata Lebanon a njɛsanjɛ hwɛɛ, te ekpekpeshi ata shikekeni mworo mworo na cɛnjɛ tu Bashan.

¹⁴Bɛɛ zhɛ ba nangwacanga tingbekwu ta ata ti zeteji hwɛɛ, keeni nshama ma ata mɛ shɛ tilegbe hwɛɛ,

¹⁵ta ashɛkpa elele na zeci, keeni ụdatụ tuma ti ijilɛni elele.

¹⁶Bɛɛ zhɛ be irocongo ihɛŋtu ɛtɛ meni i tinyakpa nyakpa, ti iyi nɛ pilanụ na cɛnjɛ ta ata.

¹⁷Ụjɛrụma bụtụgwụmwa zhɛ wo hwuwowu, ɛ zhɛ a nda tubusa ta bụtụ ufwu nụ ụjita ata. AGWANGWAMA bwooko kiri ɛɛ zhɛ o gombicingo jita ata.

¹⁸Tuwa te elele ti zhɛ ta bana hwɛɛ.

¹⁹Atwa zhɛ no gozhogo nụ ụjita ata, a zha na apangwụ aparatayɛ, kwo kaa na a'ibwa cɛnjɛ maa a swakaka maa e benengeni tuholono ta AGWANGWAMA. Ɛ zhɛ a makana maa a swakaka iwɛ ukpahiŋ keeni iwɛ ụjɛrụma ubwa, na aka na baa zhajɛ maa nda unyizo bulama.

²⁰Ụjita ata ci hwuŋ, ɛ zhɛ a 'waŋ tuwa ta ata ta ba aa njɛ na azụrụfa keeni azhɛnarɛya, ɛ zhɛ a gangana tụ egbebe no okorobwubwu.

²¹Atwa zhɛ o gozhogo a swakaka na a'ibwa keeni tubagatagwụ ta aparatayɛ iwɛ maa e benengeni tuholono tu bwa maa e gezhigeni ukpahiŋ keeni ụjɛrụma ubwa.

²²Ta patana ma ya atwagwumwa a na o fwoso rishe o. Imbe kwuŋ baa waŋnɛɛ?