Read bassa AYIZAYA 41 Bible Online

AYIZAYA 41 - bassa bible

AYIZAYA 41

¹Agwatana hiɛŋ, Ahiɛba na hiɛ namɛ na adakwụ erefu, nama ma saiiŋ maa hiɛ hwulaga! Ge edenji 'yaganana ukpahiŋ ufwo, ga a mama 'imɛ maa e shepi n-ndumwa nu umwono-ụshɛrɛya; tu ulwa ma apata maa tụ kwụbɛ ma bụtụ na teni cɛŋ.

²Gaaba kwuŋ zɛrijɛ bụtụ ata bu uwaŋna-banụ ba lasatagwụ atwaa?[122] Bu gata njɛ maa bu na fwugaga atwa no ofwo elele na bee teni.[123] Gaaba kwuŋ njɛ bụ maa lasụ shɛgwuma ne edenjii? Utokwobi ubwa bweleji aŋ gana maa ambɛ aa shɛ. A'inla ubwa gereteji aŋ gana ujipo na wa garataga arɛya.

³Bu urigeni aŋ nu usumwa, baa 'wa aŋ, i zasa kaa iyi elele njɛ bụ o, bu 'wa aŋ ni izɛlɛgwu nu uhwaŋna ata bee te te shi la kwukwuŋ!

⁴Gaaba kwuŋ njɛ maa gɛ ijɛ i njɛɛ? Gaaba kwuŋ heŋshi iwɛ iyi nɛ njɛ cala inɛɛ nɛ i shɛ ya hwayɛ shɛrụkwụkwụụ? Gamba AGWANGWAMA, N namba apata taa nu umozhigo, Gamba AGWANGWAMA, N zhɛ kaa ma nama tutu ukwunanga.

⁵Atwa na patanganɛ taa na adakwụ erefu kwụbɛ iyi nɛ Ngaa njɛ. Inyɛsɛ shɛ aŋ, aa zhɛgɛdaga; ibɛ po aa ulwa hwɛɛ aba, aa zhajɛ.

⁶Bụtụ bụtụ bo mbiyono binya bwa, bụtụ bụtụ bɛ hiɛŋ yɛu-bino bwa, Ima-isɛbwɛ.

⁷Bishebi bi i'wɛ'wɛ ba dumanga bụlụma ba azhɛnarɛya, Bugbelecenji ba tuwa ba ta tụ okoto. Ɛ hiɛŋ ya, Kaayɛ! Tuswana ta tuba tɛ zhɛmɛ, ee ndepengeni ya tuwa ta ata ni iyi, oo to tu okoto maa ti 'yaga ikɛnyi.

⁸Gabụ yɛu mi ugondu, ge Isrɛl, gabụ ge Jekob Ngee teri, ahiɛba hiɛ shɛ ajalalo biyejilo mi ga Abraham.

⁹Gamba n hi bɛcinjɛ taa nu ukwunanga cɛnjɛ tu unyizo; Ngaa hi suyanɛ kaa taa nu usugwulumi tuba na dụlụmɛ, Ngɛɛ hi hiɛŋ, Ahiɛba hiɛ shɛ miaụŋ mi mi mu ugondu, N hi jineci shi o!

¹⁰N namɛ na bụ, ta nda inyɛsɛ o! To lono maa iyi elele i bu zweni inyɛsɛ o. Gamba n shɛ Agwatana bụ! N zhɛ mo bu mbiyono, maa ma bu ta ikɛnyi; N zhɛ ma bu untangana nu u'ala mu ubiye u tiririri maa shikono to.

¹¹Hioko, ezuye keeni ụpụrụsa zhɛ wo jitono atwa elele na ma bu ta nu uwuru. Atwa na kaa ma bụ sukakana ni ifelu, a zha shɛ a sha iyi elele o, ɛ zhɛ o 'wo

¹²Atwa ata bu ifelu zhɛ a ina nu unyizo. Okwo ebu dwelekeci aŋ, bi zha shɛ ba kwụba aŋ o. Atwa na kaa me bu sugeni ujasa, a zha shɛ a suba iyi elele o.

¹³Gamba n shɛ AGWANGWAMA na shɛ Agwatana bụ; M bu to ikɛnyi, Ngɛɛ hiɛŋ, N zhɛ mo bu mbiyono, ta nda inyɛsɛ o.

¹⁴AGWANGWAMA hiɛŋ, E-Isrɛl, okwo gana elele ta bu 'nyanɛ, abu namɛ cwɛŋ, ta nda inyɛsɛ o, N zhɛ mo bu mbiyono. Gamba Bụtụ ata bi Tijilo bi Isrɛl, Gamba kaa n hi gwube.

¹⁵N zhɛ ma hi nda gana bumbolo bi ijibi bu ufwo bu naa na 'yajɛ ikɛnyi, na kaa zhineni tebiye. Hi zhɛ hio dubo nshama hio hwuŋzotongo mu. Nshama mi zhɛ ma bwaratagwụ rukwurukwu ma sha upwupwutu.

¹⁶Gabụ bi zhɛ ba piasa aŋ nu mpiala; ibɛ po uvwugo zhɛ wo sugo aŋ, nazhɛ mpiala mụ 'wụtụ mi zhɛ ma garataga aŋ. Nazhɛ ɛhi zhɛ hia 'yaga unyasa iwɛnɛ Ngaa shɛ Agwatana hiŋ; ɛhi zhɛ hi ma n shɛtana, Gamba Bụtụ ata bi Tijilo bi Isrɛl.

¹⁷Yaa shɛ utakashɛ meni to atwa mi, aa jala mụ na aka na to orworwo aba hweteni, i'uyɛ gwụmɛ aŋ, nazhɛ Gamba na n shɛ AGWANGWAMA aba Ngɛɛ zhɛ mɛ jishijɛ adua aba; Gamba Agwatana Isrɛl, N zha shɛ mo jinoko aŋ o.

¹⁸N zhɛ ma nda maa erefu fwụnjɛ nu nshama mu hwoo; ɛmɛzhinjɛ tuba zhɛ na fwunga no olomu. N zhɛ ma nda maa okwokwo meni nama na ashɛka. Cɛnjɛ tu hwoo ti zhɛ ta sha ɛmɛzhinjɛ.

¹⁹N zhɛ ma nda maa osobu unshɛ na ashɛka, keeni ɛshɛkpɛcɛ, na atụla-ishɛmɛ, ta buta. I'wɛ'wɛ uwapa zhɛ yɛ unshɛ nụ ụshɛka, te eyigo, ta agbagbada, to orokwo.

²⁰Atwa zhɛ a kwụba ijɛ, ɛɛ zhɛ a mapa maa Gamba AGWANGWAMA N njɛ iŋ. Ɛ zhɛ o eshicigo maa Bụtụ ata bi Tijilo bi Isrɛl, ubwa njɛ upo ijɛ cimi.

²¹AGWANGWAMA na shɛ Agwuma Isrɛl hiɛŋ, Ahiɛba azhɛba edenji, zhajɛ ma nu n-ndumwa mi hiŋ. Suje ma iyi elele nɛ ahiɛ 'yajɛ, maa hi meme lesheji!

²²Zhajɛ ma epe maa hi ti mbishi iyi nɛ tɛ zhɛ ya nda geri be eshe, iwɛ maa yaa njɛ hwuŋ ta mapa. Iti mbishi ma iyi nɛ ndanjɛ la cala maa ta haŋsa iwɛ ibɛ. Iti mbishi ma iyi nɛ shɛ ecilo ibɛ, duma ma iyi nɛ te e ci kpataa.

²³Iti mbishi ma iyi nɛ ta namɛ geri be eshe, nazhɛ ɛti zhɛ ta mapa maa hiɛ shɛ ga azhɛba! Nda ma iyi ibiye ike kwo kaa abara ne ebe oko; utu zweni ma inyɛsɛ keeni tuholono!

²⁴Ta ahiɛba, ti iyi nɛ ahia nda i shɛ iyi tɛgadaga; atwa elele na ihi teri maa a na hiɛ zhɛba, a shɛ iyi-tupwaŋ.

²⁵N teri bụtụ bu ko na namɛ geri bu uwaŋna-banụ; N zhɛ ma shapɛ bụ maa kwune tusukakana tuzuba. Ubwa zhɛ bo rukoto shɛgwuma gana udwodwo, gana na to bumo-bu-nkwasha ba fwaŋ cɛnjɛ-ti'wɛŋnɛ.

²⁶Gaaba na amɛ hiŋ jɛmɛ la maa iyi gɛnɛ gɛ zhɛ ya nda, iwɛ maa tɛ hiɛŋ bụ, Jejesuwaa? I zasa bụtụ be elele na jɛmɛ la iwɛ ibɛ o. I zasa kaa bụtụ hwụjɛ la ta hiɛ dumanɛ iwɛ o okwo ike o!

²⁷Gamba na n shɛ AGWANGWAMA, Gamba m mbishi la atwa Zayon unabarɛ ga hiiŋ. Gamba n tumwanɛ utumwa maa e mbishi atwa Jɛrusalɛm unabarɛ ubiye!

²⁸Aka na Ngaa mbiyanɛ azhɛba ata, i zasa a na elele 'yajɛ iyi nɛ maa a jɛmɛ o; i zasa kaa du a na jishijɛ iheŋtene nɛ Ngee heŋteni aŋ o.

²⁹Azhɛba ata hwɛɛ a shɛ iyi tɛgadaga, i zasa iyi elele nɛ e eri a nda kwukwuŋ; tuwa ta ata tu lwegeji, tu zasa kaa ukpahiŋ elele o.