Read bassa AYIZAYA 43 Bible Online

AYIZAYA 43 - bassa bible

AYIZAYA 43

¹Oo ahiɛba atwa Isrɛl, AGWANGWAMA na ihiɛ karɛ hiɛŋ, Ta nda ma inyɛsɛ o, N zhɛ me hi gwube. N hi suyanɛ ni izeci hiŋ, atwa mi kaa ahiɛ shɛ.

²Okwo ehi teni meni mu ufwugwo mu na mi iri, N zhɛ ma nama ne hiŋ; okwo ehi teni erefu, a zha shɛ mo hi sugo. Okwo aka ehi teni nu ulwa, hi zha shɛ hio hwoŋno. Bụratụ bu ulwa ata kaa zha shɛ mo hi songo.

³Gamba n shɛ AGWANGWAMA na shɛ Agwatana hiŋ, Gamba n shɛ Bụtụ ata bi Tijilo bi Isrɛl na shɛ bibicinji hiŋ. N suji atwa Ijipti Ngee hi peni maa e hi bicinji, ti Itiopia keeni Shiba maa a shɛ ụtarụtụ hiŋ.

⁴N zhɛ mo sugo edenji elele kpaaŋ ma hi pana maa a shɛ usheyinji hiŋ keeni usheyinji shihwulu shi hiŋ, iwɛnɛ ahi n shanɛ atwa ogwumishi keeni iwɛnɛ Ngee hi lubi, Ngee hi peni kaa ụjɛrụma.

⁵Ta nda ma inyɛsɛ o, iwɛnɛ Ngaa namɛ ne hiŋ! N zhɛ ma bwajɛ atwa hiŋ a na namanjɛ geri bu uwaŋna-banụ hwɛɛ, ti geri bu uwaŋna-twonuo maa me hi jicinje.

⁶N zhɛ mɛ hiɛŋ atwa tuzuba, Ganga aŋ ma, Mo mbiso atwa tuta, mɛ hiɛŋ, Ta untangana ma atwa mi o. Ahiɛba na hiɛ dụlụmanjɛ, gwuricinje ma miaụŋ mi mi me eyi; ahiɛba na hi namɛ nu ukwunanga unyizo, gwuricinje ma miaụŋ mi mi mo o.

⁷Bụtụ be elele na aa suyana ni izeci mi, Gamba n karɛ bụ, Gamba m mo bu, Ngaa njɛ bụ maa ma m muna ụjɛrụma.

⁸Agwatana hiɛŋ, N gwuricingeni ma atwa ata mi 'yajɛ eshe, a na kwụbɛ shɛ kaa uhwaŋna, keeni atwa ata mi 'yajɛ acɛbɛ, a na hwụjɛ shɛ kaa iwɛ.

⁹Ge edenji kpaaŋ ulwa urubwo uko, ga atwamwa sotulonu kpaaŋ maa e heŋteni aŋ iheŋtene. Gaaba na amɛ aba eri ba duma iwɛ iyi nɛ ye ci geri be eshee? Bu na naa na amɛ aba iti enengeni iwɛ iyi nɛ koshikwoo? Ge e suje eseyida aba maa e le tiseyida okwo e teni cɛŋ, maa e le aŋ tiseyida maa n-ndumwa ma aba mɛ shɛ iwɛ-tɛkana.

¹⁰AGWANGWAMA hiɛŋ, Ahiɛba atwa Isrɛl, ahiɛba hiɛ shɛ eseyida mi; Gamba n hi teri maa hiɛ shɛ miaụŋ mi mi mu ugondu, iwɛ maa hi m mepi, maa hi n tɛtana-rishe, maa hi mepi maa Gamba kiri n shɛ Agwatana. Yaa shɛ shɛ Gamba, Agwatana anya zasaba ya o. I zasa bu naa na namwawaŋ la o, i zasa kaa bu naa na tɛ zhɛ ba nama ya o.

¹¹Gamba Ngooko kiri n shɛ AGWANGWAMA, bibicinji binya zasaba ya namɛ swooŋ ne mi o.

¹²AGWANGWAMA hiɛŋ, N dumwa kpataa, Ngoo bicingwo[130] Ngoo onongwo; i zasa azhɛba agaiŋ a na namba na ashashɛ hiŋ na nduwa ijɛ o. Ahiɛba kaa hiɛ shɛ eseyida mi.

¹³Gamba n shɛ AGWANGWAMA na namba cala cala, i zasa bụtụ na eri ba lashɛga iyi ni i'ɛlɛ mi o; i zasa kaa du bụtụ eri bo sheyingo iyi nɛ Ngaa dumwa o.

¹⁴AGWANGWAMA na shɛ Bugwubi hiŋ, na shɛ Bụtụ ata bi Tijilo bi Isrɛl hiɛŋ, N zhɛ ma tumwana ejeshi maa a sukakanɛ Babulon maa tuba hi bini; N zhɛ ma bwada akpa ashɛpwụ ata, ibɛ po n'ungwa ma atwa na jɛjɛ nu bwa mi zhɛ ma sha u'wo ụzhɛla tutwa.

¹⁵Gamba n shɛ AGWANGWAMA, na shɛ Bụtụ hiŋ bi Tijilo. Gamba n hi karɛ, ibɛ po Ngaa shɛ Agwuma hiŋ.

¹⁶AGWANGWAMA na keri uhwaŋna ata keshi itekwu, na du shiri ụlamụ ata keshi meni ma ata mu ukpahiŋ,

¹⁷ubwa zeriji ejeshi ofwugwo, a na 'yajɛ ti ihɛŋtu ujasa, ni idɛkwɛ, ne ejeshi na beni urishi, no ofwo ti'ilono, o kwu, ee 'wericinji aŋ gana buzuzu bụ ụsụtụla.

¹⁸Ama AGWANGWAMA hiɛŋ, Ta uranga ma iyi nɛ koshikwo, te teyinje ma kaa du iyi nɛ teni la cala cala o.

¹⁹Ngbaraka ma maa hiɛ kwụbɛ iyi ifwo nɛ Ngɛɛ zhɛ ma nda. I na nda du kaa cebe, ehi eri du kaa hia kwụba iŋ okwo hwuwayɛ go! N zhɛ ma kala uhwaŋna nụ ụshɛka, nazhɛ Ngɛɛ zhɛ ma hi ndana ohwulwo meni[131] na cɛnjɛ tu undolo.

²⁰Okwo isundɛ ye ehilo zhɛ ma m muna ụjɛrụma, aka[132] na agbaanjɛ ma n shɛtana iwɛnɛ tu Ngaa njɛ maa meni mu nama nụ ụshɛka, maa ohwulwo na fwunga na cɛnjɛ tu undolo, maa atwa mi a na Ngee teri 'yaga meni maa a na swa.

²¹Aba shɛ atwa na Ngɛɛ mɛmɛ kɛlɛnjɛ, maa a na ma n shɛtana!

²²AGWANGWAMA hiɛŋ, Oo e-Jekob, okwo ti yaa shɛ gana ata bu n suyanɛ shɛ ya o, Oo e-Isrɛl, bu n lukwumeni ya.

²³Hi n 'waŋnanɛ shɛ ya kaa agwụdụ maa hi n peni ụrụpɛ tuhwoŋzhingo; hi m mụnɛ shɛ kaa ụjɛrụma na arụpɛ o. N hi peteni shi ya kaa i'wɛŋnɛ maa na ma m panɛ ma iyi ụrụpɛ tiya o, N hi lukwucinji shi ya kaa maa na ma m panɛ ma iturɛre o.

²⁴Hi n senji shi kaa iturɛre, kwo kaa maa hi n lemicinji amɛ na manɛbɛ mi iyimabiga ya arụpɛ hiŋ o. Ama iwɛwɛ hiŋ i n shanɛ i'wɛŋnɛ, ehi mo n lukwucingo ni iyi nɛ 'wanjɛ tɛndangana.

²⁵Gamba kaa n ta shɛ Agwatana na ma wafwaga andwa hiŋ tubwada, N zha shɛ kaa me teyinje ya iwɛwɛ hiŋ o.

²⁶Sweji ma n-ndumwa mi hiŋ maa tɛ jɛmɛ mu ma zhiaaŋ, sweji ma maa e mepi bụtụ na n-ndumwa mɛ zhɛmɛ!

²⁷Bishi ata hiŋ bi hiiŋ[133] njɛ iwɛwɛ, atwa na namɛ na ashashɛ mi ne hiŋ[134] e m pindeni.

²⁸Iwɛbɛ po Ngee heshigeni miaụŋ mu tugwama[135] mo ohwolu mi tijilo, iwɛbɛ po du kaa Ngee keleni Jekob ufwu tɛnda mbowuu, Ngee leni kaa maa ga ge Isrɛl shɛ iyi tutwa.