Read bassa AYIZAYA 20 Bible Online

AYIZAYA 20 - bassa bible

AYIZAYA 20

¹Agwuma Siria, ga Sagon peni uberezhe ubwa na untanganɛ ejeshi hwɛɛ unu, baa sukakanɛ ụshɛpwụ Afilistia uko ụ'wụtụ, na ɛɛ hiɛŋ, Ashdod, bee leshiji uŋ.

²Na aka ata ibɛ AGWANGWAMA jɛmɛ n-ndumwa na Ayizaya yɛu Amoz, bɛɛ hiɛŋ bụ, Hwuciko idikɛ ɛtɛ ụcɛnjɛ tɛnda ebu urigeni keeni abida ata ebu hwuŋteni nɛ ɛvwɛvwɛjɛ bụ. Bee hwuceci ga, boo rungo ya mohondo tu uzawa abida.

³Nazhɛ AGWANGWAMA hiɛŋ, Gana na ti yɛu mi ugondu ga Ayizaya rinji mohondo, tu uzawa abida shiywa shɛ tatụ. I shɛ useyida iyi nɛ zhɛ yo jitono hwuŋ atwa Ijipti na atwa Itiopia.

⁴Gobwonu du agwuma Siria zhɛ o sugo hwuŋ ajama na baa 'imɛ na a'una ga eyebi mohondo bo hwulo. Te esemberi, ta atwa na inganjɛ, ɛ zhɛ a zha tahaŋnụ mohondo uzawa abida. Shɛpindwa sha aba shi zhɛ sho tulogono nu ukpogwu, maa ezuye shɛ atwa Ijipti.

⁵Ezuye zhɛ a sha atwa na ga patanɛ atwa Itiopia rishe, a na ga duma ishɛkɛ ya atwa Ijipti, ahaŋsa aba zhɛ a garatagwụ.

⁶Aka ata ci hwuŋ, atwa na namɛ nu ụpalanụ na cɛnjɛ ta Afilistia zhɛ hiɛŋ, Kwụba ma de iyi nɛ jiteni atwa ebe atɛ ga patanɛ rishe maa eti leshiji na agwuma Siria! Gana naa ɛti tɛ zhɛ ta banangana ya banaa?