Read bassa AYIZAYA 33 Bible Online

AYIZAYA 33 - bassa bible

AYIZAYA 33

¹Gabụ na ba nda iyi ufwu, a bɛ njɛ shɛ kaa ufwu o, gabụ na ba sanga atwa, i zasa kaa bụtụ bi senji o, bi zhɛ ba nda hwuŋ adangboo! Iwɛnɛ ta aka zhɛ o to, aka na ebi genji hwuŋ iyi tɛnda ufwu, ɛ zhɛ tuba ma bu nda ya ufwu; aka na ebi genji atwa tusanga, nazhɛ ɛɛ zhɛ ma bu sanga.

²Oo AGWANGWAMA, hioko inyɛmɛnyɛmɛ tu. Gabụ ata nda ashɛlatụ. Na tu pana ukpahiŋ iyi-heri, no ti bicingo na aka tiriri.

³Aka na abu dumanɛ iwɛ na rụhwụŋ rụ bụ gana uto, ibɛ po atwamwa bwadụ nu usumwa, aka na ɛbi ishijɛ, ibɛ po edenji garatagwụ.

⁴Ibɛ po atɛ hiɛrɛ wuu gana ovworo etu zweni i'wɛŋnɛ ya aba nɛ ee genji, etu suje iyi nɛ ujasa yɛ.

⁵AGWANGWAMA gembi tebiye! Ubwa kaa namɛ no ofwo na zeci. Ubwa zhɛ bo shidingo Jɛrusalɛm nụ ụshɛrɛya u tishiriri keeni tiririri.

⁶Ubwa ba nda maa hi shikono dimi. Ubwa bo shikicingo atwa ubwa aka elele, baa pana aŋ ti'inta keeni iyi-tumapa. Uduciya wa aba ụ'wụtụ ubwa shɛ tụsụma tu na aa sụma AGWANGWAMA inyɛsɛ.

⁷Etwenyi aba a na eri a nda teleyi, a kala ụhiɛŋshɛ maa e mbiyeni aŋ.[105] Atwa na shɛ eseci-i'ɛlɛ cɛnjɛ ta aba a na a jala amɛ-olom a twa-u'wo gboo.

⁸Atwa te shi ya ihwɛŋnɛ ɛtɛ ya aba i'wɛtwɛ o, iwɛbɛ po yee tileni ya bohondo. Unu na aa ga twa la bwadụ tumomo lononu[106] ta aba tu hwuŋzwo. I zasa bụtụ be elele aa mụnɛ ya ụjɛrụma o.

⁹Cɛnjɛ ta ata, ta ta ya ụkwụla, tee tileni ya gadaga. Uwapa Lebanon hweteni, cɛnjɛ ta ata tu Sharon ti ga 'yajɛ la ugwungwu tebiye tu 'wi ya, i'wɛ'wɛ ya 'waŋ ambɛ nu Bashan keeni Ishɛmɛ Kamɛl.

¹⁰AGWANGWAMA hiɛŋ, N zhɛ mɛ ishijɛ ya hwuwayɛ. N zhɛ ma kaana ugombo hwuwayɛ, ɛ zhɛ kaa mo n gombicingo.

¹¹Hi le ofubo afwụrɛkɛcɛ, ehi meci ya arɛya[107] ihwungwɛ nɛ ahia hwungwa i shɛ ulwa na mo hi hwoŋzhingo kwunduu[108]

¹²Hi zhɛ hia bwaratagwụ gana atayɛ na ee nyeshi maa a njɛ ukawaŋ, gana esepi na ee kekebi ee hwoŋzhinji nu ulwa kwunduu.

¹³Ga atwa na dụlụmanjɛ, ta atwa na gwumwongonu a hwụjɛ iyi nɛ Ngaa njɛ maa e mepi ukpahiŋ mu.

¹⁴Inyɛsɛ shɛ anjɛ-iwɛwɛ u Zayon, aa zhɛgɛdaga, ɛɛ hiɛŋ, Ulwapɛ Agwatana ụ shɛ gana ulwa na wo hwoŋno unyizo-nom. I 'yajɛ tuba bụtụ be elele na amɛ tu na eri ba banangana ulwa gana ata wo hwoŋzhingo iyi kwunduu hŋ?

¹⁵Hi eri hia banangana ti yaa shɛ ahia zha tahaŋnụ ti tiririri, ahia duma kaa iyi nɛ teni cɛŋ. Ahia laka okofwo imwere tiya tedure nu ukpahiŋ hiŋ na ahiɛ 'yajɛ, ahia laka ukwuribi ugworo tulashɛga. Ahia laka tutogwu na atwa na heŋshi maa e dudweji mehieŋ ma atwa, ta atwa na heŋshi maa a njɛ iyi iwɛ elele.

¹⁶Nazhɛ ɛhi zhɛ hia banangana, hi zhɛ hia nama suu gana atwa na zweni ni ijilɛni nɛ 'yajɛ ikɛnyi. Hi zhɛ hia 'yaga iyimɛyɛ, hi na ya, te meni hi na swa.

¹⁷Hi zhɛ hia kwụbanana agwuma ebiye na zhɛ a ya tugwama ta cɛnjɛ tu na tu namɛ geri geri.

¹⁸Ti teyinje kwakwa ɛhi zhɛ hie teyinje, hiɛ hiɛŋ, Cee bile-bụ-ụdalụ namɛɛ? Cee ehiu atwa shihwolu namɛɛ? Cee bɛrɛcɛ ba shɛshɛkpa namɛɛ?

¹⁹Hi zha shɛ hia kwụba ya atwa ata tumama sata a na ma hi dumangana la rɛjɛmɛ no tugbudu, ru na ehi eshiciji shi o.

²⁰Kwụba ma Zayon, ụshɛpwụ ata ụ'wụtụ, atu ma nda la nsono mu tu mi iwɛ ya Agwatana. Kwụba ma Jɛrusalɛm! Ụ shɛ ofwo tunama na amɛ-olom. U zhɛ wa sha gana udulo tugwuno na ee mwi shi kwukwuŋ, e mwi shi i'wɛ'wɛ udulo ata o, e rufeji shi kaa ihwehwe ibwɛ o.

²¹AGWANGWAMA zhɛ mo tu mbisono igɛhi ibwɛ. Ti zhɛ ta nama ni ipɛlu erefu keeni ohwulwo na helenji, ama ihɛŋtu ɛtɛ i tinyakpa nyakpa zha shɛ ya kashɛka apata o[109]

²²AGWANGWAMA ni ikɛnyi ibwɛ, ubwa zhɛ a sha agwuma tu, ubwa zhɛ ma tu untangana, bu na tu dumangana ụshɛrɛya, ubwa zhɛ mo ti bicingo.

²³Iyi elele nɛ swatajɛ ni ihɛŋtu ɛtɛ hwɛɛ i shɛ tɛgadaga; e eri shi o mburusonu ni ihɛŋtɛnɛ o! Ti zhɛ ta lashɛga uduciya we ejeshi ata atwa tu i'ime, i zhɛ ya bala cɛnyii harɛ okwuturu du zhɛ no gwushogo urobwo aba.

²⁴I zasa bụtụ be elele na namɛ na cɛnjɛ tu ga tu tu zhɛ bɛ hiɛŋ ba gwuma o. Ɛ zhɛ a gangana atwa iwɛwɛ ya aba hwɛɛ.