Read bassa AYIZAYA 21 Bible Online

AYIZAYA 21 - bassa bible

AYIZAYA 21

¹Utumwa na aa tumwananɛ ụshɛka ata namɛ nụ ụpalanụ itekwu na, ɛ hiɛŋ, Gana na tu ujipo wa banɛ zalụ tuta, woo sugo ụshɛka, gobwonu du busukakanɛ zhɛ ba banɛ na cɛnjɛ tu na ta sha atwa inyɛsɛ.

²N kwụbɛ ozobu iyi nɛ ya sha bụtụ inyɛsɛ nɛ ndanjɛ, ozobu atwa tusanga keeni ufwu tɛnda. Oo ahiɛba ejeshi Ilam, sukakana aŋ ma! Ejeshi Midia, tafwulaga ma ashɛpwụ ata a'wụtụ a'wụtụ! Agwatana zhɛ a kwunanga i'nye ɛtɛ atwa Babulon karɛ.

³Iyi nɛ Ngaa kwụbɛ ni iyi nɛ Ngaa hwụjɛ no ozobu ata, i n zweni inyɛsɛ nụ ụngwụ-tụhwụga, na tu'waba ti mi, ụngwụ ata ụ shɛ gana ụngwụ tumata tu na tu to biyikwo bo ofubo.

⁴Ohwulu mo n horoko, inyɛsɛ i n shɛ, Ama zhɛgɛda. N nga jala maa ga ụrụmɛ shɛ, i zasa kaa iyi elele yaa n ndanɛ o, inyɛsɛ kiri yee n zweni.

⁵No ozobu ata Ngaa kwụbɛ ta a njɛ iyimɛyɛ maa a 'imɛ atwa tụlagwụ ugaiŋ, ee beri shɛdugwa maa agaiŋ ata gɛgaga. Aka na ta a ya iyimɛyɛ ɛtɛ, aa swa iyi tuswa. Eshigiri unu-tupana banɛ, wɛɛ hiɛŋ, Ahiɛba eberezhe, nangangana ma shabula shi hiŋ shu ujasa!

⁶Nazhɛ AGWANGWAMA n hiɛŋ, Zhaga shikicingo bi'iywa, mbiso bu maa iyi elele nɛ baa kwụbɛ hwayɛ, ga duma.

⁷Yaa shɛ baa kwụbɛ etwenyi na patanganɛ idɛkwɛ ta a shamanɛ, atwa e yeyebi, keeni etwenyi na shamanɛ ɛ sucɛ nruhondo nu nzhinyacɛ, go shilo ụcɛbɛ tebiye, maa shɛlagana aŋ tebiye.

⁸Ibɛ bi'iywa ata suyanɛ ga ụhiɛŋshɛ, bɛɛ hiɛŋ, Iyɛri, M patanɛ na ashɛkpa ata Ama nda u'iywa tu uwaŋna tụ ụjita.

⁹Eshigiri! Ngaa kwụbɛ etwenyi na patanganɛ idɛkwɛ ta a shamanɛ, atwa e yeyebi. Ibɛ bi'iywa ata jɛmɛ unabarɛ ata, bɛɛ hiɛŋ, Babulon hwuŋzwo, u hwuŋzwo! Tuwa ta ata aa zhɛba tu bwaratagwụ na cɛnjɛ hwɛɛ.

¹⁰Ahiɛba atwa mi Isrɛl, e hi jibi gana ohiu, ama N hi mbiswo ya unabarɛ ubiye na Ngaa hwụjɛ no olugwo AGWANGWAMA na Hwuri Kpaaŋ, na shɛ Agwatana Isrɛl.

¹¹Utumwa na aa tumwananɛ atwa Idụm na: Bụtụ bu ko bi Sei n suyanɛ, bɛɛ hiɛŋ, A-bi'iywa, i ci aka naa kwuŋ iyi zhɛ yo holoo? M mbishi de, aka naa iyi zhɛ yo holoo?

¹²Ngɛɛ jishijɛ bụ, Ngɛɛ hiɛŋ, Iyi zhɛ yo holo de, ama ụjita kaa zhɛ wo shoonono, yaa shɛ abu ta jala maa heŋteni, bi eri be gwure maa heŋteni sasana.

¹³Utumwa na aa tumwananɛ atwa Arabia na, ɛ hiɛŋ: Ahiɛba ahinya Didan a na a ta urubwo nu uwapa Arabia,

¹⁴Pana ma atwa ata i'uyɛ gwụmɛ a na zhajɛ pi hiŋ meni. Oo ahiɛba atwa cɛnjɛ ti Tema, pana ma atwa ata bananganɛ tu'wo tu ujasa iyimɛyɛ.

¹⁵Atwa ata gezhigeni utokwobi na wa jala aŋ tụkwụna, e gezhigeni itɛ ɛtɛ aa tɛtanɛ maa o to aŋ a'inla, e gezhigeni ụbaụta ujasa.

¹⁶Nazhɛ AGWANGWAMA n hiɛŋ, I vwɛ uywa uko gba tu urishi ata edenji Kɛda ge beni la zhɛ wo hwuwowu.

¹⁷Ekeri a'inla ata a shɛ etwenyi Kɛda, a na eri a nda teleyi, ama tumwata ta aba kiri ti zhɛ ta vwa. Gamba AGWANGWAMA na shɛ Agwatana Isrɛl N dumwa.