Read bassa AYIZAYA 39 Bible Online

AYIZAYA 39 - bassa bible

AYIZAYA 39

¹Aka ata agwuma Babulon ga Mɛrodak-aladan yɛu-ye-eyi Babulon hwụjɛ maa agwuma Hɛzɛkia gwụmɛ tebiye baa zhɛmananɛ, ibɛ po baa 'nyatanɛ bụ utakada baa panɛ atumwa ubwa ticinji medenji upwaŋ.

²Gɛ Hɛzɛkia to atumwa ata amuraba nu unyasa, bee mbisegeni aŋ uduciya ubwa hwɛɛ, ta azụrụfa ubwa ta azhɛnarɛya, ta manɛbɛ mu bwa mo ogwumishi, ta mu naa na mi 'yajɛ ụhiụŋ ubiye, bee mbiseni aŋ du ti i'wɛŋnɛ ibwɛ ujasa hwɛɛ. I zasa iyi elele nɛ vwɛ no shimwono shɛ bwa shi i'wɛŋnɛ, to ofwo elele na cɛnjɛ tu bwa tu namɛ bee mbisegeni shi aŋ o.

³Bigesere ga Ayizaya zhegeni agwuma Hɛzɛkia, bee heŋteni bu, bɛɛ hiɛŋ, Cee kwuŋ atwa ga banɛɛ? Imbe kwuŋ ɛɛ bi hiɛɛŋ? Gɛ Hɛzɛkia jishijɛ, bɛɛ hiɛŋ, A banɛ taa nu u'una na dụlụmɛ, taa nu Babulon aa banɛ.

⁴Ga Ayizaya heŋteni bu, bɛɛ hiɛŋ, Imbe aa kwụbɛ ni ihwɛ gɛ buu? Gɛ Hɛzɛkia jishijɛ, bɛɛ hiɛŋ, A kwụbɛ iyi elele nɛ namɛ ni ihwɛ mi, i zasa iyi elele namɛ no shimwono shi mi shi i'wɛŋnɛ Ngee mbiseni shi aŋ o.

⁵Nazhɛ ga Ayizaya hiɛŋ agwuma Hɛzɛkia, Hwulaga n-ndumwa mu na AGWANGWAMA na Hwuri Kpaaŋ jɛmɛ,

⁶Aka zhɛ o to tɛ ɛ zhɛ o sugo iyi elele nɛ namɛ no shimwono shɛ bụ shi i'wɛŋnɛ hwɛɛ nu Babulon, iyi nɛ ogwunukwoshi bu kwuni la hwayɛ tuswaka uuwa i ci hwuwayɛ. I zasa iyi elele zhɛ ya vwa o.

⁷Ti meseyi ajalalo bu a na ɛɛ tɛ zhɛ ma bu matanga gom, a na zhɛ a sha u'waba bụ, ne mehieŋ mụ bụ, ɛ zhɛ o sugo aŋ a nda aŋ nvwala mu na mi zhɛ mu na nda ugondu ni ihwɛ ya agwuma Babulon.

⁸Agwuma Hɛzɛkia heŋshi maa n-ndumwa mu ga mi zha shɛ mɛ sɛ na aka ubwa o, ama bi zhɛ ba 'yaga amɛ-olom keeni tusuu uuwa bu to 'wo, iwɛbɛ po bɛɛ jishijɛ Ayizaya, bɛɛ hiɛŋ, n-ndumwa mu na AGWANGWAMA jɛmɛ mɛ zhɛmɛ.