Read bassa AYIZAYA 34 Bible Online

AYIZAYA 34 - bassa bible

AYIZAYA 34

¹Oo ahiɛba edenji, zhajɛ ma kpaaŋ! Ulwa ma maa hiɛ shɛlaga. Go unyizo kpaaŋ, ta atwa elele na namɛ nu bwa zhajɛ epe maa a shɛlaga.

²AGWANGWAMA 'yajɛ isɛbwɛ i'wɛtwɛ ne edenji elele, te ejeshi aba. Bi peni aŋ n-ndumwa-tụwụma, bɛɛ zhɛ ba kwụna aŋ.

³A zha shɛ o no n'wo ma aba o, mi zhɛ mo tulogono gana ata mu no fwoso, mu na nda ụhiụŋ gboshoo. Nshama ma ata mi zhɛ mo shonjomo ne mehieŋ ma aba.

⁴Uwaŋna, nu upiana, tu nkpasu zhɛ mo no ma 'waŋ na cɛnjɛ, unyizo zhɛ wo kwungwulwo gana igweze, nkpasu mi zhɛ ma 'waŋtangwụ gana ambɛ afwafwa kwo kaa gana ambɛ owowo na a 'waŋ.

⁵AGWANGWAMA lubwa utokwobi[110] ubwa na azuba, bɛɛ zhɛ ba shɛla atwa Idụm a na bee peni n-ndumwa-tụwụma, bɛɛ zhɛ ba kwụna aŋ.

⁶Mehieŋ keeni manɛbɛ ma aba mi zhɛ ma swana nu utokwobi ubwa, gana mehieŋ keeni manɛbɛ mo oywoywo agwụdụ, ni iyweywe nɛ oo to ụrụpɛ keeni manɛbɛ mu mkpokpolo ma adagba. Nu Bozra ụshɛpwụ ata ụ'wụtụ, apata AGWANGWAMA zhɛ a ta ụrụpɛ ata, na cɛnjɛ ti Idụm kaa bɛɛ zhɛ ba nda ikwunɛ ɛtɛ i'wɛtwɛ 'wɛtwɛ.

⁷Atwa zhɛ no jirongwu gana inemi keeni oywoywo inɛ, cɛnjɛ ti zhɛ to shonjomo howuu ne mehieŋ, manɛbɛ mi zhɛ ma swana na tuba.

⁸Aka gatata AGWANGWAMA zhɛ o bicingo Zayon maa tụpana iyi nɛ atwa i'ime aba njɛ aŋ la.

⁹Erefu Idụm zhɛ a jɛshɛrɛga ukotolo, cɛnjɛ ta aba ti zhɛ ta sha tuwiŋ-tu-uwaŋna. U'una ata zhɛ wo hwoŋno hwɛɛ wa sha gana ukotolo.

¹⁰U zhɛ no hwoŋno tụ ụjita tu uwaŋna, u zhɛ na nda nshikwo unyizo-nom. Cɛnjɛ ta ata ti zhɛ ta sha osombo nu usara elele na waŋnɛ. I zasa bụtụ zhɛ bo dulo maa tono tu okwo tutono kwukwuŋ ya.

¹¹Ecepi keeni igbe aba zhɛ a nama apata, ozhikwukwu, na agwaagwaa aba zhɛ a lashagaga cɛnjɛ ta ata. Ubwa zhɛ ba bata uhwohwo iyi tusukwutogwu nu ubwa keeni meni ma tuma tundarɛshɛnga. AGWANGWAMA zhɛ a ndaanana cɛnjɛ ta ata osombo gana na tu taa shɛ la nazhɛ aa njɛ unyizo.

¹²Za bụtụ zhɛ ba ya tugwama na amɛ ubwa o, ehwurembe ubwa zhɛ a bananga nu bwa hwɛɛ.

¹³Esepi no tu'unto aba zhɛ ɛ unshɛ nu nhwaŋ ma shɛgwuma, ta ashɛpwụ ata oo mo nu uba, ibɛ po aka, no ozhikwukwu, aba zhɛ a nama ya na aba.

¹⁴Isundɛ ye ehilo zhɛ no rungo apata a na swa ugwu, iyi-uumwa nɛ yo rungo nụ ụjita, ibɛ zhɛ no momo loshogonu n'ungwa, apata zhɛ a sha ofwo na ogburudu zhɛ na ta ụhinjanụ.

¹⁵Ozhikwukwu zhɛ na ta tuhwurugwo ta aba apata, a na 'waŋ shɛnjɛ, ɛ nɛ bwujɛ oywoywo aba, a na nɛnga aŋ apata. Egbeji zhɛ na ụlwatagwụ apata, bu na bu na no bwolo bwa.

¹⁶Dwalakaka nu utakada ata AGWANGWAMA 'nyeci[111] maa rɛcɛ iyi nɛ wɛɛ hiɛŋ iwɛ iyi-uumwa gɛ. I zasa iyi-uumwa gɛ okwo ike i zhɛ ya ina o, i zasa kaa du inɛɛ nɛ zha shɛ ya 'yaga uyebi ibɛ o. AGWANGWAMA pwonuo-unu maa ga i shɛ gana ata. Mpiala mu bwa mu ba mi zhɛ mo sotulonu aŋ urubwo uko.

¹⁷AGWANGWAMA zhɛ o dwotwogonu aŋ cɛnjɛ ta ata, bo utogono tu inɛ inɛ. Ɛ zhɛ a nama na cɛnjɛ ta ata nu uwaŋnɛ aba we elele, ti zhɛ ta sha ma ta aba unyizo-nom.