Read bassa AYIZAYA 24 Bible Online

AYIZAYA 24 - bassa bible

AYIZAYA 24

¹AGWANGWAMA zhɛ a nda unyizo ufwu hwɛɛ, ba nda uŋ osombo. Bi zhɛ bo ubo uŋ wo bitirigwo maaracɛnjɛ, ba garataga atwa na namɛ nu bwa.

²Gana ijɛ zhɛ ya sha na: gana na yaa namanɛ atwa ohondo, gobwonu du yaa namanɛ onongbo, gana na yaa namanɛ ajama, gobwonu du yaa namanɛ shɛgwuma-shi-ihwɛ, gana na yaa namanɛ ajama o o, gobwonu du yaa namanɛ shɛgwuma-shi-ihwɛ sha aba sho o, gana na yaa namanɛ atwa na a sa iyi, gobwonu du yaa namanɛ atwa na a sanga iyi, gana na yaa namanɛ atwa na a unanga atwa iyi, gobwonu du yaa namanɛ atwa na a una iyi, gana na yaa namanɛ atwa aa 'yajɛ utashɛ, gobwonu du yaa namanɛ atwa na 'yajɛ utashɛ.

³Unyizo zhɛ wo hwuŋzwo hwɛɛ, wa sha osombo. AGWANGWAMA na Hwuri Kpaaŋ ubwa dumwa, i zhɛ kaa ya nda gom.

⁴Cɛnjɛ tụ lụmbɛ, tee hweteni. Unyizo hwɛ hwɛɛ lukwumi, cɛnjɛ tu fwoshi hwɛɛ ta tụla.

⁵Atwa heshigeni unyizo tedure nu undwa Agwatana na aa untanganɛ shɛ keeni tubwada tu na ee bweji unu ata unyizo-nom baa ga twa la na aba.

⁶Iwɛbɛ po Agwatana keleni unyizo unu, ibɛ po atwa a lashɛga itɛpwɛ iyi nɛ aa njɛ. Atwa tumwata aba ta ya uraiŋ.

⁷Tụ'walụ ta afwafwa tụ lụmbɛ, iwɛbɛ po meni mụ tụ'walụ ta afwafwa mu barɛ shɛ ya. Atwa na 'yajɛ la unyasa, aba 'yajɛ ya amɛ-tụhaŋtụ.

⁸Iwɛbɛ po i'nyemi ɛtɛ ya aba ibiye nɛ aa 'nyama la, na shiduma keeni aganga 'imɛ ya ilɛmɛ.

⁹I zasa bụtụ ba zungangana ya meni mụ tụ'walụ ta afwafwa azunga unyasa o; i zasa kaa bụtụ ba hwuga ya ụlatụ muba o.

¹⁰Ụshɛpwụ ata ụ'wụtụ hwuŋzwo, waa shɛ ya osombo ibɛ po atwa swakacɛ no shimwono sha aba aa kapanjɛ shidubo maa kede bụtụ be elele teni o.

¹¹Atwa a ugagaga ni ihwɛŋnɛ ụshɛpwụ, iwɛnɛ te meni mụ tụ'walụ ta afwafwa mu zasaba ya. Unyasa wa aba hwuwowu unyizo-nom; e kepi uhwaŋna ubwa na cɛnjɛ ta ata.

¹²Ụshɛpwụ ata hwuŋzwo, aa kwusatajɛ akpa ubwa.

¹³Gana yɛɛ zhɛ ya shana udenji elele nu unyizo hwɛɛ na: I zhɛ ya sha gana tụ'walụ ta buta tu na oo tuwo keeni gana afwafwa na oo tuwo tụ'walụ ta aba, ta tumwata ta aba hwɛɛ.

¹⁴Atwa na benengeni, aba zhɛ na zunga azunga nu unyasa. Atwa na namɛ nu uwaŋna-twonuo, aba zhɛ na duma gana na ta AGWANGWAMA 'yajɛ igɛhi,

¹⁵Atwa na namɛ nu uwaŋna-banụ aba zhɛ na shɛtana bụ, atwa na namɛ nụ ụpalanụ itekwu, aba zhɛ na shɛtana AGWANGWAMA, na shɛ Agwatana Isrɛl.

¹⁶Tụ hwụjɛ azunga ashɛtwa taa nu uce unyizo, ɛɛ hiɛŋ, Ga ụjɛrụma ụ shɛ una Bụtụ ata bi Tiririri. Ama yaa shɛ Gamba, N hiɛŋ, Ti'nya Ama 'nya, ti'nya Ama 'nya! Adangboo aba shɛ e nee mi. Tụwụmangwụ atwa a wụmangwụ na atwa tusanga ne tidere. Tidere ta aba kaa ta kaana ga tụwụmangwụ!

¹⁷Oo ahiɛba atwa unyizo hwɛɛ, hwulaga ma iwe mi! Iyi mazhanga namba, e hinenji ba ashapa, ogwuru biteji ba aa hiɛ 'yacɛ.

¹⁸Bụtụ be elele mekeni maa gozhigono mazhanga ma ata, bi zha ba laya nu ushapa, bụtụ be elele na kaa benengeni ushapa, ɛ zhɛ a ima bụ nu ugwuru. Eshilo zhɛ o zuzugwo na tụla, bo ngbo nu unyizo, ibɛ po ukoshilo unyizo zhɛ wa nda bulama.

¹⁹Unyizo zhɛ wa bagatagwụ, wa bwaratagwụ, nazhɛ wa bagwụ kparara, u zhɛ wo zhingotu duwa duwa.

²⁰Unyizo zhɛ na ta beye u na ta bana gana bụtụ na mayaga ma ngba, u zhɛ wa bingwa gana udulo na mpiala mụ 'wụtụ mɛ bɛnjɛ. Iwɛwɛ ibwɛ zhineni tebiye; u zhɛ wa laya; u zha shɛ wɛ ishijɛ ya kaa kwukwuŋ.

²¹Aka zhɛ o to ta AGWANGWAMA zhɛ a pana akpahiŋ na namɛ na azuba, ta anaa na namɛ nu unyizo keeni shɛgwuma sha aba hwɛɛ ulwapɛ.

²²AGWANGWAMA zhɛ o sotulonu shɛgwuma urubwo uko nu ushapa, gana atwa na namɛ nu umwono-tishi. Bi zhɛ bo zwono aŋ nu umwono-tishi uuwa i ci aka na maa e peni aŋ ulwapɛ.

²³Upiana zhɛ wo 'wo tishi, uwaŋna zha shɛ wa ta ya, iwɛnɛ ta AGWANGWAMA na Hwuri Kpaaŋ zhɛ ba sha agwuma. Bi zhɛ ba ya tugwama ni Ishɛmɛ Zayon nɛ namɛ nu Jɛrusalɛm, nazhɛ n-nyarɛ ma atwa ata mi zhɛ ma kwụba ụjɛrụma ubwa.