Read bassa AYIZAYA 38 Bible Online

AYIZAYA 38 - bassa bible

AYIZAYA 38

¹Na aka ata ibɛ ụngwụ to agwuma Hɛzɛkia, bɛɛ zhɛ tu'wo. Ga Ayizaya bigesere ata yɛu Amoz zhe maa kwubɛ bụ, bɛɛ hiɛŋ bụ, Iyi nɛ AGWANGWAMA hiɛŋ na, bi hiɛŋ, Imanganga ihwɛ bu, iwɛnɛ abi zha shɛ ba zhɛmanana ụngwụ ga, ama bi zhɛ bo 'wo.

²Gɛ Hɛzɛkia peni eshe ubwa geri bụ ụdatụ, baa njɛ adua no ofwo AGWANGWAMA, bɛɛ hiɛŋ,

³Oo AGWANGWAMA, Ma bụ tabwa, teyinje gana na Ngaa bụ ndanɛ ugondu na tɛcara keeni na tumama pana na amɛ mi hwɛɛ; Ngaa njɛ kaa iyi nɛ i bu kwụlanɛ aka elele. Bee kwuni u'wo-tutwa gboo.

⁴Nazhɛ AGWANGWAMA peni Ayizaya unu, bɛɛ hiɛŋ,

⁵Zhaga mbiso Hɛzɛkia, hiɛŋ bụ, Iyi nɛ AGWANGWAMA na shɛ Agwatana ugwunukwoshi bu ge Devid hiɛŋ na, bi hiɛŋ, N hwụjɛ adua bụ, Ngaa kwụbɛ kaa u'wo na abɛ cwɛ, N zhɛ ma bu kaana uraiŋ tiya shiywa umpwa-na-shɛba-shɛ-ta geri be eshe.

⁶N zhɛ mo bu bicingo tụ ụshɛpwụ ga Jɛrusalɛm ni i'ɛlɛ ya agwuma Asiria, N zhɛ ma jɛlanɛ uŋ du.

⁷Ga Ayizaya hiɛŋ bụ, Iyi nɛ zhɛ ya sha useyida maa AGWANGWAMA zhɛ a nda iyi nɛ bee shiri-unu na.

⁸Bi zhɛ bo gwuricingo uwaŋna ne ekwunyi ahaŋpalụ umpwa, zhaga nu umwono ata wa azuba ga Ahaz mo, no ofwo ata aa manga uzhizhi uwaŋna, bi zhɛ ba kwụba[116] Ibɛ po AGWANGWAMA gwuricinji ga uwaŋna ne ekwunyi ahaŋpalụ umpwa.

⁹Aka na ti gɛ Hɛzɛkia agwuma Juda zhɛmananɛ ụngwụ ubwa, bee 'nyeci azunga ga ashɛtwa, bɛɛ hiɛŋ,

¹⁰N nge heŋshi okwo no tukwuno tu uraiŋ mu Ngɛɛ zhɛ ma zha nu nhwaŋ-me-e'uye, maa kede Ma ya ya uraiŋ ga mu o.

¹¹N nge heŋshi okwo N zha shɛ ma kwụba ya AGWANGWAMA nu unyizo ga o. Okwo kaa bụtụ be elele na ta hwungwa o.

¹²E jeji uraiŋ mu waa kwunanjɛ, gana udulo tugwuno na ee hwuŋzhi; gana tugwuno tu na ee jeji na akpanga na aa ga na tụ. N nge heŋshi okwo Agwatana zhɛ a kwunanga ya uraiŋ mu.

¹³N cwɛ-u'wo nụ ụjita iwɛnɛ Ama hwuga-ụngwụ, Gana maa bizeci ba bwarataga o'umpwo mi kpaaŋ. N nge heŋshi okwo Agwatana zhɛ a kwunanga uraiŋ mu.

¹⁴Rụhwụŋ ri mi rụ sụpanɛ, raa namɛ dumo dumo, Omo ngwulo gana ikwucime. Eshe mi lukwumi azuba tungbaraka. Oo AGWANGWAMA m bicinji nụ ụbaụta ga.

¹⁵AGWANGWAMA ubwa njɛ iŋ. Imbe Ngaa 'yajɛ maa mɛ hiɛɛŋ? Amɛ mi hashɛganụ, ibɛ po Ngee eri shi ya malabụ[117]

¹⁶Oo AGWANGWAMA, gabụ gobuko kiri Ngɛɛ zhɛ ma namana, N nɛnjɛ maa Ma ya uraiŋ.

¹⁷Hioko tugwumana ti mi ti zhɛ ta jɛshɛrɛga ta sha amɛ-olom. Gabụ kaa bi bicinji uraiŋ mu[118] nu ushapa ufwu tɛnda, Abu 'wɛŋ iwɛwɛ mi kpaaŋ geri ba aba bụ.

¹⁸Atwa e'uye eri shi ma bụ 'walụ o; tu'wo kaa ti eri shi ta bụ shɛtana o. Atwa na uwo eri shi a patana ya tɛcara tụ bụ rishe o.

¹⁹Atwa na ta hwungwa aba ma bụ shɛtana, Gana na Ama bụ shɛtana hwuwayɛ go. Eshi o mbiso miaụŋ ma aba gana na abɛ shɛ bụtụ bɛ tɛcara.

²⁰AGWANGWAMA ubwa n nɛnjɛ. Ti zhɛ ta 'nyama shiduma maa ta bụ shɛtana na azunga, Ta zunga azunga ashɛtwa nu umwono bu uuwa i ci aka na eti 'wi.

²¹Nazhɛ ga Ayizaya mbishi agwuma Hɛzɛkia maa go nuso ambɛ owowo maa ndapana nu utwa ata ubwa, bi zhɛ ba zhɛmanana.

²²Nazhɛ agwuma Hɛzɛkia heŋteni, bɛɛ hiɛŋ, Imbe tuba zhɛ ya sha tusakana maa N tɛ zhɛ mo tono nu umwono wa AGWANGWAMAA?